Rozyhryšy ŭ Instagram — ašukanstva ci realnaja mahčymaść atrymać kruty pryz i raźvić svoj akaŭnt?
Badaj, kožny karystalnik Instagram čuŭ ci navat prymaŭ udzieł u giveaway (rozyhryšy). Što heta takoje, jaki šans atrymać pryz ad błohieraŭ i chto zdymaje viarški z praviadzieńnia padobnych łatarej?
Što heta takoje?
Giveaway — heta rozyhryš u Instagram, dzie błohier prapanuje svaim padpisčykam za pryzy padpisacca na akaŭnty sponsaraŭ. Kolkaść akaŭntaŭ, na jakija treba padpisacca, moža być roznaj, ale zvyčajna heta ad 20 da 50. Padpiska na sponsaraŭ źjaŭlajecca asnoŭnym, ale čaściej za ŭsio nie adzinym patrabavańniem dla ŭdziełu ŭ rozyhryšach.
Niaredka ad udzielnikaŭ patrabujuć acanić post padabajkaj, pakinuć pad im kamientar, zrabić repost dopisu sabie ŭ storys z adznakaj i h.d.
Šarahovych udzielnikaŭ łatarei, jak praviła, cikavić tolki adno pytańnie: ci budzie rozyhryš sumlennym albo pryz atrymaje padstaŭnaja asoba. Adkazvać za ŭsich niemahčyma, ale ŭsio ž adznačym, što vierahodnaść taho, što rozyhryš budzie niesumlennym u adnosinach da ŭdzielnikaŭ vielmi nievialiki. Asabliva, kali my havorym pra rozyhryšy, jakija pravodziacca ŭ Biełarusi.
Jakija šancy na vyjhryš?
Šancy atrymać pryz zaležać ad kolkaści ŭdzielnikaŭ, samaho pryzu i jakaści arhanizacyi «hivu». Tym nie mienš, navat u samych drobnych «hivach» udzielničaje pa niekalki tysiač čałaviek, a ŭ dobra arhanizavanych bujnych rozyhryšach ich kolkaść moža vyličacca dziasiatkami tysiač.
Jak vyznačajuć pieramožcu?
Jak praviła vyniki praviadzieńnia rozyhryšu viaducca ŭ pramym efiry, pieramožcu(caŭ) čaściej za ŭsio vybirajuć z dapamohaj hienieratara vypadkovych ličbaŭ.
Jak heta pracuje i navošta heta sponsaram?
Sponsary źjaŭlajucca ŭładalnikami tych akaŭntaŭ, na jakija nieabchodna padpisacca dla ŭdziełu ŭ rozyhryšy. Usie jany znachodziacca ŭ śpisie padpisak u arhanizatara «hivu».
Kolkaść sponsaraŭ čaściej za ŭsio vyličajecca dziasiatkami i redka dachodzić da sotni, ale i takija vypadki taksama sustrakajucca.
Treci bok «hivu» — arhanizatar. U jakaści arhanizataraŭ vystupajuć kankretny błohier ci hrupa błohieraŭ abo SMM-ahienctva.
Sponsary płaciać arhanizataram za ŭdzieł u «hivie», a arhanizatary ŭ svaju čarhu zajmajucca zakupkaj pryzoŭ, niepasredna arhanizacyjaj i praviadzieńniem rozyhryšu. A samaje hałoŭnaje — abiacajuć pryrost aŭdytoryi.
Ad harantavanaj kolkaści prychodu novaj aŭdytoryi naŭprost zaležyć cana ŭdziełu. Naprykład, drobny rehijanalny «hiŭ» z harantyjaj prychodu 1500 padpisčykaŭ moža kaštavać ad 150 rubloŭ. Ahulnarespublikanski na 3000-5000 padpisčykaŭ ad 250 da 500 rubloŭ.
5000-9000 biełaruskich padpisčykaŭ adno z SMM-ahienctvaŭ prapanuje za 750 rubloŭ.
Što harantujuć arhanizatary?
Dla bolšaj upeŭnienaści błohiery i ahienctva zajaŭlajuć, što kali vy atrymajecie mienšuju kolkaść padpisčykaŭ, čym było abiacana, to vam viernuć hrošy. Ale sponsaram tut sapraŭdy niama za što chvalavacca, pakolki viartać hrošy nikomu z arhanizataraŭ nie pryjdziecca. Pa-pieršaje, vopytnyja arhanizatary ŭmiejuć praličvać usio tak, kab vykanać abiacańnie. Nu a pa-druhoje, u ich zaŭsiody jość dadatkovaja opcyja ŭ vyhladzie botaŭ, jakich jany nakruciać na vaš profil, kali buduć razumieć, što jość ryzyka nie vykanać abiacańni.
