«Jaje złavali razmovy pra futboł». Pamierła łedzi Keci Fierhiusan — žonka lehiendarnaha treniera «Mančester Junajted»
U piatnicu nie stała łedzi Keci Fierhiusan — žonki sera Aleksa. Heta była historyja nievierahodnaha kachańnia daŭžynioju ŭ 59 hadoŭ.
Žonka sera Aleksa Fierhiusana, łedzi Keci Fierhiusan, pamierła va ŭzroście 84 hadoŭ. Hetuju navinu paćvierdziła siamja, paprasiŭšy ŭ miedyja pryvatnaści ŭ hety niaprosty dla ich momant, piša Championat.com.
«Usie ŭ «Mančester Junajted» vykazvajuć ščyryja spačuvańni ser Aleksu Fierhiusanu i jaho siamji. Łedzi Keci była kachanaj žonkaj, maci, siastroj, babulaj i prababulaj, a taksama aporaj sera Aleksa na praciahu ŭsiaho času jaho karjery», — havorycca ŭ paviedamleńni «MIU».
Jany pražyli ŭ šlubie 57 hadoŭ — paznajomilisia ŭ Hłazha ŭ 1964 hodzie, kali abodva pracavali na fabrycy drukarak, i pažanilisia pra dva hady.
Pieršy raz, kali Keci ŭbačyła svajho budučaha muža, jana padumała, što kala jaje prajšoŭ niejki bandyt.
Fierhi tady atrymaŭ raśsiačeńnie na matčy (Fierhiusan tady hulaŭ za šatłandski «Danfiermlin»), tamu na tvary ŭ jaho byŭ płastyr. «Ja atrymaŭ traŭmu, a jana dumała, što ja albo hanhster, albo baksior», — zhadvaŭ jon.
«Potym ja daviedałasia, što jon futbalist, — raspaviadała Keci ŭ dakumientalnym filmie, jaki źniaŭ ich syn. — Ale mnie było ŭsio roŭna».
Druhi raz jany sustrelisia ŭ miascovaj tancavalnaj zale, ale Keci Aleks nie nadta ŭraziŭ. «Pahladzicie na jaho — jon vyhladaje vielmi drenna», — skazała jana tady svaim siabram.
Ale małady Fierhiusan byŭ vielmi ŭ joj zacikaŭleny: «Jana była pryhožańkaja, u jaje była vydatnaja pachodka, i ja pastaviŭ pierad saboj zadaču vyśvietlić, chto takaja hetaja Keci Chołdynh».
Fierhi nabraŭsia śmiełaści i zaprasiŭ dziaŭčynu na spatkańnie — jaho sproby zalacacca da Keci byli davoli niazhrabnymi, ale davoli miłymi: jany pajšli ŭ kino, i pierad filmam jon kupiŭ joj łakryčnych asarci. A potym sam ža ich i źjeŭ, kupiŭšy ŭžo pa darozie dadomu dziaŭčynie miascovuju hazietu.
«Heta byŭ moj ramantyčny dzień, — uspaminała Keci z uśmieškaj. — Praz dva hady my pažanilisia ŭ Hłazha. Paśla ja pajšła na pracu, a jon — na futboł».
27 hadoŭ ź ich sumiesnaha žyćcia łedzi Keci praviała ź Fierhi na «Ołd Trafard» (stadyjon «ManJunajted»), budučy jaho nadziejnym partnioram i aporaj. Žyć z trenieram było niaprosta: Keci redka jaho bačyła, ciarpieła kožny raz, kali jon zabyvaŭ pra dni naradžeńnia i padarunki na Kalady.
Ale mienavita jana pierakanała jaho pierahledzieć svajo rašeńnie pakinuć «Junajted» u 2002 hodzie.
«Usio vyrašyła mierkavańnie majoj žonki Keci, — raspaviadaŭ ser Aleks. — Ja źbiraŭsia sychodzić tamu, što ŭ mianie nikoli nie było mahčymaści nadavać svajoj siamji dastatkova času: ja bačyŭ žonku i troch svaich synoŭ redkimi epizodami. Ale, kali ščyra, dzieści ŭ hłybini dušy ja ŭsio ž spadziavaŭsia, što Keci sama stanie adhavorvać mianie ad sychodu. Tak i zdaryłasia. Kali b nie jana, to ŭsio było b inakš».
U 2013-m, praŭda, łedzi Keci ŭžo nie stała adhavorvać sera Aleksa ad sychodu z «Junajted». Tady pamierła jaje siastra, i jana pražyvała składany pieryjad.
«Adnojčy ŭviečary ja ŭbačyŭ, jak jana hladzieła televizar, a potym zirnuła na stol, — uspaminaŭ jon. — Ja viedaŭ, što jana addaliłasia. Vy viedajecie, što jany z Brydžyt byli bliźniatami? Kali ja na hety raz skazaŭ joj, što źbirajusia syści ŭ adstaŭku, u jaje nie było nijakich piarečańniaŭ.
