Źniać kvateru ŭ Minsku ciapier realna ad 100 dalaraŭ. Pahladzieli na samyja tannyja varyjanty arendy ŭ stalicy FOTA
Niestabilnaja situacyja na valutnym rynku i adtok nasielnictva z krainy napramuju adbilisia na arendnym žytle. Častka arendadaŭcaŭ źniziła ceny na svaje kvatery ŭ novych umovach ci zafiksavała ich u rublach — jak śledstva, na rynku źjaviłasia vialikaja kolkaść tannych varyjantaŭ. Pahladzieli, jakija kvatery prapanujuć u stalicy da 200 dalaraŭ.
U katehoryi najbolš dastupnaha žytła tradycyjna zastajucca «babušatniki». Kali takoje nie pužaje i vy hatovyja sami prykłaści ruku dla naviadzieńnia ŭtulnaści, to ŭ rajonie Kurasoŭščyna na Łandera možna zasialicca ŭ adnušku za 106 dalaraŭ. U vašym rasparadžeńni — mebla, plita. A voś chaładzilnik i pralnuju mašynu pryjdziecca nabyvać svaje. Praŭda, usia ščodraść — na pieryjad, pakul u domie budzie iści kapramont: takaja źnižka za dyskamfort. Paśla ramontnych prac cana arendy krychu padymiecca. Ale haspadary sami abiacajuć abnavić unitaz i špalery.
Za adnušku ź lepšym ramontam užo prosiać ad 139 dalaraŭ — takaja prapanova, naprykład, majecca na vulicy Słavinskaha, što ŭ mikrarajonie Uschod. Na 23.4 m2 haspadar hatovy bačyć tolki adnaho žychara. U jaho rasparadžeńni budzie mebla, chaładzilnik, pralnaja mašyna. Dla hatavańnia ježy na kuchni majecca tolki mulcivarka.
145 dalaraŭ — i vašaj moža być adnuška na Čyhładze (niedaloka ad stancyi mietro Puškinskaja). «Kvatera čystaja, akuratnaja, z usioj meblaj i technikaj, bieźlimitny internet, hatova da zasialeńnia», — napisana ŭ abjavie.
Amal u centry, niepadalok ad mietro Jakuba Kołasa i Akademii Navuk, na vulicy Maksima Bahdanoviča možna asieści za 150 dalaraŭ. Sami haspadary ŭ abjavie adznačajuć, što heta «viejelmi vyhadny košt», na ich dumku (tym bolš, abiacajuć nizkuju kamunałku). Dadatkovaja ŭmova: zakład i doŭhaterminovaja arenda. U dostupie zašklony bałkon ź vidam na horad z 4-ha paviercha, chaładzilnik, posud, mikrachvaloŭka, pralnaja mašyna, internet.
U 150-dalaravaj katehoryi nazirajecca ŭžo niamała prapanoŭ. Naprykład, možna znajści adrazu niekalki varyjantaŭ u rajonie Sucharava. Ź plusaŭ kankretna hetaj adnuški — paasobny sanvuzieł i śviežy ramont.
Ci voś u Malinaŭcy na Bialeckaha — taksama 150 dalaraŭ, ale haspadary hatovy pahandlavacca. Kvatera na 7-m paviersie, ciopłaja, z usim nieabchodnym, akramia pralnaj mašyny. Dobra raźvitaja infrastruktura.
Kali pasunuć košt chacia b da 200 dalaraŭ, to kolkaść kvater vyrastaje ŭ razy — na siońnia tolki na adnym «Anłajniery» jość bolš za 500 prapanoŭ ad ułaśnikaŭ i ahienctvaŭ. Za 200 dalaraŭ možna źniać dosyć niebłahija varyjanty ŭ samym centry — pa praśpiekcie Niezaležnaści ci na vulicy Špalernaj.
Voś, naprykład, takaja stalinka pa praśpiekcie Niezaležnaści z draŭlanaj padłohaj. Jość kanapa, kuchnia, kampjutarny stoł z kresłam, chaładzilnik, posud. Idealny varyjant dla fryłansiera ci prosta čałavieka, jaki časta pracuje z doma za kampom.
A kali mieć u rasparadžeńni 300 dalaraŭ u miesiac na kvateru, to vybar uvohule robicca šykoŭnym — na siońnia ŭ stalicy aktualnyja bolš za dźvie tysiačy prapanoŭ na luby hust.
Čytajcie taksama:
«Ryełtary choram kažuć, što narod pakul u stupary». Što adbyvajecca na rynku nieruchomaści
Łukašenka choča, kab kiraŭniki rajvykankamaŭ pryznačali i dyrektaraŭ pryvatnych struktur13
Kamientary