Zrynuty prezident Nihiera: Uvieś rehijon moža padpaści pad upłyŭ Rasii i PVK «Vahnier»
Zrynuty vajskovaj chuntaj prezident Nihiera Machamied Bazum praz hazietu zaklikaŭ ZŠA i inšyja krainy dapamahčy jamu ŭ adnaŭleńni kanstytucyjnaha paradku i zajaviŭ, što kali putčysty zastanucca va ŭładzie, to ŭvieś rehijon Centralnaha Sachiela moža akazacca pad upłyvam Rasii ŭ asobie PVK «Vahnier», piša Bi-bi-si.
«U hetuju ciažkuju hadzinu ja zaklikaju ŭrad Złučanych Štataŭ i ŭsiu mižnarodnuju supolnaść dapamahčy nam u adnaŭleńni kanstytucyjnaha paradku», — napisaŭ Machamied Bazum u kałoncy ŭ amierykanskaj haziecie The Washington Post, jakuju jon pačaŭ słovami «Ja pišu hetyja radki jak zakładnik».
U svaim zakliku Machamied Bazum asabliva adznačaje, što vajskovaja chunta Nihiera choča, jak i chunty susiednich Mali i Burkina-Faso, zaprasić da siabie rasijskuju PVK «Vahnier» zamiest francuzaŭ i amierykancaŭ, jakija dahetul dapamahali Nihieru zmahacca z hrupoŭkami isłamskich radykałaŭ.
«Uvieś rehijon Centralnaha Sachiela moža trapić pad rasijski ŭpłyŭ praz hrupu «Vahnier», čyje žorstkija terarystyčnyja mietady byli nahladna prademanstravanyja va Ukrainie», — piša Bazum.
Zrynuty prezident zajaŭlaje, što, nasupierak śćviardžeńniam vajskoŭcaŭ-putčystaŭ, dziakujučy dapamozie ZŠA i Francyi, žyć u Nihiery ŭ apošnija dva hady stała značna biaśpiečniej: vyłazki isłamisckich hrupovak na poŭdni, zachadzie i poŭnačy krainy amal spynilisia.
Machamied Bazum — pieršy prezident Nihiera, jaki mirna źmianiŭ papiaredniaha lidara krainy na demakratyčnych vybarach u 2021 hodzie.
Sieniehał hatovy da interviencyi
Tym časam Sieniehał abviaściŭ, što hatovy pasłać vojski ŭ Nihier, kali tak vyrašyć aljans krain Zachodniaj Afryki ECOWAS. U kancy minułaha tydnia lidary krain ECOWAS pryhrazili putčystam Nihiera interviencyjaj, kali jany na praciahu tydnia nie viernuć uładu prezidentu Bazumu.
Jak paviedamlaje ahienctva AFP, ministarka zamiežnych spraŭ Sieniehała Ajsata Tał Sał skazała žurnalistam, što jašče adzin vajskovy pieravarot u rehijonie — heta ŭžo zanadta, i tamu sieniehalskija vajskoŭcy hatovyja adpravicca ŭ Nihier.
U niadzielu sotni demanstrantaŭ sabralisia la budynka francuzskaj ambasady ŭ Nijamiei, niekatoryja skandavali: «Niachaj žyvie Rasija», «Niachaj žyvie Pucin» i «Dałoŭ Francyju».
Jany taksama padpalili ścieny pasolskaha kompleksu.
Pry hetym u svaim vystupie hienierał Čyjani zajaviŭ, što francuzskija hramadzianie ŭ Nihiery nikoli nie padviarhalisia «nijakaj pahrozie».
Nihier, dzie znachodziacca vajskovyja bazy Francyi i ZŠA, — adzin z klučavych sajuźnikaŭ Zachadu ŭ baraćbie z džychadzisckim ekstremizmam u Sachieli.
Paśla taho, jak u 2021 hodzie vajskovaje kiraŭnictva susiedniaj Mali pryniało rašeńnie ab supracoŭnictvie z rasijskaj PVK «Vahnier», Francyja pieraniesła centr svaich rehijanalnych kontrterarystyčnych apieracyj u Nihier.
Nihier — bujny vytvorca ŭranu. Kraina lažyć na asnoŭnym maršrucie mihracyi ŭ Paŭnočnuju Afryku i Mižziemnamorje.
Što za čamadan nosić kala Łukašenki jahony achoŭnik? Nie, tam nie jadziernaja knopka20
Kamientary