Na fonie sustrečy Łukašenki ŭ Pucina siłavyja struktury Biełarusi pieraviedzienyja va ŭzmocnieny režym niasieńnia słužby. Što adbyvajecca?
Jak stała viadoma «Našaj Nivie», adnyja vučeńni źmianiajuć inšyja. Supracoŭnikaŭ Ministerstva pa nadzvyčajnych situacyjach pierastali adpuskać u adpačynki. A ŭ vojsku pajšli čutki, što Maskva choča, kab rasijskich mabilizavanych školili ŭ Biełarusi.
«Amal usie siłavyja struktury pieraviedzienyja va ŭzmocnieny režym niasieńnia słužby, navat Śledčy kamitet i Ministerstva pa nadzvyčajnych situacyjach. Adnyja vučeńni źmianiajuć inšyja, — raskazaŭ «Našaj Nivie» aficer adnoj ź siłavych struktur. — Uvieś čas padymajuć pa tryvozie, praviarajuć hatoŭnaści, tryvožnyja čamadančyki
(sumka ź pieršym nieabchodnym na vypadak vybyćcia: bializna, tušonka, myjučyja srodki, kompas, kurvimietr, mapy). KDB «miniruje» budynki, a mianty i MNS jeździać «raźminiravać».
Supracoŭnikaŭ Ministerstva pa nadzvyčajnych situacyjach pierastali adpuskać u adpačynki vusnym rasparadžeńniem», — skazaŭ «Našaj Nivie» aficer milicyi.
«U nas «uzmacnieńnie». Viedaju, što i śpiecpadraździaleńni ŭsich struktur pa respublicy nie vyłaziać z vučeńniaŭ i, uvohule, niervovy narod staŭ z mabilizacyjaj hetaj», — skazaŭ siłavik ź inšaha rehijona.
Na nizavym uzroŭni ŭ siłavych strukturach nie razumiejuć, što aznačała pajezdka Alaksandra Łukašenki ŭ Sočy i jaho zatrymka tam na try dni bieź nijakich publičnych vystupaŭ.
Surazmoŭcy «Našaj Nivy» źviartajuć uvahu na padabienstva jurydyčnych pracesaŭ, jakija ciapier adbyvajucca ŭ krainie, z pracesami napiaredadni 2020-ha, a kankretna: vydajucca zasakrečanyja pravavyja akty, źmiest jakich asabovamu składu siłavych struktur pakul nie davodziać.
U 2020-m tak rychtavali, naprykład, jurydyčnaje abhruntavańnie dla ŭviadzieńnia ŭ harady siłaŭ śpiecyjalnych apieracyj, jakija ŭdzielničali ŭ vyniku ŭ razhonie mirnych demanstrantaŭ.
«Ciapier u niekatorych čaściach Biełarusi abviaščajecca pravierka bajavoj i mabilizacyjnaj hatoŭnaści. Jość padstavy ličyć, što heta zakranie nie tolki čaść u Mačuliščach, pra jakuju abvieścili aficyjna», — skazaŭ «Našaj Nivie» vysokapastaŭleny vajskoviec.
Mačuliščy — heta najbolšy hruzavy aeradrom pad Minskam, transpartny chab dla rasijskich vojskaŭ u pieršyja miesiacy vajny va Ukrainie.
«Pa majoj infarmacyi, idzie padrychtoŭka dla pryniaćcia rasijskich mabilizavanych na biełaruskich palihonach, vučebnych centrach i vajskovych čaściach. U nas jość i miescy dla trenirovak, i instruktary. Mahčyma, Rasija patrabuje ad Łukašenki, kab navučańnie častki mabilizavanych rasijskich vajskoŭcaŭ prachodziła ŭ Biełarusi i pravodzili jaho biełaruskija siłaviki», — vykazvaje mierkavańnie surazmoŭca «Našaj Nivy».
Tur patłumačyŭ, što Łukašenka mieŭ na ŭvazie, kažučy pra pryznačeńnie dyrektaraŭ u pryvatnyja kampanii4
Kamientary