Vykładaŭ fota ŭ majcy Russia, a Łukašenka nakazvaŭ jamu zaziamlicca. Šeść faktaŭ pra Ihara Bryło, zatrymanaha pa «małočnaj spravie»
14 listapada Alaksandr Łukašenka zajaviŭ, što raskrytaja karupcyjnaja schiema ŭ tak zvanaj «małočnaj spravie», dzie «śvieciacca i členy ŭrada». U jaje miežach zatrymany 26 čałaviek, 15 ź ich — pad aryštam. Zatrymany akazaŭsia i Ihar Bryło — eks-ministr, inśpiektar pa Viciebskaj vobłaści. Zhadvajem cikavyja momanty ź jaho bijahrafii.
Ź dziacinstva maryŭ stać vajskoŭcam abo milicyjantam
Iharu Bryło 51 hod. Jon naradziŭsia ŭ Barysavie, tamsama skončyŭ siaredniuju škołu №19 (ciapier himnazija №1).
Jaho baćki rabili na barysaŭskim piŭzavodzie. Maci adpracavała tam usio žyćcio — bolš za 40 hadoŭ. Baćka taksama pačynaŭ na hetym pradpryjemstvie, potym pierajšoŭ pracavać na Barysaŭski zavod miedyčnych preparataŭ.
U školnyja hady Ihar Bryło aktyŭna zajmaŭsia sportam — łyžnymi honkami. Padletkam maryŭ stać vajskoŭcam abo milicyjantam. Jamu vielmi padabalisia zaniatki pa pačatkovaj vajskovaj padrychtoŭcy, jakija byli abaviazkovymi dla tahačasnych vučniaŭ. Ale junak mieŭ prablemy sa zrokam, tamu nie spadziavaŭsia prajści miedkamisiju ŭ vajskovuju vučelniu.
Jak varyjant razhladaŭ vučobu ŭ Instytucie fizičnaj kultury. Adnak jaho adhavaryli nastaŭniki: maŭlaŭ, być fizrukom i trenieram nie prestyžna, tym bolej dla amal što vydatnika (u atestacie vypusknika Bryło byli tolki dźvie «čaćviorki», astatnija «piaciorki» — tady ŭ biełaruskich škołach dziejničała piacibalnaja sistema acenki viedaŭ).
Z žonkaj paznajomiŭsia na łyžnych zborach
U Viciebski vieterynarny instytut Bryło trapiŭ pa paradzie trenieraŭ. Chłopca z'ahitavali pastupać mienavita tudy, bo na bazie VNU była mocnaja škoła pa łyžnych honkach i bijatłonie. Vučycca akazałasia składana, bo davodziłasia spałučać treniroŭki z vučobaj. Pryčym treniroŭki dla studenta byli bolš važnymi — jon spadziavaŭsia stać prafiesijnym spartoŭcam. Adnak padviało zdaroŭje, i ad trenirovak pryjšłosia admovicca pa rekamiendacyi daktaroŭ. Daviałosia zasiarodzicca na vučobie, i ŭ 1996 hodzie Bryło skončyŭ Viciebskuju vieterynarnuju akademiju (za čas jaho navučańnia ŭstanovu pierajmienavali) pa śpiecyjalnaści «Vieterynaryja».
Z budučaj žonkaj Ihara Bryło taksama źvioŭ sport: jany paznajomilisia na łyžnych zborach. Śviatłana maładziejšaja za muža na 6 hadoŭ, i raśpisałasia para ŭžo tady, kali dziaŭčyna stała studentkaj instytuta fizkultury, a jaje abrańnik adpracavaŭ pieršy hod pa raźmierkavańni.
U siamji troje dziaciej. Starejšaja dačka Karyna skončyła vieterynarnuju akademiju, jak i baćka, siaredniaja Kaciaryna advučyłasia na vykładčycu fizkultury — taksama pajšła pa spadčynnaj ściažyncy. Zrešty, abiedźvie dački ŭ dziciačyja hady surjozna zajmalisia sportam — tymi ž łyžnymi honkami. Syn Illa jašče školnik, i taksama nie curajecca sportu — zajmajecca płavańniem i futbołam.
