Palina Šarenda-Panasiuk na sudzie zajaviła pra źbivańni i cisk u kałonii
U sudzie Rečyckaha rajona siońnia pačali razhladać čarhovuju kryminalnuju spravu suprać palitźniavolenaj Paliny Šarendy-Panasiuk. Palinu mielisia vypuścić na volu hod tamu, ale abvinavacili ŭ «złosnym niepadparadkavańni administracyi kałonii» (č. 2 art. 411 Kryminalnaha kodeksa) i dadali hod kałonii. Ale ŭletku Palina na volu nie vyjšła, suprać jaje zaviali spravu pavodle raniejšaha artykuła. Na sudzie žančyna zajaviła pra źbivańni ŭ zarečanskaj kałonii — byŭ mocna paškodžany tvar i ŭnutranyja orhany. Pa inicyjatyvie prakurora ŭ pracesie zrabili pierapynak da 9 kastryčnika, piša «Viasna».
Palinu zatrymali 3 studzienia 2021 hoda. Maci dvuch małych synoŭ abvinavacili pa šerahu artykułaŭ Kryminalnaha kodeksa: art. 364 (hvałt u adnosinach da supracoŭnikaŭ milicyi), art. 368 (abraza Łukašenki) i art. 369 (abraza pradstaŭnika ŭłady).
U červieni 2021 hoda sud Maskoŭskaha rajona Bresta pryznačyŭ žančynie dva hady pazbaŭleńnia voli ŭ kałonii va ŭmovach ahulnaha režymu.
U kancy lutaha 2022 hoda na palitźniavolenuju zaviali kryminalnuju spravu pa č. 2 art. 411 KK, a paźniej asudzili da jašče adnaho hoda kałonii. Palina — pieršaja palitźniavolenaja žančyna ŭ Biełarusi, asudžanaja pa hetym artykule. Na vyjaznym pasiadžeńni ŭ homielskaj kałonii 7 krasavika 2022 hoda aktyvistku asudzili jašče da adnaho hoda kałonii.
U červieni 2022 hoda joj pakinuli prysud bieź źmienaŭ i pieraviali ź SIZA u papraŭčuju kałoniju № 24.
Paśla prybyćcia ŭ kałoniju jaje źmiaścili ŭ ŠIZA, dzie jana praviała 80 sutak amal bieśpierapynna. Paśla hetaha jaje adpravili ŭ PKT na paŭhoda i zaviali novuju kryminalnuju spravu pavodle art. 411 KK.
Niadaŭna Palinu nakiravali na ekśpiertyzu ŭ Respublikanski centr psichičnaha zdaroŭja «Navinki». Etap tudy adbyvaŭsia praz «Vaładarku». Ale Palina admoviłasia ad ekśpiertyzy — jana nie razmaŭlała ź lekarami, admoviłasia prymać lubyja leki, a taksama admoviłasia zdavać lubyja vidy analizaŭ.
U vyniku Palinu terminova, śpiecetapam, adpravili na «Vaładarku» i litaralna praz paru načnych hadzin ź SIZA-1 jaje adpravili nazad u kałoniju № 24 u Zareččy. Paźniej źjaviłasia infarmacyja, što naprykancy červienia Palina była mocna źbitaja ŭ zarečanskaj kałonii.
Pavodle muža palitźniavolenaj Andreja Šarendy, siońnia na sudzie Palina publična paćvierdziła, što ŭ červieni jaje źbili inšyja źniavolenyja papraŭčaj kałonii № 24 pa navodcy administracyi.
Tady joj mocna paškodzili tvar i ŭnutranyja orhany. Taksama jana zajaviła pra žorstkija ŭmovy ŭ kałonii, izalatary časovaha ŭtrymańnia rečyckaha RAUS i ŭ homielskim SIZA ciaham hoda.
Akramia hetaha, jana raspaviała pra ŭmovy ŭtrymańnia ŭ rečyckim IČU: jana śpić na padłozie, bo joj nie vydali ni matraca, ni paścieli, a taksama zabrali ŭsie asabistyja rečy. Taksama jana nieadnarazova padkreślivała, što ŭsie parušeńni byli prosta farmalnaściu za jaje hramadzianskuju pazicyju.
Na pačatku pracesu Palina nahadała, što nie ličyć hety sud zakonnym i nie naležyć hetamu sudu, bo napisała admovu ad biełaruskaha hramadzianstva, a sam praces nazvała prosta farsam. Na siońniašni dzień paśpieli dać pakazańni ŭsie śviedki. Taksama paśpieła skazać svajo słova Palina.
Kali padyšli da sprečki bakoŭ, prakuror niečakana zaprasiŭ pieranos pasiadžeńnia na nastupny tydzień na 9 kastryčnika. Pazicyju svaju jon nie patłumačyŭ.
Pa słovach muža, Palina pieradała padziaku ŭsim ludziam, jakija padtrymali jaje za hety čas. Žančyna padkreśliła, što nie ličyć siabie źniavolenaj, a ličyć siabie vajennapałonnaj. Jaje fizičny stan adlustroŭvaje tyja žorstkija ŭmovy, u jakich jaje ŭtrymlivajuć.
Padtrymajcie palitźniavolenuju hrašovymi pieravodami, pasyłkami i telehramami:
IČU AUS Rečyckaha rajvykankama. 247483, Homielskaja vobł., h. Rečyca, vuł. Savieckaja, 35
Palina Siarhiejeŭna Šarenda-Panasiuk
U Rečycy pačynajecca sud nad Palinaj Šarendaj-Panasiuk. Jaje źbirajucca treci raz pakinuć za kratami
«Psichałahična Palina trymajecca, ale fizična jaje arhanizm vielmi asłableny» — zvarot Andreja Šarendy da arhanizacyj i nieabyjakavych ludziej
«Miech pabitych jabłyk ad nieviadomaha «dobrazyčliŭca». Stała viadoma, čamu nie dachodziać pieradačy da Paliny Šarendy-Panasiuk
Kamientary