Jeŭraparłamient vykazaŭ škadavańnie ab vizicie Sijarta i asudziŭ novyja prysudy ŭ Biełarusi
Jeŭraparłamient pryniaŭ čarhovuju rezalucyju pa situacyi ŭ Biełarusi. U joj vykazvajecca asudžeńnie novych palityčna matyvavanych prysudaŭ, u tym liku pastanovy ŭ spravach nobieleŭskaha łaŭreata Alesia Bialackaha i pravaabaroncaŭ «Viasny», Andreja Pačobuta, zavočnaha pracesu nad Śviatłanaj Cichanoŭskaj, Paŭłam Łatuškam i čalcami Kaardynacyjnaj rady, piša Reform.by.
U rezalucyi taksama ŭtrymlivajecca asudžeńnie pieraśledu biełaruskimi ŭładami polskaj i litoŭskaj nacyjanalnych mienšaściaŭ.
Jeŭradeputaty jašče raz zaklikali da vyzvaleńnia ŭsich palitviaźniaŭ u Biełarusi, vypłaty im kampiensacyj. Taksama parłamientaryi čarhovy raz asudzili padtrymku biełaruskimi ŭładami ahresii Rasii suprać Ukrainy.
Jeŭradeputaty vykazali rasčaravańnie tym, što Biełaruś nie była ŭklučana ŭ 10-y pakiet sankcyj ES. Jany vykazalisia za ŭviadzieńnie žorstkich restrykcyj u dačynieńni da aficyjnaha Minska, u tym liku za sankcyi suprać kalijnaj haliny, jakaja ŭ rezalucyi nazvanaja asnoŭnaj krynicaj dachodu ŭład. Akramia taho, jeŭradeputaty ličać nieabchodnym uklučyć u sankcyjnyja śpisy sudździaŭ, prakuroraŭ, supracoŭnikaŭ turmaŭ i papraŭčych ustanoŭ i zabiaśpiečyć naležnaje vykanańnie sankcyj.
U rezalucyi taksama padkreślivajecca nieabchodnaść usiebakovaha rasśledavańnia złačynstvaŭ, učynienych režymam Łukašenki suprać naroda Biełarusi, i ŭtrymlivajecca zaklik da krain ES aktyŭna ŭžyvać pryncyp univiersalnaj jurysdykcyi i rychtavać sudovyja spravy suprać biełaruskich čynoŭnikaŭ.
Jeŭradeputaty taksama vitali adkryćcio ŭ Brusieli misii demakratyčnych sił Biełarusi i zaklikali instytuty Jeŭrasajuza padtrymać hetaje pradstaŭnictva, jak i narodnyja pasolstvy. Parłamientaryi zaklikali Jeŭrakamisiju stvaryć pracoŭnuju hrupu i pačać pradmietny dyjałoh z pradstaŭnikami demsił pa asnovach supracoŭnictva ź Biełaruśsiu paśla padzieńnia režymu Łukašenki.
U dakumiencie taksama vykazvajecca škadavańnie z nahody vizitu ministra zamiežnych spraŭ i handlu Vienhryi Pietera Sijarta ŭ Minsk 13 lutaha hetaha hoda. Zajaŭlena, što jon supiarečyć palitycy ES u dačynieńni da Biełarusi i Rasii. Taksama Jeŭraparłamient nie ŭchvalaje vydaču niekatorymi krainami šenhienskich viz «asobam, blizkim da Alaksandra Łukašenki». U rezalucyi padkreślivajecca važnaść umacavańnia adzinstva ES u dačynieńni da Biełarusi, u tym liku ŭ pytańni dypłamatyčnaj izalacyi biełaruskich uład.
Jeŭradeputaty taksama vystupili suprać udziełu biełaruskich spartoŭcaŭ u adbory na Alimpijskija hulni ŭ Paryžy.
Brat udavy Zielcara: Kadebisty išli ŭ kvateru pa mianie1
Kamientary