Rasijskija chakiery sprabavali spakusić supracoŭnikaŭ ambasadaŭ va Ukrainie rekłamaj tannaha BMW
Chakiery, jakich padazrajuć u pracy na rasijskuju słužbu zamiežnaj vyviedki, atakavali noŭtbuki i telefony dziasiatki dypłamataŭ u ambasadach u Kijevie z dapamohaj trajana, zamaskiravanaha pad rekłamu patrymanych aŭtamabilaŭ. Pra heta havorycca ŭ spravazdačy firmy kibierbiaśpieki, da jakoj atrymała dostup ahienctva Reuters.
Šyrokamaštabnaja špijonskaja dziejnaść była skiravanaja suprać dypłamataŭ, jakija pracujuć prynamsi ŭ 22 z prykładna 80 zamiežnych pradstaŭnictvaŭ u Kijevie, jak havorycca ŭ dakumiencie firmy Unit 42, jaki apublikujuć paźniej.
Usio pačałosia z davoli biaskryŭdnaj padziei: sioleta ŭ siaredzinie krasavika dypłamat Ministerstva zamiežnych spraŭ Polščy (imia nie nazyvajecca ź mierkavańniaŭ biaśpieki) adpraviŭ pa elektronnaj pošcie zakonnyja ŭlotki ŭ roznyja ambasady z rekłamaj prodažu patrymanaha siedana BMW 5-j sieryi, jaki znachodzicca ŭ Kijevie.
Chakiery, viadomyja jak APT29 abo Cozy Bear, pierachapili i skapijavali hetuju ŭlotku, ukaranili ŭ jaje škodnickaje prahramnaje zabieśpiačeńnie (PZ), a potym adpravili jaje dziasiatkam inšych zamiežnych dypłamataŭ, jakija pracujuć u Kijevie.
Polski dypłamat skazaŭ, što adpraviŭ abjavu ŭ niekalki ambasadaŭ u Kijevie i niechta jamu pieratelefanoŭvaŭ, bo cana vyhladała «pryvabnaj».
Adnak u pracesie razmovy vyśvietliłasia, što zacikaŭlenyja asoby havorać pra bolš nizkuju canu, čym była ŭ abviestcy. Jak vyjaviłasia, chakiery ŭ svajoj falšyvaj viersii abjavy admysłova pakazali BMW dypłamata pa bolš nizkaj canie — 7500 jeŭra, — sprabujučy takim čynam zaachvocić bolš ludziej zahružać škodnickaje PZ, jakoje dało b addaleny dostup da pryładaŭ.
Prahramnaje zabieśpiačeńnie zamaskiravali pad albom fatahrafij patrymanaha BMW: sproby adkryć hetyja fatahrafii zaražali kampjutar achviary.
Pradstaŭnik Dziarždepartamienta ZŠA zajaviŭ, što jany «viedali pra hetu dziejnaść i na padstavie analizu Upraŭleńnia kibierbiaśpieki i technałahičnaj biaśpieki pryjšli da vysnovy, što jana nie zakranuła sistem abo ŭlikovych zapisaŭ Departamienta».
Chto takija APT29, abo Cozy Bear
U 2021 hodzie śpiecsłužby ZŠA i Vialikabrytanii identyfikavali APT29 jak padraździaleńnie Słužby zamiežnaj vyviedki Rasii (SZV). U krasaviku polskija orhany kontrvyviedki i kibierbiaśpieki papiaredzili, što hetaja hrupa praviała «šyrokamaštabnuju vyviedvalnuju kampaniju» suprać krain — siabroŭ NATO, Jeŭrapiejskaha sajuza i Afryki.
Daśledčyki z Unit 42 źviazvajuć falšyvuju rekłamu aŭtamabila sa SZV Rasii, tamu što chakiery vykarystoŭvali takija ž instrumienty i mietady, jakija raniej źviazvali sa špijonskim ahienctvam.
Čytajcie jašče:
U ZŠA rychtujuć zakon suprać rasijskich chakieraŭ
Nazvali pryčynu, pa jakoj adbyłasia ŭciečka źviestak adrazu ŭ niekalkich biełaruskich kampanij
Viarnuŭsia z vajny, uładkavaŭsia ŭ Varšavie, pasvaryŭsia z usimi — i źnik. Pryjacieli pra eks-kalinoŭca Maksima Ralko, jakoha zatrymali ŭ Biełarusi1919
Kamientary