Associated Press: Padčas napadu na Maryupalski dramteatr zahinuła kala 600 čałaviek
Rasśledavańnie ahienctva Associated Press pryjšło da vysnovy, što avijacyjny nalot rasijan na dramteatr u Maryupali na samaj spravie byŭ značna bolš śmiertanosnym, čym mierkavałasia. U vyniku jaho zahinuła kala 600 čałaviek usiaredzinie i zvonku budynka.
Vydańnie zrabiła 3D-madel budynka na asnovie śviedčańniaŭ vidavočcaŭ, dvuch naboraŭ płanaŭ pavierchaŭ teatra, fatahrafij i videa, zroblenych usiaredzinie.
Usie śviedki skazali, što prynamsi sto čałaviek znachodzilisia na palavoj kuchni niedaloka ad budynka, i nichto nie vyžyŭ. Jany taksama skazali, što pakoi i kalidory ŭsiaredzinie byli zapoŭnienyja, prykładna adzin čałaviek na kožnyja 3 kvadratnyja mietry.
Pavodle acenak mnohich z tych, chto vyžyŭ, padčas avijaŭdaru ŭsiaredzinie znachodziłasia kala 1000 čałaviek, ale nichto nie bačyŭ, kab vyratavałasia bolš za 200.
Rasśledavańnie taksama abviarhaje śćviardžeńni Rasii ab tym, što teatr słužyŭ ukrainskaj vajskovaj bazaj. Nichto sa śviedak nie bačyŭ ukrainskich vajskoŭcaŭ, jakija dziejničali ŭsiaredzinie budynka. I nichto nie sumniavaŭsia, što teatr byŭ razburany ŭ vyniku ŭdaru rasijskaj avijacyi.
16 sakavika akupacyjnyja vojski skinuli zvyšmahutnuju bombu na Maryupalski dramatyčny teatr, dzie chavalisia ŭciekačy, što stracili svaje damy. Maryupalskaja haradskaja rada paviedamlała, što ŭ dramatyčnym teatry Maryupala ŭ vyniku bambardziroŭki rasijskim samalotam zahinuła kala 300 čałaviek.
Siłaviki ŭzialisia za karystalnikaŭ tvitara — dziasiatki akaŭntaŭ zvyčajnych biełarusaŭ stali «ekstremisckimi»5
Kamientary