Arhanizatary giveaway nazyvajuć taki sposab raskrutki akaŭntaŭ ničym inšym, jak samym chutkim i lehalnym sposabam atrymać aŭdytoryju i prasunuć svoj profil, pavysić prodažy, paznavalnaść brendu, pryciahnuć rekłamadaŭcaŭ i h.d. Ale ci tak heta na samaj spravie?
I tut my znoŭ vierniemsia da pieršaj častki aŭdytoryi. Tym samym ludziam, jakija chočuć vyjhrać pryz. U finansavym płanie jany ničoha nie hublajuć,bo ŭsiaho tolki zachłamlajuć svaju stužku ŭ Instagram vialikaj kolkaściu niezrazumiełych padpisak. Usio praz toje, što sponsaram moža być chto zaŭhodna — ad manikiurščycy z Rečycy da ryełtara ź Minska i arhanizacyi pa vytvorčaści nadmahillaŭ ź Viciebska.
U bolšaści vypadkaŭ šarahovy karystalnik sa svajho boku tryvaje ŭvieś hety viniehret roŭna da taho momantu, pakul nie budzie razyhrany pryz. Tamu vialikaja častka ŭdzielnikaŭ adpisvajecca ad sponsaraŭ u dzień paśla padviadzieńnia vynikaŭ rozyhryšu. Chtości robić heta krychu paźniej, a dla kahości hety praces zaciahvajecca na tydni i navat miesiacy. U krajnim vypadku sam Instagram pierastanie pakazvać vam pasty i storyz bolšaści z tych, na kaho vy padpisalisia padčas «hivu», pakolki, dziakujučy razumnym ałharytmam, sacsietka pierastaje pakazvać vam kantent, jaki vas nie cikavić.
Što atrymlivaje sponsar?
A ciapier hladzim na situacyju z boku sponsaraŭ. Tak, u pačatku praviadzieńnia «hivu» sponsar atrymlivaje chutki pryrost aŭdytoryi, razam z hetym padrastaje statystyka, pavialičvajecca kolkaść prahladaŭ storyz i kolkaść padabajek pad pastami. Ale doŭžycca heta nie doŭha, pakolki paśla praviadzieńnia vynikaŭ ludzi pačynajuć hetak ža masava adpisvacca. Z-za masavaj adpiski sam Instagram pačynaje razhladać taki akaŭnt, jak niecikavy. Statystyka padaje, vy traplajecie ŭ tak zvany «cieniavy ban».
Niaredka statystyka ŭ takich akaŭntaŭ stanovicca horšaj, čym była da sponsarstva ŭ rozyhryšy. Choć ahulnaja kolkaść padpisčykaŭ budzie prykmietna bolšaj.
Pa hetaj pryčynie dla sponsaraŭ karyści ad udziełu ŭ takich mierapryjemstvach u bolšaści vypadkaŭ vielmi mała, časam heta naohuł vykinutyja hrošy. Navat niehledziačy na toje, što ahulnaja kolkaść padpisantaŭ vyrasła.
Tut treba razumieć, što rost kolkaści padpisčykaŭ nie dapamoža vam pavysić prodažy abo pryciahnuć rekłamadaŭcaŭ. Pakolki vy atrymlivajecie nie metavuju aŭdytoryju, a chalaŭščykaŭ, jakich cikaviŭ, naprykład, biaspłatny Iphone, a nie vašy tavary ci pasłuhi. Karystalnik, jaki pražyvaje ŭ Breście, nie budzie rabić manikiur u Hrodna, zakazvać klininhavyja pasłuhi ŭ Minsku i kuplać kvietki ŭ Viciebsku.
Pra marnaść i škodu «hivaŭ» viedaje luby daśviedčany SMM-śpiecyjalist. Ale pakolki heta sposab nakrutki padpisčykaŭ sapraŭdy chutki i niedarahi, to «hivy» pravodziać ŭžo nie pieršy hod i pa ŭsioj bačnaści praciahnuć heta rabić dalej.
«Pačali dakručvać aŭdytoryju botami»
Šuharynh-majstar, jakaja ŭdzielničała ŭ «hivie» za 150 rubloŭ, dzielicca svaim dośviedam:
«Sponsaraŭ było bolš za 60, pryčym ich naohuł nijak nie adbirali. Tam byli pradaŭcy krypty, kandytary, aŭtamajsterni i h.d.
Adrazu jak startanuŭ «hiŭ», viadoma pajšli padpiski, było vidać, što akaŭnty sapraŭdnyja. Prahlady ŭ storyz raśli. Abiacanaja kolkaść pryjšła, napeŭna, za dva dni, ale potym, pa ŭsioj bačnaści, na ŭsialaki vypadak aŭdytoryju pačali dakručvać botami», — zhadvaje dziaŭčyna.