Žonka niekatory čas pracavała trenieram, ciapier — chatniaja haspadynia. Kab padtrymlivać fizičnuju formu, Ihar Bryło navat na pasadzie ministra paśpiavaŭ chadzić u basiejn i katacca na łyžach — pieravažna pad Łahojskam.
Rabiŭ rektalnyja daśledavańni karovam i pracavaŭ va ŭbojnym cechu
Pieršym pracoŭnym miescam Ihara Bryło stała Barysaŭskaja rajonnaja vieterynarnaja stancyja. Jaho pryznačyli vietlekaram, jakich u 1990-ja zaŭvažna brakavała. Pa pracy ŭčorašniamu studentu davodziłasia šmat pajeździć pa fiermach, dzie nie było navat haračaj vady, brać analizy ŭ karoŭ i pryvodzić rektalnyja daśledavańni.
«Heta kali płodnaść karovy praviaraješ nie skanieram, a rukoj. I kali pahladziš 30-40 karoŭ, to ruka ŭžo niamieje», — tłumačyŭ u adnym ź intervju budučy ministr sielskaj haspadarki.
U 2001-m Ihar Bryło pamianiaŭ miesca pracy: pajšoŭ pracavać vieterynarnym lekaram na Barysaŭski miasakambinat. Jaho zaprasiŭ tudy tahačasny dyrektar Hienadź Skitaŭ — ciapier hienieralny dyrektar mahiloŭskaj «Babuškinaj krynki» i hałoŭny fihurant «małočnaj spravy». Imavierna, siabroŭskija adnosiny sa Skitavym i paŭpłyvali na toje, što Bryło kolki dzion tamu byŭ aryštavany.
Na miasakambinacie Skitaŭ prapanavaŭ Iharu Bryło pasadu z dobrym zarobkam, ale vielmi svojeasablivuju. Jaho pastavili pracavać vieterynarnym doktaram va ŭbojny cech. U abaviazki Bryło ŭvachodziŭ ahlad žyvioły, jakuju pryvozili na kambinat, u tym liku paśla zaboju. «Heta ciažkaja praca — ty pa kalena ŭ brudzie, pa łokać u kryvi, z nažom u rukach, a paŭz ciabie idzie kanviejer, jaki niemahčyma spynić. Što ž, praca takaja», — pryhadvaŭ paźniej Ihar Bryło.
Fatahrafavaŭsia ŭ majcy z nadpisam Russia
U 2019 hodzie, padčas pracy ŭ ministerstvie sielskaj haspadarki, Ihar Bryło staŭ hierojem skandalnaha incydentu, vykłaŭšy ŭ svaim instahramie fota ŭ majcy z nadpisam Russia. Zdymak byŭ zrobleny na barysaŭskim pradpryjemstvie «Zdravuška miłk AAT», jakoje vypuskaje małočnuju pradukcyju. Paśla taho, jak na heta źviarnuli ŭvahu ŚMI, čynoŭnik zakryŭ svaju staronku.
Pres-sakratarka ministerstva Zinaida Biareščanka abmaciukała žurnalista «Našaj Nivy», kali jon źviarnuŭsia pa kamientar nakont hetaha fota. Paśla spadarynia Biareščanka vybačyłasia, ale jaje zvolnili.
U svaich publičnych vystupach Bryło nieadnarazova padkreślivaŭ, što sapraŭdny patryjot — heta toj, chto padtrymlivaje dziaržaŭny kurs. I što najvažniejšyja pracoŭnyja jakaści, pavodle jakich treba adbirać kiraŭničy skład u luboj halinie, u tym liku i ŭ sielskaj haspadarcy — heta nie tolki prafiesijanalizm, a najpierš — patryjatyzm.
