«Fiadynič narmalna, a voś u Areški prablemy» — nieviasiołyja naviny ad palitźniavolenych praflidaraŭ

Alaksandr Jarašuk, Siarhiej Antusievič i buchhałtarka Iryna But-Husaim byli zatrymany 19 krasavika 2022 hoda.

Ich abvinavacili ŭ dziejańniach, jakija hruba parušajuć hramadski paradak (č.1 art. 342), a Jarašuka taksama — u zaklikach da mier abmiežavalnaha charaktaru, inšych dziejańniach, nakiravanych na pryčynieńnie škody nacyjanalnaj biaśpiecy Respubliki Biełaruś (č.3 art. 361).

U vyniku Alaksandr Jarašuk asudžany na 4 hady kałonii, Siarhiej Antusievič — na 2 hady, Iryna But-Husaim — na 1,5 hoda kałonii.

U studzieni hetaha hoda taksama vynieśli prysudy jašče niekalkim prafsajuznym dziejačam: Hienadź Fiadynič i Vasil Bieraśnioŭ atrymali pa 9 hadoŭ pazbaŭleńnia voli va ŭmovach uzmocnienaha režymu, Vacłaŭ Areška — 8 hadoŭ.

Sproby asprečyć prysudy praź Viarchoŭny sud vyniku nie prynieśli. Takim čynam, źmiakčyć rašeńni papiarednich sudovych instancyj nikomu nie ŭdałosia. Da razhladu apielacyj fihuranty «prafsajuznaj spravy» znachodzilisia ŭ roznych SIZA, paśla čaho ich nakiravali ŭ kałonii.

Hienadź Fiadynič, naprykład, znachodzicca ŭ Babrujskaj kałonii, Alaksandr Jarašuk i Vacłaŭ Areška — u Škłoŭskaj PK №17, Siarhiej Antusievič — u Mahiloŭskaj papraŭčaj ustanovie.

Blizkija Alaksandra Jarašuka pa-raniejšamu admaŭlajucca razmaŭlać z pradstaŭnikami ŚMI, ličać, što «heta moža naškodzić Alaksandru Iljiču».

Tym nie mienš, pavodle niekatoraj infarmacyi, trymajecca jon badziora, chacia sa zdaroŭjem jość peŭnyja prablemy.

«Blizkija Hienadzia Fiadyniča čakajuć ź im u žniŭni karotkaterminovaha spatkańnia, — kažuć siabry prafsajuznych dziejačaŭ. — 31 lipienia Hienadziu Fiodaraviču spoŭnicca 66 hadoŭ, tamu sustreča z rodnymi budzie cudoŭnym padarunkam da dnia naradžeńnia. Chacia i ź nievialikim spaźnieńniem.

Naturalna, što ŭzrost u Fiadyniča taki, što lepš pravodzić čas na leciščy ci ŭ sanatoryi, ale dobra jašče, što apošnim časam u jaho niama ŭ kałonii abvastreńnia starych chvarobaŭ. Jak viadoma, u Hienadzia Fiodaraviča — cukroŭka, ale pačuvajecca jon bolš-mienš narmalna».

Byłyja kalehi Fiadyniča miarkujuć, što ŭ kałonii jon nie pracuje, bo znachodzicca na piensii, chacia dakładnaj infarmacyi pra heta niama.

«Nakolki viadoma, u Vasila Bieraśniova taksama płanujecca spatkańnie ź blizkimi, a voś u Vacłava Areški — prablemy, — dadajuć surazmoŭcy. — Pa-pieršaje, u jaho dosyć drenny zrok, jaki tolki horšaje. Svajho času na vačach jamu navat rabili apieracyju. Pa-druhoje, Vacłavu pa-raniejšamu dajuć spahnańni, a tamu zabaraniajuć i sustrečy, i pieradačy».

• 1
• 1
• 1
• 0
• 1
• 10