Jak homielski milicyjant dasłužyŭsia da namieśnika hałoŭreda dziaržaŭnaj haziety
Namieśnikam hałoŭnaha redaktara haradskoj haziety «Homielskije viedomosti» staŭ padpałkoŭnik milicyi Vital Prystromaŭ, zaŭvažyŭ «Štodzień. Homiel». Ale prajavić siabie jon paśpieŭ jašče na raniejšaj pasadzie — Prystromaŭ zaplamiŭ siabie suŭdziełam u masavych represijach.
Vital Prystromaŭ rodam z Homiela, skončyŭ tam ža miascovy ŭniviersitet pa śpiecyjalnaści vykładčyka biełaruskaj movy i litaratury. Ale pajšoŭ słužyć u milicyju.
Kalehi kažuć, što Prystromaŭ maryŭ uznačalić pres-słužbu Homielskaha UUS, ale hetaje miesca zaniaŭ Andrej Maziepin, syn zasłužanaha pałkoŭnika i vieterana homielskaha UUS Siarhieja Maziepina.
«Cikava, što Maziepin da prychodu na pasadu kiraŭnika pres-słužby ni dnia nie słužyŭ u joj», — raskazaŭ «Našaj Nivie» surazmoŭca z Homielskaj milicyi.
Maziepin pachavaŭ mary Prystromava pra karjerny rost.
«Maziepin ničym nie vyłučaŭsia, jaho raśpiakali na respublikanskich kalehijach, a jon raśpiakaŭ svaich padnačalenych. Voś tak Prystromaŭ doŭhi čas i isnavaŭ, pakul Maziepin nie syšoŭ, a ŭ samoha Prystromava ŭžo źjaviłasia mahčymaść prajavić siabie za hady znachodžańnia ŭ cieni. I kulminacyja hetaj mahčymaści — 2020 hod. Prystromaŭ trapiŭ na pasadu tady, kali ŭžo źjaŭlalisia błohiery, i ŭ vajnie ź imi jon uhledzieŭ mahčymaść padniacca», — skazaŭ nam milicyjanier.
Sam Prystromaŭ pra siabie raskazaŭ u adnoj z publikacyj haziety «Na stražie» za 2021 hod, jakuju my znajšli ŭ papiarovaj viersii — tam jaho ŭšanoŭvali jak «čałavieka hoda Homielščyny».
«Vialikaj bazaj [u 2020] staŭ telehram-kanał pres-sakratara MUS RB. Resurs dazvoliŭ apieratyŭna reahavać na lubyja sproby dezynfarmacyi hramadzian i davać aficyjnyja abviaržeńni», — kazaŭ jon.
U realnaści kanał, jaki na toj momant kiravaŭsia Volhaj Čamadanavaj, žonkaj namieśnika kiraŭnika HUBAZiKa, z 2020 hoda staŭ srodkam dezynfarmacyi. Tak, naprykład, jon paviedamiŭ, što Alaksandr Tarajkoŭski ŭzarvaŭ siabie sam, chacia kadry jaho rasstrełu bajcami «Alfy» byli apublikavanyja amal adrazu ž. Abviaržeńnia chłuślivaj infarmacyi nie było.
Słovy Prystromava dajuć razumieńnie taho, jakija ŭvohule zadačy ŭvachodzili ŭ abaviazki rabotnikaŭ milicejskich pres-słužbaŭ.
«Spynieńniem masavych akcyj zajmalisia supracoŭniki inšych padraździaleńniaŭ. Ale asnoŭnaje maštabnaje i niabačnaje supraćstajańnie razhortvałasia ŭ sacyjalnych sietkach i mesendžarach. Bajcy infarmacyjnaha frontu razam z kalehami aktyŭna supraćdziejničali napadkam u adras viedamstva ŭ miedyjaprastory», — pisaŭ Prystromaŭ.
Paśla padziej žniŭnia 2020-ha hamielčuki abvinavačvali Prystromava ŭ administravańni kanała «Davajtie raźbieriemsia, homielčanie», u jakim toj u mastackim styli pisaŭ roznyja brydkaści pra ludziej, jakija patrabavali sumlennych vybaraŭ.
«Biassonnyja nočy, niervy na miažy, rabota biez vychadnych. Praca viałasia kruhłasutačna. Pačynajučy ad manitorynhu sietki — dziasiatki čataŭ, hrup i kanałaŭ, zakančvajučy apieratyŭnaj padrychtoŭkaj materyjałaŭ», — kazaŭ Prystromaŭ.
Havorka ab narodnych pratestach suprać falsifikacyi vybaraŭ i parušeńniaŭ zakonnaści.
«Kab dać efiektyŭny adpor tym, chto źbiraŭsia vyrašać los krainy na vulicach šlacham biesparadkaŭ, pradstaŭniki pres-słužby fiksavali ŭsio na videa. Paśla hetaja infarmacyja pasłužyła dokaznaj bazaj pry acency dziejańniaŭ zatrymanych i dapamahła vyznačyć asoby», — dadavaŭ Prystromaŭ.
Prystromaŭ — daŭni tavaryš Vitala Krasnabajeva, jaki viadomy jak šmathadovy namieśnik kiraŭnika pres-słužby Łukašenki.
Sam Krasnabajeŭ nie tak daŭno taksama syšoŭ ź ideałahičnaj raboty na siniekuru — u pres-słužbu vykanaŭčaha kamiteta SND.
Vysłuhi hadoŭ dla atrymańnia milicejskaj piensii ŭ Prystromava ŭžo chapaje, ale atrymlivać jaje jon pačnie tolki kali jamu spoŭnicca 48 hadoŭ — heta značyć, ź vieraśnia 2024 hoda.
«Vysłuhu nakałaciŭ, tamu i syšoŭ, kab zabić sabie miesca, jakoje chacieŭ. Pasada namieśnika redaktara takoj haziety — heta siniekura. Niama aficerskich adnosinaŭ, nichto ciabie nie raśpiakaje, na dziažurstvy nie stavić, a rabić ničoha nie treba. Mnie heta tak bačycca», — skazaŭ adzin z homielskich milicyjanieraŭ.
Siłaviki ŭzialisia za karystalnikaŭ tvitara — dziasiatki akaŭntaŭ zvyčajnych biełarusaŭ stali «ekstremisckimi»9
Kamientary