Łukašenka: U 2020 hodzie supracoŭniki PVT prajavili siabie nie najlepšym čynam
Siońnia Łukašenka zasłuchaŭ dakład ab pracy i pierśpiektyvach raźvićcia Parka vysokich technałohij (PVT). Taksama jon zajaviŭ, što nie moh ujavić, što ŭ 2020 hodzie ajcišniki vystupiać suprać jaho.
«Skažam ščyra, uspaminajučy 2020 hod, toj miaciež, jaki byŭ naviazany našamu narodu… Supracoŭniki Parka vysokich technałohij prajavili siabie, miakka kažučy, nie z najlepšaha boku. I, viadoma, u hramadstvie ŭ bolšaści svajoj prysutničaje niejkaja naściarožanaść u hetym dačynieńni. Voś heta ja maju na ŭvazie, što pryjšoŭ čas źniać niejkija niepatrebnyja nam niuansy z funkcyjanavańniem PVT», — zajaviŭ Łukašenka.
Pa jaho słovach, vina ŭ hetym kiraŭnikoŭ kampanij, jakija ŭvachodziać u PVT.
«Haspadary byli daloka za miežami Biełarusi. My bačyli i atrymlivali źviestki napiaredadni hetaha miaciažu, što buduć zadziejničanyja supracoŭniki PVT jak ruchajučaja siła. I znoŭ ža, pryznajusia, što ni ja, ni śpiecsłužby nie nadali hetamu naležnaj uvahi. My prosta admachnulisia ad hetaha. Ja dumaŭ, nu nie moža ž być, kab tvaje dzieci pačali suprać ciabie vajnu. Za heta i papłacilisia. Akazvajecca, što i takija dzieci mohuć vajavać suprać baćkoŭ, kali im dobra płaciać. Heta značyć, našy ludzi (heta taksama treba adkryta pryznać), jakija pracujuć u Parku vysokich technałohij, atrymlivajuć prystojnyja dachody ŭ paraŭnańni ź siaredniaj zarpłataj u Biełarusi, addali pieravahu vialikim hrašam i vykonvali kamandy svaich zamiežnych haspadaroŭ, čaściej za ŭsio zaakijanskich. Moža, ja ŭ čymści pamylajusia, ale, napeŭna, tolki ŭ detalach. My analizavali situacyju z hetych pazicyj i pryjšli da takoj vysnovy», — skazaŭ Łukašenka.
Jon dadaŭ, što treba rabić źnižku na toje, što imi ŭsio-tki kiravali:
«Pakolki heta maładyja ŭ asnoŭnym ludzi, dy i kiraŭnictva PVT spuściŭšy rukavy tam pracavała: nie viedali svaich ludziej i nie procidziejničali svoječasova ŭsim hetym niehatyŭnym tendencyjam».
U toj ža čas jon vykazaŭ mierkavańnie, što admaŭlacca ad pracy PVT, nie padtrymlivać jaho było b niapravilna.
Što zapisana aficyjnaj pryčynaj śmierci adzinaha syna Jarmošynaj?7
Kamientary