Kamientujučy paślavybarčyja padziei 2020 hoda, Ihar Bryło padkreślivaŭ što pradstaŭniki padviedamasnaj jamu haliny mała padtrymlivali pratesty. I vykazvaŭ ułasnyja viersii, čamu heta tak: «Hetyja ludzi zastalisia viernymi prezidentu. Napeŭna, jany bačyli staŭleńnie prezidenta da sielskaj haspadarki, jaho trapiatkoje staŭleńnie i toje, jak jon umieŭ usim nam pastavić zadačy».
Zhadvaŭ jon i zasłuhi vajskoŭcaŭ: «Treba skazać im vialiki dziakuj, bo, pry ŭsim žadańni kahości razhajdać krainu, jany hetaha nie dazvolili i nie zrabili. Nasamreč, adčuvajecca naša siła ŭ dziaržavie».
Łukašenka zahadaŭ jamu zaziamlicca
Sioleta 21 lipienia Alaksandr Łukašenka źniaŭ Ihara Bryło z pasady ministra sielskaj haspadarki i charčavańnia (Bryło zajmaŭ jaje z 2022-ha). Zdaryłasia heta prosta padčas sielektarnaj narady pa pytańniach uborki ŭradžaju. Raskrytykavaŭšy chadu ŭboračnaj na Viciebščynie, Łukašenka zajaviŭ, što nakiroŭvaje tudy Bryło svaim inśpiektaram. I što toj razam sa staršynioj abłvykankama «hałavoj adkazvaje» za likvidacyju niedachopaŭ.
Byłomu ministru Łukašenka dadaŭ i niekalki słoŭ ad siabie asabista: «Kali ty ŭsprymaješ heta jak vysyłku — heta tvaje prablemy. Tabie treba prajści hety etap. I kali ty tam voźmiešsia mocna, to i vynik budzie, i dla ciabie asabista vielmi karysny vynik. Treba zaziamlacca, kali ty dumaješ dalej pracavać».
I paradavaŭsia, što Bryło nie piarečyŭ: «Ty sałdat, i pa-sałdacku pastupaješ. Ja heta vielmi caniu».
Ihar Bryło aktyŭna ŭziaŭsia za pracu. U pryvatnaści, pačaŭ jeździć z pravierkami pa rehijonach, dzie rajonnaje kiraŭnictva z hetaj nahody ładziła sustrečy z nasielnictvam. Miascovyja žychary, jakija daŭno nie spadziajucca na dapamohu ŭładaŭ u vyrašeńni svaich prablem, tradycyjna ihnaravali «hramadskija pryjomnyja». I tut inśpiektar zajaviŭ, što bačyć ŭ hetym vyklučna stanoŭčuju źjavu: maŭlaŭ, «minimalnaja kolkaść zvarotaŭ hramadzian — heta maksimalnaja acenka pracy kiraŭnictva».
Imknučysia dahadzić inśpiektaru, u rajcentry Dubroŭna miascovaje načalstva adnojčy realizavała hety trend napoŭnicu: padčas pramoj telefonnaj linii zamiest pytańniaŭ da Ihara Bryło hučali adnyja padziaki rabotnikam rajvykankama.
Pierarazaŭ stužku na adkryćci stałoŭki
Apošni vizit Ihara Bryło pa rehijonach Viciebščyny adbyŭsia 4 listapada. U toj dzień adrazu siamiora čynoŭnikaŭ roznaha ŭzroŭniu ŭračysta pierarazali čyrvonuju stužku na adkryćci stałoŭki ŭ pasiołku Bihosava Vierchniadźvinskaha rajona.
Z hetaha hoda Bryło byŭ taksama kiraŭnikom Biełaruskaj fiederacyi konnaha sportu.
Amierykanka raskazała, jak vykładała va ŭniviersitecie ŭ Viciebsku i navat dała paru ŭrokaŭ milicyi3
Kamientary