Chacieŭ źbiehčy ŭ Biełaruś, ale nie paśpieŭ. Novyja padrabiaznaści spravy pra špijanaž na karyść KDB litoŭskaha jurysta

Litoŭskija pravaachoŭniki aryštavali Danielusa 28 vieraśnia. Jaho padazrajuć u zbory i pieradačy infarmacyi śpiecsłužbam Biełarusi.

Bolš za ŭsio Danielusa cikavili biežancy ź Biełarusi i Ukrainy. Danielus prapanavaŭ im dapamohu jak juryst, ale sam źbiraŭ infarmacyju pra finansy biełaruskich i ŭkrainskich arhanizacyj.

«Spačatku Danielus sprabavaŭ stvaryć vobraz nadziejnaha čałavieka, ale nieŭzabavie jaho pavodziny stali mianiacca, a pytańni, jakija jon zadavaŭ, akazalisia padazronymi, bo jon chacieŭ viedać usio — kamu źbirajecca dapamoha, kamu vydzialajecca, jak pastaŭlajecca, jak žyvuć ukraincy i biełarusy ŭ Litvie, jak arhanizoŭvajecca pryjezd u Litvu biełarusaŭ, jakija ŭciakajuć ad režymu Alaksandra Łukašenki. Nie atrymaŭšy adkazaŭ na hetyja pytańni, Danielus złavaŭsia i navat pavodziŭ siabie ahresiŭna. Kožny raz, kali jon naviedvaŭ naš ofis, heta pieratvarałasia ŭ chaos, jon pieraškadžaŭ pracavać», — raspaviała vydańniu kiraŭnica arhanizacyi «Dapamoha Ukrainie» Hanna Kamarčuk.

Taksama Danielus źbiraŭ infarmacyju ŭ biełaruskich arhanizacyjach «Naš dom» Volhi Karač i «Dapamoha» Natalli Kalehavaj.

Padazrajučy, što jon moža pracavać na biełaruskija śpiecsłužby, kiraŭnicy hetych arhanizacyj padzialilisia svaimi padazreńniami ź litoŭskimi pravaachoŭnikami, jakija raspačali dasudovaje rasśledavańnie pa fakcie špijanažu.

Daviedaŭšysia pra raspačatuju suprać jaho spravu, Danielus chacieŭ uciačy ŭ Biełaruś, ale nie paśpieŭ.

Za špijanaž vilenčuku pahražaje pazbaŭleńnie voli na termin ad 6 da 15 hadoŭ.

Sprava ab špijanažy suprać litoŭskaha jurysta, piša vydańnie, — ŭžo dziasiataja.

Raniej jon byŭ vosiem razoŭ sudzimy, ciapier akruhovy sud horada Vilniusa razhladaje dziaviatuju kryminalnuju spravu. Jaho sudziać za padrobku dakumientaŭ i ich vykarystańnie ŭ 2014-2015 hadach.

Zavajavaŭšy davier kiraŭnikoŭ kampanij, Danielus nieŭzabavie pačaŭ kiravać imi sam — zvalniaŭ ich dyrektaraŭ, mianiaŭ statuty, padrablaŭ dakumienty, falsifikavaŭ rachunki-faktury.

Mantas Danielus — litoŭski juryst, pra jakoha raspaviadała «Naša Niva», sam pryznavaŭsia, što pieradavaŭ infarmacyju łukašenkaŭskaj prapahandystcy Ksienii Lebiedzievaj, jakaja ŭ svaju čarhu, pa jaho słovach, źjaŭlajecca supracoŭnicaj Kamiteta dziaržaŭnaj biaśpieki Biełarusi.

Čytajcie taksama:

Ukaraniajecca ŭ biełaruskija arhanizacyi jak juryst, pierasyłaje infarmacyju Lebiedzievaj. Dziŭnaja dziejnaść Mantasa Danielusa

• 41
• 0
• 8
• 3
• 4
• 2
• 16
• 0