Były žurnalist Siarhiej Hardzijevič na voli, ale ŭ jaho zabrali srodki suviazi
Były palitźniavoleny žurnalist z Drahičyna vyjšaŭ na volu paśla 15 sutak administracyjnaha aryštu.
Jak paviedamlałasia raniej, Hardzijeviča zatrymali na pamiežnym pierachodzie «Brest» 14 vieraśnia, kali jon viartaŭsia z Polščy ŭ Biełaruś, nahadvaje BAŽ.
Były karespandent infarmacyjnaha sajta «Pieršy rehijon» stała žyvie ŭ Biełarusi i vyjazdžaŭ u Polšču pa asabistych spravach.
Padčas viartańnia na radzimu ŭ Siarhieja Hardzijeviča na miažy siłaviki zapatrabavali dla pravierki telefon. U vyniku na jaho skłali administracyjny pratakoł za raspaŭsiud ekstremisckich materyjałaŭ. Nahodaj tamu stali reposty publikacyj ŭ sacyjalnych sietkach, zroblenyja jašče ŭ 2020 hodzie.
Noč paśla zatrymańnia Hardzijevič pravioŭ u izalatary časovaha ŭtrymańnia, paśla čaho jaho pieravieźli ŭ Drahičyn. Administracyjnaja sprava razhladałasia 15 vieraśnia ŭ sudzie Drahičynskaha rajona. Jaho pryznali vinavatym u ździajśnieńni pravaparušeńnia pavodle art. 19.11 KaAP i pakarali aryštam na 15 sutak.
Adbyŭšy hety termin, Siarhiej Hardzijevič vyjšaŭ na volu, ale biez srodkaŭ suviazi. Telefon i inšuju techniku ŭ jaho zabrali padčas zatrymańnia.
Naprykancy kastryčnika 2022 hoda eks-žurnalist vyzvaliŭsia z papraŭčaj kałonii № 17 u Škłovie, dzie pravioŭ 1,5 hoda źniavoleńnia pa kryminalnaj spravie.
2 žniŭnia 2021 hoda sudździa Ivanaŭskaha rajona Hienadź Kudłasievič pryznaŭ Siarhieja Hardzijeviča vinavatym pavodle troch kryminalnych artykułaŭ:
- Abraza pradstaŭnikoŭ ułady ŭ suviazi z vykanańniem imi słužbovych abaviazkaŭ (art. 369 KK),
- Raspaŭsiud zahadzia iłžyvych i źnievažalnych inšych asob źviestak (paklop), jakija źmiaščajuć abvinavačavańnie ŭ ździajśnieńni ciažkaha złačynstva (art. 188 KK),
- Publičnaja abraza Łukašenki.
«Tania, my z taboj!» Ułady zapuścili fłešmob u padtrymku žančyny ŭ čyrvona-zialonym VIDEA27
Kamientary