Ź Biełaruskaha dziaržaŭnaha teatra lalek zvalniajuć hałoŭnaha režysiora — suśvietna viadomaha
Čynoŭniki nie praciahnuli kantrakt z hałoŭnym režysioram Biełaruskaha dziaržaŭnaha teatra lalek Alaksiejem Lalaŭskim. Pra heta redakcyi «Lusterka» paviedamili čytačy.
Lalaŭski dapracoŭvaje lipień, paśla čaho pakinie svaju pasadu.
Alaksiej Lalaŭski naradziŭsia ŭ 1957 hodzie ŭ Minsku.
Jon — syn Anatola Lalaŭskaha, adnaho z zasnavalnikaŭ Biełaruskaha teatra lalek.
Lalaŭski-małodšy skončyŭ Biełaruski teatralna-mastacki instytut. U 1979—1982 hadach pracavaŭ režysioram i pamočnikam hałoŭnaha režysiora pa litaraturnaj častcy Biełaruskaha dziaržaŭnaha teatra lalek u Minsku. U 1982—1986 hadach — hałoŭny režysior Mahiloŭskaha teatra lalek. U 1986—1996 i z 1998 hoda — hałoŭny režysior Biełaruskaha dziaržaŭnaha teatra lalek.
Pastaviŭ bolš za 100 śpiektaklaŭ. Siarod ich «Majstar i Marharyta» pa Bułhakavu, «Tarciuf» Ž.-B. Maljera, «Draj šviestern», «Čajka. Vopyt pračytańnia» i «Z Paryžam skončana!..» pavodle pjes Čechava; «Ładździa rospačy» Karatkieviča, «Hanele» Haŭptmana, «Dzied i žuraviel» Volskaha, «Čamu starejuć ludzi?..» Viarcinskaha.
Pracavaŭ u Rasii, Polščy, Bośnii i Hiercahavinie, Hiermanii, Niderłandach, Litvie, Słavienii.
Kiraŭnik mižnarodnych tvorčych majsterniaŭ teatra lalek u Bielhii, Finlandyi, Polščy, Hiermanii i Iranie.
Byŭ mastackim kiraŭnikom Mižnarodnaha fiestyvalu teatraŭ lalek u Minsku. Zasłužany dziejač mastactvaŭ Respubliki Biełaruś.
Lalaŭski — adzin z samych viadomych biełaruskich režysioraŭ u śviecie.
Jak adznačajuć śpiecyjalisty, Lalaŭski — «adzin z tych režysioraŭ, z čyim imiem źviazany novy etap raźvićcia biełaruskaha teatra lalek, jaho vychad na mižnarodny ŭzrovień.
Raniej, vosieńniu 2022 hoda, na piensiju adpravili Jaŭhiena Klimakova, jaki z 1985 hoda byŭ dyrektaram Biełaruskaha dziaržaŭnaha teatra lalek.
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary8
Kamientary