Žyvyja ludzi bolš niepatrebnyja. Industryja K-pop pieršaj pierachodzić na vobrazy, stvoranyja štučnym intelektam
Dasiahnieńni ŭ vobłaści štučnaha intelektu dazvalajuć stvarać całkam ličbavyja hrupy pop-muzyki. Heta pryvodzić da značnych źmien u adnym z asnoŭnych ekspartnych siektaraŭ krainy.
Technałohii štučnaha intelektu znachodziać svajo ŭžyvańnie ŭ roznych śfierach. Nie zastałasia ŭbaku i muzyka. Technałohija OpenAI MuseNet z 2019 hoda piša muzyku, a OpenAI Jukebox z 2020 hoda dazvalaje stvarać muzyku z vakałam.
Paŭdniovakarejskaja kampanija Pulse9 raspracavała technałohiju Deep Real, jakaja stvaraje nie tolki virtualnych piersanažaŭ na asnovie štučnaha intelektu (ŠI), ale i taki kantent, jak sintezavanyja vyjavy abo videa. Jak paznačana na sajcie kampanii, technałohija stvaraje realistyčny vobraz niezaležna ad rasy, uzrostu i połu.
«Deep Real AI moža zrabić mahčymym sustreču z novymi virtualnymi ludźmi, virtualnymi znakamitaściami i ŭpłyvovymi dziejačami va ŭsim śviecie pa bolš razumnaj canie pa-za takimi abmiežavańniami, jak abmiežavańni pieramiaščeńnia, praciahłyja pieryjady vytvorčaści i vysokija ekspłuatacyjnyja vydatki», — adznačajuć raspracoŭščyki.
U sakaviku 2021 hoda kampanija prezientavała virtualny ajdał-hurt Eternity, jaki debiutavaŭ ź pieśniaj I'm Real. Usie 11 udzielnikaŭ hrupy byli stvoranyja štučnym intelektam. Z momantu vypusku svajho debiutnaha sinhła I'm Real u 2021 hodzie žanočy hurt K-pop Eternity nabraŭ miljony prahladaŭ u internecie.
Pieršapačatkova kampanija Pulse9 zhienieravała 101 fantastyčny tvar, padzialiŭšy ich na čatyry katehoryi ŭ adpaviednaści z nastupnymi typažami: miły, seksualny, niavinny i razumny. Fanataŭ paprasili prahałasavać. U adpaviednaści ź ich pieravahami dyzajniery kampanii raspracavali animacyju piersanažaŭ-pieramožcaŭ. Dla žyvych čataŭ, videa i anłajn-sustreč z fanatami robicca prajekcyja avataraŭ na ananimnych śpievakoŭ, akcioraŭ i tancoraŭ, jakija zaklučyli kantrakt z Pulse9.
«Eternity siłkujecca tolki elektryčnaściu», — iranizuje ŭ intervju Le Monde Pak Čžy-yn (Park Ji-eun), hienieralny dyrektar Pulse9. Jana taksama adznačaje, što na hety momant avatary Pulse9 nie całkam vycieśnili realnych artystaŭ:
«Nam usio jašče patrebnyja ludzi dla chareahrafii ci sustreč z fanatami, jakija jość nieadjemnaj častkaj žyćcia hurta K-pop. Dla Zae-in (Zae-in), zorki hrupy, my vykarystoŭvajem dziesiać akcioraŭ i tancoraŭ. Ale naša nastupnaja meta — zrabić usio na kampjutary».
Eternity demanstruje chutkaść prahresu ŠI, jaki prapanuje biaskoncyja mahčymaści. Bolš niama nieabchodnaści doŭhija hady vučyć moładź u akademijach, a paśla jany straciać hołas ci fizičnuju formu.
«Skandał, zładžany sapraŭdnymi zorkami K-pop, moža być cikavym, ale heta taksama i ryzyka dla biznesu», — kazała hienieralnaja dyrektarka ŭ intervju Bi-bi-si ŭ kancy minułaha hoda.
Jana ličyć, što zmoža efiektyŭna vykarystoŭvać hetyja novyja technałohii i źvieści da minimumu ryzyku dla artystaŭ K-pop, jakija časta pieranapružvajucca i znachodziacca pad ciskam nieabchodnaści nie adstavać ad patrabavańniaŭ industryi.
Tendencyja da virtualizacyi nie novaja. Ličbavyja dvajniki zorak užo isnujuć. Tak, u 2022 hodzie ich prezientavała piać samych papularnych hurtoŭ K-pop. Vykarystańnie virtualnych kopij samich siabie dazvalaje im mieć znosiny z fanatami ŭ roznych časavych pajasach i moŭnych barjerach — toje, čaho artysty z płoci i kryvi nikoli nie zmahli b zrabić.
