Łukašenka raskazaŭ, jakim bačyć «Usiebiełaruski narodny schod»
Łukašenka siońnia pravioŭ naradu pa prajektach zakonaŭ ab Saŭminie i źmianieńni narmatyŭnych pravavych aktaŭ. Padčas narady jon čarhovy raz zakranuŭ pytańnie «Usiebiełaruskaha narodnaha schodu».
Łukašenka padkreśliŭ, što źmieny, pryniatyja ŭ Kanstytucyju, pavinny arhanična ŭkaranicca ŭ sistemu kiravańnia. Pry hetym praces pavinien iści biez łomki.
«Ni ŭ jakim vypadku. Nijakaha złomu. Nijakaj łomki być nie pavinna. Usio pavinna vyrastać, źjaŭlacca z taho, što jość. Kali my pačniom kruta łamać, to heta amal revalucyjnyja pieraŭtvareńni. Da čaho jany pryvodziać, my bačyli ŭ siaredzinie 90-ch, kali złamali krainu. Tamu ŭsio pavinna łahična raści z taho vopytu, jaki my majem», — cytuje jaho słovy pres-słužba.
Łukašenka skazaŭ, što Kanstytucyja — heta asnova žyćcia.
«Treba pierakanać, abaviazkova pierakanać usich našych ludziej žyć pa zakonie. Ja chaču, kab vy razumieli: heta nie prosta ŭziaŭ i skazaŭ žyć pa zakonie. Heta nie ja prydumaŭ. Pra heta zaŭsiody kažuć. Ja heta śpiecyjalna padkreślivaju, tamu što našy ludzi časta žyvuć, aryjentujučysia na asobu. Pierš za ŭsio na prezidenta, parłamient, deputataŭ, Saviet Ministraŭ i hetak dalej. Voś pryniali, i dobra», — skazaŭ jon.
Łukašenka taksama skazaŭ, što, miarkujučy pa minułym abmierkavańni prajekta zakona ab «Usiebiełaruskim narodnym schodzie», ludzi nie razumiejuć sutnaści hetaha orhana. Na jaho dumku, schod pavinien stać stabilizataram.
Łukašenka sa škadavańniem adznačyŭ, što ludzi časam «nie zusim razumiejuć», jak va UNS budzie pradstaŭleny narod. Ź jahonych słoŭ, usie, chto budzie ŭdzielničać u pracy schodu, «tak ci inakš abirajucca narodam».
«Deputaty tam buduć udzielničać — jany abirajucca narodam. Sienatary — pa inšaj sistemie, ale abirajucca narodam. Členy ŭrada tam prysutničajuć — ich pryznačaje prezident, ale jon (prezident) taksama abirajecca narodam. Nu i naohuł, davajcie tak kazać: kali nie budzie voś hetych prafiesijanałaŭ — hubiernataraŭ, urada, prezidenta ŭ pracy UNS — heta pieratvorycca ŭ havarylniu», — adznačyŭ Łukašenka.
Jon taksama nahadaŭ, što ŭ pracy UNS buduć taksama ŭdzielničać pradstaŭniki zarehistravanych u Biełarusi hramadskich arhanizacyj.
Łukašenka skazaŭ, što va UNS buduć «i rabočyja, i sialanie, i nastaŭniki, i daktary, i čynoŭniki, i dziaržaŭnyja słužačyja, i vajskoŭcy», padkreśliŭšy, što pradstaŭnikoŭ pieršych dźviuch katehoryj budzie niašmat.
Što zapisana aficyjnaj pryčynaj śmierci adzinaha syna Jarmošynaj?9
Kamientary