Doktarka-ŭkrainka dapamahaje represavanamu biełarusu, jakomu pahražaje paralič. Ale jamu patrebna i naša dapamoha
Padčas źniavoleńnia ŭ 2020 hodzie ŭ žychara Stoŭbcaŭ Vitala Tysieva abvastryłasia chraničnaje zachvorvańnie. Paśla ŭciokaŭ ź Biełarusi lekary dyjahnastavali ŭ jaho surjoznuju prablemu. Kali za dva miesiacy Vitalu nie zrobiać apieracyju, jaho moža paralizavać, piša «Radyjo Svaboda».
U Biełarusi Tysieŭ u vyšuku. Na jaho zaviali kryminalnuju spravu pavodle «narodnaha artykuła» (art. 342 KK, arhanizacyja ci ŭdzieł u dziejańniach, jakija hruba parušajuć hramadski paradak). Vital udzielničaŭ u pratestach u rodnych Stoŭbcach.
Šmat hadoŭ tamu ŭ Vitala była traŭma chrybietnika. Ale jana dazvalała jamu žyć i pracavać. Składanaści pačalisia ŭ 2020 hodzie, kali aryšt u izalatary spravakavaŭ zapaleńnie. Paboi jon prosta pieralažaŭ, da lekaraŭ nie źviartaŭsia, bo bajaŭsia, što heta stvoryć kłopaty dla siamji.
«Heta byŭ jak udar pa staroj traŭmie, jakuju, darečy, biełaruskija lekary nie dyjahnastavali pravilna. Tolki ŭ Polščy ja daznaŭsia, što ŭ mianie była nie prosta niejkaja traŭma, u mianie byŭ złamany chrybietnik», — raskazvaje Vital.
U žniŭni 2020 hoda Vitala zatrymali padčas pratestaŭ i žorstka źbili. U jaho pačaŭ raźvivacca ahresiŭny ankiłazujučy spandylit (aŭtaimunnaja chvaroba złučalnaj tkanki), zraślisia ŭsie sustavy chrybietnika i roznyja inšyja sustavy.
U 2020 hodzie ŭ Vitala pačaŭsia vialiki zapalenčy praces. Ciapier jon pakutuje ad mocnych bolaŭ. Dyjahnaz lekaraŭ u Biełarusi — asteachandroz — akazaŭsia pamyłkovy. Ale i ŭ Polščy prablemu vyjavili nie adrazu. Spačatku paličyli, što ŭ Vitala prosta kryvaja šyja.
Tym nie mienš, u Polščy biełarus atrymaŭ hrupu invalidnaści. Ale pracavać musić, bo nie chapaje srodkaŭ na žyćcio. Pracuje Vital pa svajoj śpiecyjalnaści, ź mietałakanstrukcyjami — jon tokar-frezieroŭščyk. Heta tolki paharšaje situacyju sa zdaroŭjem.
Kab arhanizm dalej moh funkcyjanavać, treba pastavić impłant na ŭvieś chrybietnik. Polskija lekary hatovyja zrabić Vitalu takuju apieracyju ŭ adnoj z varšaŭskich klinik. Ale jaho strachoŭka takuju praceduru nie pakryvaje.
«Rachunak mnie vystavili na 81 281 złoty (bolš za 17 tysiač jeŭra). Heta papiaredniaja suma. Skazali, što kali zaciahnuć, to praz dva miesiacy moža być paralizacyja. Sabrać takuju sumu ja nie mahu, bo zarablaju 3000 złotych. Daviadziecca brać kredyt. Ale prablema ŭ tym, što paŭhoda paśla apieracyi ja budu lažać, a pracavać nie zmahu ŭvohule dva hady», — praciahvaje Vital.
Raniej Vitalu dapamoh fond BySol. Sabranyja 1,7 tysiačy jeŭra jon patraciŭ na dyjahnostyku. Byŭ varyjant zrabić jaje biaspłatna, ale čakać u čarzie daviałosia b jašče ceły hod.
Vitalom apiakujecca i dapamahaje jamu byłaja vajskovaja lekarka z Ukrainy Natalla. Jana taksama žyvie ŭ Ščecinie, najmaje pakoj u toj samaj kvatery, dzie žyvuć i Vital z žonkaj. Va Ukrainie Natalla była lekarkaj vyšejšaj katehoryi, pracavała namieśnicaj zahadčyka reanimacyi. Dapamahać Vitalu stała dla jaje spravaj honaru.
«Jość simptomy, jakija mianie mocna naściarožvajuć. Unačy ŭ jaho jość simptamatyčnyja spynieńni sardečnaj dziejnaści, jakija pierachodziać u arytmiju. U jaho taki zhib pazvanočnika, kali ścisnutaje serca. Jaho hałava praktyčna nie ruchajecca. Jość prablemy z hłytańniem. To-bok ciažkuju ježu pieražoŭvać jon nie ŭ stanie. U asnoŭnym charčavańnie idzie praz błendar. Atłant (pieršy šyjny pazvanok. — RS) u jaho ścisnuty nastolki, što padciskaje stravavod. Z atłantam ciapier vialikaja prablema», — raskazvaje Natalla.
Steroidnyja i niesteroidnyja preparaty ŭžo vyprabavali, jany nie pracujuć, dadaje Natalla. Arhanizm Vitala chutka pryvykaje da luboha preparatu.
«10 dzion, maksimum miesiac, i jon pierastaje dziejničać. Bolevy sindrom zdymajecca maksimalna na 2 hadziny. Zdarajucca pravały ŭ pamiaci», — kaža Natalla.
Źbirać achviaravańni na pryvatny rachunak ličycca ŭ Polščy machlarstvam. Na dapamohu pryjšli ščecinskija biełarusy, i zbor pačaŭsia na rachunak arhanizacyi «Čabor» praz polskuju kraŭdfandynhavuju płatformu Zrzutka.pl. Sabranyja srodki pojduć na apłatu špitalizacyi. Natalla płanuje paśla apieracyi zabrać Vitala sa špitala raniej, kab dahladać doma i tak aščadzić hrošy.
Vialiki kavałak svajho volnaha času Natalla pravodzić ź Vitalom užo ciapier. Jana supravadžaje jaho na kansultacyjach ź lekarami. Navat pracu šukała i znajšła niepadalok ad domu, kab paśpieć dabiehčy za 10 chvilin, kali što zdarycca.
«Mianie ździŭlajuć paproki, čamu ŭkrainka dapamahaje biełarusu. A ja takoje ŭžo čuła. Kazali mnie, navošta jon vam, jon ža biełarus. Mnie heta nijak nie zaminaje. U bolu i dyjahnazu niama nacyjanalnaści. Ja žyvu pa pryncypie: «Rabi dabro i kidaj u vadu». Tym bolš ja vajskovy lekar. Ja bačyła i bolš strašnyja rečy», — dadaje žančyna.
Apieracyja ŭ varšaŭskaj klinicy Carolina čakajecca ŭ kancy krasavika. Siamja Vitala i Natalla spadziajucca sabrać chacia b častku sumy.
Dapamahčy čałavieku možna pa hetaj spasyłcy.
Što aznačaje zahadkavy kod R99 u pryčynach śmierci Uładzimira Makieja i Vitolda Ašurka?5
Kamientary