Byłoha pradstaŭnika AAN u Biełarusi abvinavacili ŭ seksualnych damahańniach

Pastajanny kaardynatar AAN na Fidžy, Sałamonavych vyspach, Tonha, Tuvału i Vanuatu 56-hadovy Sanaka Samarasincha znachodzicca ŭ administracyjnym adpačynku z poŭnym zachavańniem zarpłaty, i arhanizacyja paviedamlaje, što jana atrymała skarhi na mahčymyja niezdavalniajučyja pavodziny (unsatisfactory conduct) mižnarodnaha čynoŭnika.

«Administracyjny adpačynak — heta administracyjnaja, a nie dyscyplinarnaja miera», — havorycca ŭ zajavie ofisa AAN dla RNZ Pacific.

U tłumačeńni rehijanalnaha ofisa AAN havorycca, što na Samarasincha pastupili skarhi za mahčymyja niezdavalniajučyja pavodziny, i hetaje pytańnie ciapier razhladajecca i «razhladajecca vielmi surjozna».

«Usie naležnyja pravavyja pracedury buduć vykonvacca. Uličvajučy patrabavańni pryvatnaści, nijakaja inšaja infarmacyja ab pracesie nie moža być ahučana», — zajavili vydańniu ŭ rehijanalnym ofisie.

Pavodle infarmacyi žurnalistaŭ, elektronnyja pryłady Samarasincha byli kanfiskavanyja, a taksama jamu zahadali pakinuć krainu.

Žurnalist RNZ Pacific Kielvin Entani dla vydańnia Asia Pacific Reporie ŭdakładniŭ, što havorka idzie pra abvinavačańnie ŭ seksualnych damahańniach. Adzin z zajaŭnikaŭ raspavioŭ, što Samarasincha prasiŭ vydalić ich elektronnuju pierapisku.

Pavodle infarmacyi žurnalistaŭ, adna sa skarhaŭ datyčyć epizodu na aficyjnym dypłamatyčnym pryjomie ŭ Viarchoŭnaj kamisii Novaj Ziełandyi na Fidžy ŭ lutym hetaha hoda, dzie mižnarodny čynoŭnik u pjanym vyhladzie damahaŭsia zajaŭnika.

Sanaka Samarasincha admoviŭsia kamientavać žurnalistam vystaŭlenyja abvinavačańni i prapanavaŭ pa kamientary źviartacca ŭ AAN.

«Choć ja vielmi chaču adkazać bolš poŭna, praviły AAN zabaraniajuć mnie, jak supracoŭniku, heta rabić, tamu, kali łaska, źviarniciesia ŭ ofis AAN», — skazaŭ jon.

U ofisie AAN zajavili, što termin paŭnamoctvaŭ Samarasincha ŭ jakaści kaardynatara-rezidenta zakančvajecca ŭ hetym hodzie i jaho pierajemnik užo abrany i budzie pradstaŭleny ŭradu Fidžy «dla ŭzhadnieńnia z krainaj znachodžańnia».

Rehijanalny pradstaŭnik Viarchoŭnaha kamisara AAN pa pravach čałavieka ŭ Cichaakijanskim rehijonie Chajkie Alefsien pryznačanaja časovym kaardynataram-rezidentam AAN na pieryjad rasśledavańnia.

Pavodle infarmacyi Reform.by, anałahičnyja pavodziny mižnarodnaha čynoŭnika adznačalisia padčas jaho pracy ŭ Biełarusi, adnak miascovy piersanał nie advažvaŭsia apublikavać fakty. Pasadu Pastajannaha kaardynatara AAN/Pastajannaha pradstaŭnika PRAAN u Biełarusi Samarasincha zajmaŭ z 2015 pa 2018 hady.

• 1
• 4
• 2
• 0
• 1
• 4