«Siaredni kłas stanie biednym, a biednyja stanuć žabrakami». Ekśpiert pra toje, što čakaje rasijski narod praz sankcyi
«Sa škadavańniem mahu adznačyć, što bolšaść žycharoŭ Rasii, navat razumnych i adukavanych nie razumieje, što nas čakaje. Pasprabuju rastłumačyć, što kankretna čakaje roznyja katehoryi hramadzian ‒ ad biełych da sinich kaŭnierykaŭ i biudžetnikaŭ». Piša viadomy rasijski finansist Maksim Mironaŭ.
Pavodle maich acenak, u 2022 h. realnyja dachody nasielnictva ŭpaduć u 1,5 — 2 razy. Adnak heta nie budzie raŭnamiernaje padzieńnie dachodaŭ ‒ heta značyć vy nie možacie prosta padzialić svaju zarpłatu ŭ dva razy i pryjści da vysnovy, što i tak možna narmalna žyć.
Nas čakajuć strukturnyja źmieny ŭ ekanomicy, supastaŭnyja ź źmienami na rubiažy 1980-1990-ch hh. Tady cełyja kłasy, jakija žyli adnosna niabłaha ŭ SSSR ‒ navukoŭcy, prafiesary i dacenty, supracoŭniki abaronnych pradpryjemstvaŭ, vajennyja i mnohija inšyja imhnienna skacilisia ŭ haleču, i im daviałosia terminova šukać novaje miesca ŭ žyćci, kab prosta vyžyć.
Ciapier nas čakaje niešta vielmi padobnaje.
Biełyja kaŭnieryki.
Za apošnija 20 hadoŭ zjaviŭsia vielizarny kłas rabotnikaŭ, jaki časta nazyvajuć ofisnym płanktonam, ‒ supracoŭnikaŭ bankaŭ, finansavych i aŭdytarskich kampanij, ofisnych rabotnikaŭ rasijskich i mižnarodnych kampanij i h.d. Zaniataść i zarpłaty ŭ hetym siektary skarociacca ŭ razy.
Razam, my vielmi chutka ŭbačym vojska byłych vysakakłasnych aŭdytaraŭ i kansultantaŭ, jakim pryjdziecca terminova pierakvalifikavacca i budavać inšuju karjeru. Anałahičnyja źmieny čakajuć:
‒ finansavy siektar, asabliva ciažki ŭdar budzie pa inviestycyjnych bankach;
‒ kansultantaŭ, markietołahaŭ, tarhietołohaŭ ‒ va ŭmovach padzieńnia dachodaŭ i spažyvieckaha popytu, a taksama błakavańnia placovak dla raźmiaščeńnia rekłamy, vydatki kampanij na padobnyja pasłuhi rezka skarociacca;
‒ ahułam ofisnych rabotnikaŭ ‒ my bačym, kolki zachodnich kampanij syšło z Rasii, ich ofisny piersanał nie zmoža znajści anałahičnuju pracu, bo rasijskija kampanii taksama znachodziacca ŭ kryzisie i, chutčej, buduć dumać ab skaračeńniach, čym ab najmańni piersanału;
‒ šyroki kłas ludziej, chto zarablaŭ z dapamohaj sacsietak ‒ Instahrama, Fejsbuka. VPN pastavić sabie nievialiki pracent karystalnikaŭ sacsietak, heta značyć kolkaść patencyjnych klijentaŭ (jakija pry hetym jašče stanuć biadniejšymi) va ŭsich, chto pabudavaŭ svoj biźnies vakoł Instahrama i Fejsbuka, rezka ŭpadzie.
Bolšaści z takich ludziej pryjdziecca šukać novy sposab zarablać na žyćcio.
Ja pryvioŭ daloka nie poŭny śpis siektaraŭ, dzie zaniatyja biełyja kaŭnieryki, i jakija vielmi mocna pacierpiać.
Zrešty, značnaja častka rasijskaha hramadstva ich niedalublivaje. Chtości skaža, što tak im i treba, mienš buduć pa hiejropam katacca i fuahru jeści.
Prablema ŭ tym, što mnohija siektary, dzie zaniatyja sinija kaŭnieryki taksama vielmi mocna pacierpiać.