21 lipienia hetaha hoda žurnalisty sajta Kpopmap, jaki śpiecyjalizujecca na K-rop, zmahli pahutaryć z avataram repiera Marka Tuana (Mark Tuan), stvoranym z dapamohaj štučnaha intelektu. I «ličbavy Mark» padajecca bolš realistyčnym, čym sapraŭdny. Jon moža čytać vyrazy tvaru i reahavać adpaviednym čynam, naprykład, humaram, na nastroj svajho surazmoŭcy.
Jak kažuć śpiecyjalisty industryi, virtualnyja zorki i hurty bolš hnutkija ŭ vykarystańni, čym ludzi. Jany nie tolki ekanamična, ale i pa-mastacku cikavyja.
Pa danych analityčnaha centra Emergen Research, suśvietny rynak avataraŭ i ličbavych piersanažaŭ moža dasiahnuć abarotu kala 527,6 miljarda dalaraŭ (481 młrd jeŭra) u 2030 hodzie ŭ paraŭnańni z 10,03 miljarda ŭ 2020 hodzie.
Chit na šaści movach
Novy virtualny suśviet K-pop patrabuje novych techničnych navykaŭ, jakich niama ŭ pradziusarskich ahienctvaŭ. Jak adznačaje Le Monde, lidar K-pop haliny, ahienctva Hybe ŭ kancy studzienia 2023 hoda nabyło kantrol nad startapam Supertone, jaki śpiecyjalizujecca na hałasach, jakija hienierujucca ŠI.
Heta dazvoliła ahienctvu zapuścić klip realnaha śpievaka Midnatt ź pieśniaj, vykananaj na šaści movach: karejskaj, kitajskaj, anhlijskaj, japonskaj, ispanskaj i vjetnamskaj. Dla hetaha byŭ uziaty hołas śpievaka i adaptavany dla hetych moŭ. Technałohija startapu moža być užytaja na ŭsich etapach vytvorčaści: ad płanavańnia da raspaŭsiudžvańnia praz redahavańnie.
Kab abyści ciažkaść realizmu, jak adznačajuć žurnalisty Le Monde, niekatoryja kampanii robiać staŭku na multfilmy. Heta vypadak ź virtualnym bojz-bendam Plave, stvoranym startapam Vlast. Prajekt, jaki debiutavaŭ u sakaviku hetaha hoda, maje vializny pośpiech dziakujučy ŭzajemadziejańniam z fanatami ŭ humarystyčnym klučy.
Virtualny bojz-bend navat daje vuličnyja kancerty na vialikim ekranie. Vydumanyja piersanažy prajhravajuć ruchi realnych tancoroŭ, jakija ŭ hety čas tancujuć u studyi.
Baraćba za virtualny śviet
Adzin ź lidaraŭ raspracoŭki ličbavaha kantentu ŭ Paŭdniovaj Karei — internet-kampanija Kakao, jakaja raspracoŭvaje veb-komiksy i veb-navieły.
Kampanija Kakao razam z Metaverse Entertainment (daččynaj kampanijaj, zasnavanaj u 2021 hodzie hihantam videahulniaŭ Netmarble) inviestavała 8,3 miljona jeŭra ŭ zapusk virtualnaj žanočaj hrupy Mave. Členy hrupy ciapier hieraini vebtuna, jaki raskazvaje ich historyju. Takim čynam, Kakao Entertainment pracuje nad abjadnańniem muzyki, sieryjałaŭ i vebtunaŭ.
Śpiecyjalisty adznačajuć, što prajekt Mave davieryli Metaverse, tamu što videahulni stanoviacca sercam zabaŭ. Kampanija praviała apytańnie, jakoje pakazvaje, što maładyja ludzi va ŭzroście ad 12-ci da 15-ci hadoŭ adkryvajuć dla siabie muzyku ŭ hulniach, a zusim nie na YouTube ci telebačańni.
Hetyja padziei radykalna źmianiajuć industryju zabaŭ i K-kulturu. «My ŭstupajem u epochu vialikaj niavyznačanaści sa ściortymi miežami pamiž roznymi halinami. Siońnia navat u śfiery adukacyi nieabchodnyja zabavy», — adznačaje Pak Čžy-yn z Pulse9.
U toj ža čas, jak adznačajuć śpiecyjalisty, niahledziačy na značny pośpiech takich virtualnych hurtoŭ, jak Plave abo Eternity, dalejšaje raspaŭsiudžvańnie virtualnaha asiarodździa moža pavialičyć kaštoŭnaść čałavieka. U budučyni buduć suisnavać virtualny i realny śviety K-pop z roznymi kaštoŭnaściami.
Čytajcie jašče:
Halivudskaja «navatarskaja» ŠI-prapanova dla akcioraŭ hučyć jak scenar dla fantastyčnaha filma
Meta vypuściła ŭłasny hienieratar muzyki na bazie ŠI
U Hiermanii carkoŭnuju słužbu ŭpieršyniu pravioŭ štučny intelekt
Tur patłumačyŭ, što Łukašenka mieŭ na ŭvazie, kažučy pra pryznačeńnie dyrektaraŭ u pryvatnyja kampanii4
Kamientary