Tvorca pieršych u śviecie hienna-madyfikavanych dziaciej raspavioŭ pra ich stan
«Ich los vyklikaje nie tolki vialikija nadziei, ale i surjoznuju turbotu».
Nana i Łułu — dźvie dziaŭčynki-dvajniaty i pa sumiaščalnictvie pieršyja dzieci ŭ śviecie sa štučna źmienienymi hienami. Jany naradzilisia jašče ŭ 2018 hodzie rašeńniem kitajskaha bijołaha Che Cziankuja, jaki svaim učynkam litaralna šakavaŭ uvieś zvyčajny i navukovy śviet.
Niadaŭna navukoviec vyrašyŭ padzialicca infarmacyjaj ab tym, jak žyvuć i jak siabie adčuvajuć dzieci praź piać hadoŭ paśla ekśpierymientu, dziakujučy jakomu dziaŭčynki ad naradžeńnia vałodajuć imunitetam suprać VIČ-infiekcyi.
Jaho słovy 7 lutaha pryviała hazieta South China Morning Post.
«U ich narmalnaje, mirnaje i spakojnaje žyćcio. Dziaŭčynki ŭ hety momant ščaśliva žyvuć sa svajoj novaj siamjoj. Jany hetaha zasłuhoŭvajuć, i my pavinny heta šanavać», — skazaŭ Che Cziankuj.
Bijołah adznačyŭ, što adčuvaje mocnaje zachapleńnie i adnačasova z hetym surjoznaje chvalavańnie za ich dabrabyt i budučyniu, jak byccam «sapraŭdny tata ŭ adnosinach da svaich maleńkich dziaciej».
Jon taksama zajaviŭ, što vielmi nie choča navukovaha ŭmiašańnia ŭ ich žyćcio, bo «ščaście dziaciej i ich siemjaŭ na pieršym miescy».
Pry hetym šmatlikija krytyki jaho ekśpierymientu ŭ adkrytuju abvinavačvali navukoŭca ŭ nieetyčnaści i niehumannaści, bo hety ŭčynak, jak minimum, nie ŭličvaŭ mierkavańnie samich dziaciej, jakija ŭ toj čas jašče nie byli ŭ stanie samastojna vyrašyć svoj los.
A jak maksimum, hety vopyt, uličvajučy adsutnaść na toj momant dastatkovych navukovych viedaŭ u hetaj śfiery, byŭ «zanadta paśpiešlivym», čym padvierhnuŭ žyćcio dziaŭčynak surjoznaj niebiaśpiecy i vysokaj ryzycy ŭźniknieńnia niepradbačanych patałohij.
Za svoj ekśpierymient Che Cziankuj jašče ŭ 2019 hodzie byŭ asudžany ŭ Kitai na vializny štraf i try hady turmy pa artykule «Niezakonnaja miedycynskaja praktyka».
Pra sam ekśpierymient i jaho nastupstvy dla navukoŭca my ŭžo pisali raniej. Dadadzim tolki toje, što bijołah całkam adbyŭ pakarańnie i ŭ 2022 hodzie vyjšaŭ na volu. Na hety momant jon usio jašče znachodzicca ŭ Kitai i praciahvaje svaju navukovuju dziejnaść.
Čytajcie jašče:
U Kitai paśpiachova kłaniravali vysokapradukcyjnuju parodu karoŭ
Navukoŭcy zmahli spynić praces stareńnia ŭ myšej i navučylisia kiravać hetym pracesam. A što nakont ludziej?
Čamu 3000 hadoŭ tamu čałaviečy mozh byŭ bolšy
Kubrakoŭ davodziŭ, što milicyjant Zhirski nie datyčny da bandy nalotčykaŭ. Ciapier taho sudziać — pahražaje da 20 hadoŭ3
Kamientary