My bačym, što aŭtamabilnaja halina ŭ Rasii faktyčna ŭstała. Toyota, BMW, Volkswagen i inšyja zamiežnyja vytvorcy abviaścili ab prypynku zavodaŭ amal adrazu paśla pačatku vajny. Ale ciapier užo ŭstaŭ i AŭtaVAZ, a taksama častkova KamAZ.
Viadoma, vykarystoŭvajučy staryja čarciažy i, mahčyma, kantrabandu kampanientaŭ, častkova vytvorčaść atrymajecca adnavić, ale značnaja častka rabotnikaŭ apyniecca biez pracy. Razam z pradpryjemstvami-sumiežnikami i padradčykami na vulicy apynucca sotni tysiač čałaviek.
Avijacyjnuju halinu čakajuć maštabnyja skaračeńni. Rasijskija avijapieravozčyki ŭžo nie mohuć lotać u zamiežža. Chutka z-za niemahčymaści absłuhoŭvać samaloty pryjdziecca skaračać i ŭnutranyja pieravozki. Biez pracy zastanucca piłoty, ściuardy i ściuardesy, naziemny absłuhoŭvajučy piersanał i h. d.
Restaranny biźnies taksama čakajuć maštabnyja skaračeńni. My ŭžo viedajem, što McDonalds syšoŭ z Rasii, a heta 60 000 zaniatych plus 100 000 zaniatych u pradpryjemstvach-pastaŭščykach. Adnak heta nie kaniec historyi.
Rasijski narod ciapier značna źbiadnieje, heta značyć popyt na restarany rezka ŭpadzie. Taksama ŭpadzie popyt na sałony pryhažości, kinateatry, padarožža, pasłuhi taksi i h. d.
Značnaj kolkaści ludziej, jakija zaniatyja ŭ hetych halinach pryjdziecca mianiać prafiesiju, bo vielmi chutka prosta nie budzie dastatkovaj kolkaści pracoŭnych miescaŭ pa ich profili.
Rezka skarocicca budaŭničaja halina, bo narod i kampanii buduć dumać, jak vyžyć, a nie jak kupić novuju kvateru abo ofis. Tym bolš praz masavuju emihracyju i ŭcioki zachodnich kampanij na rynak vyvalacca kvatery i ofisy, što taksama źnizić stymuły inviestavać u novaje budaŭnictva.
Biudžetniki. Jany pacierpiać, chutčej za ŭsio, mieniej. Dachody ŭ realnym vyražeńni ŭ ich, viadoma, upaduć (im buduć płacić abiascenienymi rublami), ale jany choć zachavajuć pracu, i im nie treba budzie dumać ab terminovaj źmienie prafiesii.
Siłavikam i prapahandystam, chutčej za ŭsio, zarpłaty buduć indeksavać pa inflacyi ci navat vyšej. Hetyja katehoryi Pucin budzie pieścić i pieścić da apošniaha.
Ja paznačyŭ tolki niekatoryja z mahčymych trendaŭ. Na samaj spravie poŭnuju karcinu taho, što budzie adbyvacca, pakul nie viedaje nichto.
Da siońniašniaha momantu historyja nie viedała ŭviadzieńnia padobnych sankcyj suprać krainy takoha pamieru.
Kali razumnyja siły ŭ rasijskaj uładzie voźmuć vierch i zmohuć pierakanać Pucina spynić hetuju biessensoŭnuju vajnu, to možna čakać, što značnaja častka sankcyj budzie skasavanaja abo asłablenaja, i tady rasijskaja ekanomika zmoža paźbiehnuć zusim užo katastrafičnych nastupstvaŭ.
Kali ž Pucin praciahnie vajnu, to chutka my budziem čytać šmatlikija historyi pra pałamanyja losy ŭžo ŭnutry Rasii. Siaredni kłas stanie biednym, a biednyja stanuć žabrakami. Vielmi spadziajusia, što jany heta zmohuć zrazumieć.
Niezaležnyja sacyjołahi: 71% rasijan adčuvaje honar z-za vajny z Ukrainaj
«Kali ŭ vas zastaniecca pałova ciapierašniaha zarobku ‒ heta budzie dobra». Rynak pracy ŭ Biełarusi čakaje šok
Kolki vy zmožacie pražyć biez zarobku? Praviły, jak padrychtavacca i vyžyć u kryzis
Što zapisana aficyjnaj pryčynaj śmierci adzinaha syna Jarmošynaj?5
Kamientary