Ja viedaŭ, što jana chacieła, kab ja heta zrabiŭ. Na praciahu 47 hadoŭ jana była kiraŭnikom siamji, kłapaciłasia pra našych troch synoŭ i achviaravała saboj dziela mianie. Ciapier u jaje šmat unukaŭ, jany ŭsie lubiać jaje, ale jana straciła svajho najlepšaha siabra, tamu ja pavinien pravieści čas ź joj».
Keci i praŭda była kiraŭnikom siamji — Fierhiusan, jaki byŭ hroznym trenieram na pracy, sastupaŭ kresła bosa doma žoncy.
Adnojčy jana paprasiła jaho vynieści z domu ŭsie jaho trafiei, jakija nahadvajuć pra futboł. «Vy naohuł nie znojdziecie ničoha ŭ domie, źviazanaha z majoj karjeraj. Keci ŭsio heta nadakučyła. Jana nievierahodnaja! Ja navat nie mahu ŭziać dadomu knihu pra futboł, inakš jana skaža: «Što jana tut robić?» — uspaminaŭ ser Aleks.
A kali ŭ 1999 hodzie jon byŭ paśviečany ŭ rycary, jana skazała lejbarysckamu palitołahu Ałasteru Kempbełu: «Vy nie dumajecie, što Aleks atrymaŭ dastatkova ŭznaharod?».
Joj naohuł nie vielmi heta padabałasia — Fierhiusan raspaviadaŭ, što jana nie raz pytałasia, navošta jon naohuł pryniaŭ hetaje zvańnie.
U 2007-m Keci paprasiła muža prapuścić dva tavaryskija matčy — z «Hlentaranam» i «Danfiermlinam», — bo joj patrebna była dapamoha ź pierajezdam. I Fierhi nikudy nie pajšoŭ.
«Ja skazaŭ joj, što ŭ mianie ŭ toj dzień byŭ matč, ale joj było ŭsio roŭna, — raspaviadaŭ jon. — Jana skazała, što heta ŭsiaho tolki tavaryskija matčy, i ja pavinien joj dapamahčy. Jana vyratavała mianie ad składanaha vybaru, bo moj baćka hulaŭ za «Hlentaran», a ja sam ciesna źviazany z «Danfiermlinam». Ja hulaŭ tam u najlepšy futboł u svajoj karjery da svajho pierachodu ŭ «Rejndžers».
Fierhiusan usio žyćcio byŭ udziačny Keci za toje, što jana padtrymlivała jaho kožny dzień, što z razumieńniem pryniała jaho luboŭ da futboła, choć za ŭsiu jaho karjeru jana tak i nie zmahła palubić hetuju hulniu.
Jaje razdražniali razmovy pra futboł — ser Aleks adnojčy raspavioŭ pra ich typovuju razmovu paśla taho, jak jon pryjšoŭ dadomu, pravioŭšy ŭvieś dzień na treniroŭcy.
«Ja prychodžu dadomu i kažu niešta pra hulniu. I ŭsio, što ja atrymlivaju ŭ adkaz, heta: «Aleks, maja pralnaja mašyna nie pracuje», — dzialiŭsia jon. — Keci prosta kazała: «Ni słova pra futboł. Jaki ŭ mianie byŭ dzień? Džejsan zrabiŭ heta, Daren zrabiŭ heta, a Mark — heta». A ŭ mianie, — pryznavaŭsia Fierhiusan, — hałava raskołvajecca, i ja ledź mahu razmaŭlać paśla taho, jak uvieś dzień kryčaŭ na hulcoŭ».
Ale ŭ hetym, napeŭna, i byŭ uvieś sakret jaho ščaścia. Ser Aleks nie raz kazaŭ, što Keci była klučavoj fihuraj na praciahu ŭsioj jaho karjery, i jon nievierahodna ŭdziačny, što žonka ciarpieła ŭsie jaho adsutnaści.
«Maja žonka była hatovaja pryniać hetuju achviaru, jana była vydatnaja, — kazaŭ jon. — Ja viedaju, viadoma, što nie kožnaja žonka pastupiła b hetak ža, ale jana razumieła maju apantanaść. Jana razumieła, čamu ja pavinien byŭ heta zrabić, što heta było ŭ majoj kryvi. A ja byŭ na kručku — ja nie moh syści z futboła. A jana ŭsim achviaravała dziela mianie»»
Druhoje žyćcio pačałosia z vychadam Fierhi na piensiju. «Upieršyniu za 40 hadoŭ ja śniedaŭ z žonkaj, i heta było kruta, — uspaminaŭ jon. — Ja zaŭsiody vychodziŭ z domu ŭ 6.20 ranicy abo kala taho. Na hety raz ja ŭklučyŭ naviny. Kali vy žanatyja amal 50 hadoŭ, razmoŭ nie tak šmat, paviercie mnie. Ale maja prysutnaść doma była važnaja».
U ich było dziesiać hadoŭ biez futboła. Zaraz seru Aleksu pryjdziecca vučycca žyć biez łedzi Keci.
Siońnia futbalisty «Mančester Junajted» vyjduć na matč z «Brentfardam» z žałobnymi paviazkami.
Vaskrasienski: Treba, kab Sikorski pryvioz padarunak Łukašenku. A Bialacki i 20 zavadataraŭ vyjduć apošnimi10
Kamientary