My adšukali ŭ Telegram funkcyju, jakaja moža być niebiaśpiečnaj dla biełarusaŭ. Voś jak zaścierahčy siabie i jak zrabić jaje karysnaj
U Telegram doŭhi čas isnuje mahčymaść ekspartavać (pieranieści na kampjutar) usiu historyju akaŭnta. Praź mietad sprobaŭ i pamyłak my adkryli, što jana daje mahčymaść pabačyć paviedamleńni navat z zakrytych čataŭ, ź jakich vy vyjšli, i vydalenuju historyju kamunikacyj ź niekatorymi botami. Raskazvajem, jakija zakanamiernaści my adkryli, jak zaścierahčysia i jak možna skarystać hetuju funkcyju dla pavyšeńnia biaśpieki.
Kab skarystacca mahčymaściu ekspartu ŭsiaho akaŭnta, treba mieć sistemu Windows i prahramu Telegram dla jaje. Paśla hetaha vam treba zajści ŭ «Nałady» i abrać punkt «Pašyranyja nałady». Tam abiarycie punkt «Ekspartavać danyja Telegram». My rabili ekspart ź niekalkich akaŭntaŭ.
Dla tych, chto ŭvajšoŭ u Windows-klijent niadaŭna, moža spatrebicca paćvierdzić apieracyju i pačakać 24 hadziny.
Dalej abiarycie toje, što chočacie ekspartavać, — lepš abrać usie punkty. Dla ekanomii času nie abirajcie ekspart fota i inšych miedyjafajłaŭ (prynamsi, abiarycie nievialiki maksimalny pamier fajłaŭ). Nie zabudźciesia abrać ekspart «Aktyŭnych sieansaŭ» i «Raznastajnych źviestak».
Paśla hetaha pačakajcie zakančeńnie ekspartu. Naciśnicie knopku «Pakazać danyja» i pahladzicie atrymanyja danyja (fajł nazyvajecca «export_results.html»).
Što my adšukali?
Praanalizujcie fajł i źviarnicie asablivuju ŭvahu na jaho kaniec u punkcie Chats — tam jość paviedamleńni z čataŭ, ź jakich vy vyjšli ci ŭ jakich byli zabłakavanyja (praŭda, paviedamleńni tolki vašy).
Taksama źviarnicie ŭvahu na punkt Other data («Inšyja danyja»). Tam utrymlivajecca historyja vašych IP-adrasoŭ, ź jakich vy zachodzili ŭ telehram, śpis stvoranych vami stykieraŭ i śpis niavydalenych čarnavikoŭ vašych paviedamleńniaŭ za ŭvieś čas.
U adnym z akaŭntaŭ «uspłyła» pierapiska sa staroha pracoŭnaha čata čałavieka — paviedamleńni tolki jahonyja, ale datyčać važnych pytańniaŭ pa minułym miescy pracy. Pryčym čat zakryty, a čałaviek vyjšaŭ ź jaho bolš za paŭhoda tamu.
U inšym — vielmi staraja pierapiska z botam (za 2019 hod), jakaja nie bačnaja zvyčajnymi mietadami i jakaja była vydalenaja ŭručnuju. Taksama tam byli čarnaviki niekalkich paviedamleńniaŭ, pra jakija čałaviek zabyŭsia. U astatnich vypadkach ničoha značnaha adšukać nie atrymałasia.
Siarod inšych cikavych rečaŭ — prahrama daje mahčymaść pabačyć usie vašy kantakty ŭ punkcie Frequent contacts pa tym, nakolki časta vy da ich źviartalisia. Heta dazvalaje imhnienna pabačyć tych, kamu vy pišacie najčaściej. Taksama tam bačnyja tyja sajty, na jakija vy aŭtaryzavalisia praz telehram i mahli daŭno zabycca.
Jak ad hetaha abaranicca?
Pieršaje: u ekspartavanych paviedamleńniach nie było čataŭ, u jakich byli vydalenyja ŭsie paviedamleńni čałavieka (abo vykananaja opcyja «Vydalić i vyjści»). Takim čynam, pierad vychadam z čata varta vydalać usie vašy paviedamleńni, kab pierastrachavacca. Toje samaje varta rabić i dla botaŭ — vydalać ź imi pierapisku całkam.
Kali vy zabylisia, adkul u vas uziaŭsia niejki čat paśla ekspartavańnia i vy nie možacie vydalić ź jaho paviedamleńni, to lepš vydalić hety svoj akaŭnt z kancami i stvaryć novy.
Jak zarehistravać ananimnyja akaŭnty ŭ Telegram, sacsietkach i inšych miesiendžarach — padrabiazny hajd
Druhoje: uznoŭlenaja pierapiska z botam — heta, chutčej za ŭsio, pamyłka samoha telehrama, jakaja była vypraŭlenaja, a nie sistemnaja prablema. Pry hetym anivodny z botaŭ, vydalenych pa instrukcyi z našaha sajta, nie byŭ u ekspartavanych.
Treciaje: telehram zachoŭvaje čarnaviki, pra jakija lohka zabycca. Kab ich vydalić, zajdzicie ŭ mieniu naładaŭ «Danyja i schovišča» i naciśnicie «Vydalić čarnaviki na vobłaku».
Čaćviortaje: lepš adklučyć funkcyju prapanavańnia častych kantaktaŭ. Dla hetaha zajdzicie ŭ punkt naładaŭ «Pryvatnaść i biaśpieka» i adklučycie funkcyju «Prapanoŭvać častyja kantakty».
Piataje: pierapraviercie ŭkładku mieniu «Pryvatnaść i biaśpieka» pad nazvaj «Aŭtaryzavanyja sajty» (Logged in with Telegram) i ŭpeŭniciesia, što tam niama lišnich resursaŭ.
Jak pačyścić svoj akaŭnt z dapamohaj hetaj funkcyi?
Ale ŭ hetaj funkcyi jość i karysnaje vymiareńnie — jana dazvalaje ŭpeŭnicca ŭ abaronienaści akaŭnta.
Vydalicie paviedamleńni ŭ čatach i botach, jakija vy chacieli pačyścić. Paśla hetaha zrabicie ekspart vašaha akaŭnta zhodna ź instrukcyjaj u pieršym punkcie našaha artykuła. Vystaŭcie maksimalnyja nałady pryvatnaści, vydalicie čarnaviki i mahčymaść bačyć častyja kantakty.
Paśla hetaha ekspartujcie danyja akaŭnta nanova i adkryjcie fajł. Praviercie čaty, asabliva naprykancy, tam, dzie zachoŭvajucca vydalenyja i zabłakavanyja čaty. Pierapraviercie vydalenyja boty.
Taksama źviarnicie ŭvahu na ŭsie inšyja ŭkładki na pradmiet taho, što mahło zastacca niepačyščanym. Adzinaje, što pačyścić nielha — heta historyju vašych IP-adrasoŭ, jakuju telehram moža zachoŭvać da hoda. Stvaralniki miesiendžara śćviardžajuć, što heta nieabchodna im dla taho, kab servis pracavaŭ.
«Naša Niva» — bastyjon biełaruščyny
PADTRYMAĆ
Kamientary