Ksiondz-ekstremist. Čamu śviatar z Pastaŭ terminova źjechaŭ ź Biełarusi
Ksiondz Andžej Bulčak — probašč parafii Jezusa Miłasernaha ŭ Pastavach. Za čas svajho słužeńnia jon zbudavaŭ dva kaścioły — u Čašnikach i Pastavach. Niadaŭna im zacikavilisia siłaviki.
Padrabiaznaści adjezdu jon raskazaŭ u intervju Viačasłavu Barku, inšamu ksiandzu, jaki znachodzicca ŭ emihracyi.
Andžej Bulčak, hramadzianin Polščy, słužyŭ u Biełarusi 14 hod.
29 sakavika śviatar terminova pakinuŭ Biełaruś. Na ksiandza Andžeja zaviali administracyjnuju spravu za karotkaje videa, raźmieščanaje na pačatku sakavika na jutub-kanale, jaki razam z kaścielnaj moładździu vioŭ śviatar.
U rolik z nazvaj «List da polek i palakaŭ», u jakim dziaŭčyna ź Biełarusi piša list palakam i tłumačyć, što ludzi suprać vajny, bačnaje łoha «Biełsat» i bieła-čyrvona-biełyja ściahi. Heta i stała padstavaj dla zaviadzieńnia administracyjnaj spravy, jakaja tak i nie dajšła da suda — była adpraŭlenaja na dapracoŭku.
«Kali jechali ź milicyjanieram u mašynie, kab zrabić aryšt kampjutara, ja kažu jamu: «Ja da vas i ni da kaho nie maju nijakaj kryŭdy i zła. Viedaju, što vy na svajoj pracy, ale možna i pamianiać pracu, kab žyć spakojna», — raskazvaje pra tyja padziei ksiondz.
U siaredzinie traŭnia pavinien byŭ skončycca dazvoł na śviatarskaje słužeńnie ksiandza Andžeja. U takich umovach jon paličyŭ za lepšaje źjechać ź Biełarusi, dzie prajšła pałova jaho śviatarskaha žyćcia. Taksama Andžej Bulčak adznačyŭ, što nie stračvaje nadziei viarnucca ŭ Pastavy praź niejki čas.
«Za vajnoj staić zło, Satana, za dabrom — Boh. Śviatar nie moža stajać na baku zła, vajny. My jak śviatary nie možam kazać: aj, maja chata z kraju. Ja nadta mocna lublu biełarusaŭ, Biełaruś i kaścioł, kab maŭčać. Nie mahu. Kali my budziem maŭčać, i za słovy budziem adkazvać pierad Boham, i za maŭčańnie taksama.
Nie vajavać z uładaj, ale vajavać sa złym ducham, Satanoj, bo jon staić na baku vajny, a my — słuhi supakoju, miru i zhody. My, ksiandzy, pravasłaŭnyja śviatary, kožny chryścijanin — na baku dabra.
Papa Rymski Jan Pavieł II pryjechaŭ u Polšču, kali byŭ kamunizm, i skazaŭ takija važnyja słovy: «Nie bojciesia! Nie bojciesia». Kali zrazumiejem sens hetych słoŭ, dyk nie budziem bajacca, bo my na baku dabra, a zło budzie kryčać, budzie niešta rabić, ale my pieramožam, bo Boh z nami».
Śviatary za kratami — nie siensacyja dla Biełarusi: bolej za paŭtary hady znachodzicca ŭ SIZA pravasłaŭny ajciec Siarhiej Razanovič z Brestčyny, da suda ŭ izalatary znachodziŭsia zatrymany za antyvajenny płakat hreka-katalicki śviatar Vasil Jahoraŭ z Mahilova, zatrymany ksiondz z Łyntupaŭ Alaksandr Baran.
«Kali carkva admaŭlajecca padtrymlivać ludziej u turmach, jana advaročvajecca ad Chrysta». Ščyraje intervju z ajcom Alaksandram Šramko
Archijepiskap Jeŭstracij: Idei Pucina — heta nie zahadkavaść ruskaj dušy, nie varyjant normy, a absalutnaje zło — takoje ž, jakim niekali byŭ nacyzm
Što zapisana aficyjnaj pryčynaj śmierci adzinaha syna Jarmošynaj?9
Kamientary