Rakieta z kaśmičnymi pamidorami i inkubataram johurtaŭ adpraviłasia na MKS
Kali astranaŭty źbirajucca vykonvać šmathadovyja misii abo ŭstalavać praciahłuju prysutnaść na Miesiacy i Marsie, im spatrebiacca śviežaja ježa i miedykamienty, jakija nie tak lohka dastavić za miežy našaj płaniety. Apošniaja partyja prypasaŭ, jakaja nakiroŭvajecca na MKS, uklučaje niekalki novych varyjantaŭ rašeńnia prablemy: u tym liku vytvorčaść johurtaŭ i patencyjna smačnych kaśmičnych pamidoraŭ.
Pamidory na fota — heta tolki apošniaja faza praciahłaha ekśpierymientu pa vyroščvańni jadomych raślin va ŭmovach mikrahravitacyi i štučnaha aśviatleńnia kaśmičnaj stancyi. Apošnija niekalki hadoŭ pracy byli skancentravanyja na listavoj zielaninie, u pryvatnaści na špinacie i travach, paviedamlaje TechCrunch.
Misija vyvučyć «jakaść śviatła i ŭhnajeńniaŭ dla vytvorčaści sadaviny, mikrobnuju biaśpieku charčovych praduktaŭ, charčovuju kaštoŭnaść, prymalnaść smaku dla ekipaža i ahulnyja pieravahi ŭtrymańnia raślin i śviežaj ježy ŭ kosmasie dla zdaroŭja». Roznyja kambinacyi ŭmoŭ, naładžvańnie patokaŭ śviatła i pažyŭnych rečyvaŭ dapamohuć ubačyć, jak vyrabić lepšyja pamidory ŭ kosmasie ciaham 104-dzionnaha pieryjadu rostu.
Jak i naziemnaje sadoŭnictva, heta davoli składany ekśpierymient dla ekipaža MKS. Členy ekipaža dahladajuć raśliny, zabiaśpiečvajučy vadoj, praredžvajučy rasadu, apylajučy i sočačy za ich zdaroŭjem i prahresam — i, viadoma, źjaduć niekatoruju častku ŭradžaju.
Taksama na MKS adpraŭlajucca johurt, kiefir i napoj na asnovie droždžaŭ. Jak viadoma, niekatoryja pažyŭnyja rečyvy našmat bolš karysnyja, kali śviežyja. I z hetym mohuć dapamahčy karysnyja mikroby, padobnyja da tych, jakija znachodziacca ŭ johurtach. BioNutrients-2 — heta druhaja faza sproby stvaryć ustojlivuju dla zachoŭvańnia sumieś, jakaja pry ŭvilhatnieńni pryvodzić da vypracoŭki bakteryjami metavaha pažyŭnaha rečyva.
U bijareaktarach bakteryi i droždžy vyrablajuć peŭnyja malekuły ŭ ramkach svaich narmalnych bijałahičnych pracesaŭ, naprykład, hlukozu. Ale taksama jany mohuć vykarystoŭvacca i dla bolš składanych malekuł, takich jak niekatoryja leki. Ale ci možna rabić heta efiektyŭna i lohka ŭ kosmasie i mienavita jak heta zrabić — zastajecca adkrytym pytańniem, na jakoje novyja ekśpierymienty pralijuć krychu śviatła.
Kaśmičnyja tamaty — heta nie adziny sad na MKS. Raniej tam užo byŭ zapuščany ekśpierymient pa vyvučeńni epihienietyčnaha ŭździejańnia na raśliny va ŭmovach mikrahravitacyi. Źmieny ŭ navakolnym asiarodździ (asabliva takija, jak žyćcio na arbicie) mohuć vyklikać źmieny ŭ tym, jakija hieny i jakim čynam vyjaŭlajucca.
Viadoma, što hetyja źmieny adbyvajucca ŭ kosmasie, ale pakul nieviadoma, ci źjaŭlajucca źmieny spadčynnymi, i ci pryviaduć peŭnyja štamy ci mutacyi da atrymańnia bolš zručnych dla kosmasu varyjantaŭ raślin. Daśledavańnie paraŭnoŭvaje nasieńnie i raśliny, vyrablenyja ŭ kosmasie, z nasieńniem, vyrablenym na pavierchni. Kali pašancuje, ludzi mahli b znajści niekatoryja śpiecyjalnyja adaptacyi da mikrahravitacyi, jakija dazvalajuć raślinam kvitnieć u hetych niezvyčajnych umovach.
Kamientary