Rasijski kamandzir zaklikaŭ «źnieści pierad saboj usio», kab uziać «niedahorad Vuhladar»
Kamandzir bataljona «Uschod» Alaksandr Chadakoŭski zaklikaŭ užyvać taktyku tatalnaha razbureńnia ŭkrainskich haradoŭ.
«My znosim pierad saboj usio, što praciŭnik moža vykarystoŭvać jak schovišča, i tamu takija nastupstvy. Vopyt bajoŭ u Maryupali pakazaŭ, što dastatkova pary piśmienna arhanizavanych uzvodaŭ, kab trymać bataljon. Kab trapić u budynak i pravodzić u im začystku — da budynka jašče treba padyści», — napisaŭ jon u svaim telehram-kanale.
«Praciŭnik kosić ahniom šturmavikoŭ na padychodach, i tolki adno vyjście — znosić hety budynak da niejkaj tam maci choć čym. Ciapier hety niedahorad Vuhladar čarhovy raz demanstruje maju racyju. Nahadaju, što ŭ pieršy dzień vyrašalnaha nastupu na Sievastopal niemcy patracili čatyry tysiačy ton snaradaŭ. Kali my chočam uziać Vuhladar — nam ničoha nie zastajecca, akramia jak znosić pierad saboj usio. Ale čym? Pakul nie źniasiom — kłaści asabisty skład u biespaśpiachovych sprobach advajavać choć kavałak — niapravilna», — zadajecca pytańniem jon.
Na pačatku lutaha Rasija zrabiła čarhovuju sprobu šturmavać Vuhladar, ale straciła jak minimum 71 adzinku techniki, u tym liku dziasiatki tankaŭ, i, imavierna, sotni marskich piechacincaŭ Cichaakijanskaha fłotu zabitymi i paranienymi.
Alaksandr Chadakoŭski zdradziŭ Ukrainie i pierajšoŭ na bok Rasii ŭ 2014 hodzie. Na toj momant jon kamandavaŭ danieckim atradam «Alfa» Słužby biaśpieki Ukrainy. U 2022 hodzie hety 50-hadovy aficer udzielničaŭ u šturmie Maryupala, padčas jakoha zahinuli, pa roznych acenkach, abo tysiačy, abo dziasiatki tysiač žycharoŭ hetaha horada na bierazie Azoŭskaha mora.
Kamientary