Jana i inšyja ŭdzielniki admysłovaha čata na pieršym etapie radavalisia, što tak šmat ludziej pryjšło, ale pa fakcie heta ŭsio była nie metavaja aŭdytoryja.
Dziaŭčyna kaža, što padčas udziełu ŭ «hivie» i niejki čas paśla analizavała svaich naviednikaŭ. Ź jaje słoŭ, za niekalki miesiacaŭ da jaje tak i nie pryjšło novych ludziej ź liku ŭdzielnikaŭ rozyhryšu.
«U asnoŭnym prychodzili pastajannyja klijentki i ludzi pa rekamiendacyjach. Harantyi pa prychodzie aŭdytoryi (1500) błohier, jaki arhanizavaŭ «hiŭ», vykanaŭ, ale tołku ad hetaha nul. Pa fakcie padpisałasia bolš za 4000 tysiačy čałaviek, ale kala pałovy adpisałasia na praciahu sutak paśla razdačy pryzoŭ. Adpiski praciahvajucca ŭžo niekalki miesiacaŭ».
«Vynikami rasčaravana, bolš nie płanuju prymać udzieł u padobnych avanturach»
Inšaja dziaŭčyna, fatohrafka, da ŭdziełu ŭ «hivie» mieła 800 padpisčykaŭ. U rozyhryšy jana ŭdzielničała ŭ siaredzinie traŭnia.
«Płaciła 180 rubloŭ, užo sa źnižkaj, tamu što dałučyłasia ŭ apošni dzień, usiaho było 48 sponsaraŭ. Harantavali prychod 3000 čałaviek. Padpisałasia na mianie kala 3300 čałaviek. Vynikam ja niezadavolenaja. Tak, ludzi padpisalisia, ale ŭ asnoŭnym heta byli akaŭnty z 3000+ padpisak, to-bok stvoranyja admysłova dla rozyhryšaŭ. Aktyŭnaść u storyz była ŭ pieršy ž dzień, a potym — tolki ŭ dni rozyhryšaŭ niejkich dadatkovych pryzoŭ za prahlady storyz. Jašče była aktyŭnaść u kamientavańni pastoŭ. Ich amal nichto nie čytaŭ, prosta pisali dziažurnyja frazy: «Pryhažość», «Uch ty», stavili ahienčyki i ŭsio ŭ hetym rodzie. Tolki paru čałaviek pračytali post i napisali narmalny kamientar», — dzielicca dośviedam fatohrafka.
Zaraz u dziaŭčyny 2400 padpisčykaŭ, ale ludzi praciahvajuć adpisvacca, choć i nie tak aktyŭna. Ź jaje słoŭ, niahledziačy na šmatrazovy rost aŭdytoryi, achopy storyz pavialičylisia ŭsiaho na 100-200 čałaviek, a kolkaść ludziej, jakija aceńvajuć pasty, amal nie źmianiłasia.
«Ja rasčaravanaja takimi vynikami, bolš nie płanuju prymać udzieł u padobnych avanturach. Heta prosta kuča fiktyŭnych padpisantaŭ, jakija visiać na tvaim akaŭncie, ad jakich niama nijakaj karyści», — zapeŭnivaje dziaŭčyna.
Kamu pasujuć «hivy»?
Mabyć, adzinaja častka karystalnikaŭ, jakim biassprečna moža padyści taki sposab raźvićcia akkaŭtaŭ, — ludzi i kampanii, jakija prosta chočuć puścić pył u vočy, pakazaŭšy, jak šmat u ich padpisčykaŭ u Instagram. Pry hetym dla bolšaj upeŭnienaści mienavita takija karystalniki niaredka chavajuć infarmacyju ab kolkaści padabajek pad pastami, kab profil nie vyhladaŭ padazronym, kali padpisčykaŭ tysiačy ci dziasiatki tysiač, a kolkaść padabajek — jak u błohaŭ z sotniami fałovieraŭ.
Nu i viadoma ž, raźličvać na prychod rekłamadaŭcaŭ da błohieraŭ z «pustyškami» u padpisčykaŭ taksama nie varta. Daśviedčany rekłamadaŭca budzie hladzieć nie tolki na kolkasnyja pakazčyki, ale i na jakasnyja. Bo ad rekłamy ŭ błohu z 3-5 tysiačami «žyvych» padpisčykaŭ tołku moža być bolš, čym u raskručanych «hivami» na 30-50 tysiač.
Adzinym bokam, jaki ničoha nie hublaje ad praviadzieńnia «hivaŭ», źjaŭlajucca tyja samy arhanizatary, jakija zarablajuć na hetym hrošy praz Instagram, jak šmatlikija marafonščyki, jakija pradajuć u bolšaści svajoj absalutna bieskarysnyja kursy.
«Naša Niva» — bastyjon biełaruščyny
PADTRYMAĆ
Kamientary