«Stolki nie było nikoli». U paliklinikach robicca niešta niejmaviernaje, taki napłyŭ kavidnych pacyjentaŭ
U susiednich Łatvii i Litvie kavid bje rekordy — tam za dzień fiksujuć pa 9 i 10 tysiač novych vypadkaŭ. Biełaruskaja ž aficyjnaja statystyka choć i raście ź siaredziny studzienia, ale nie pierakročvaje parohu 2000 kiejsaŭ. Jakaja nasamreč situacyja na miescach?
«Usie mazki, jakija my brali, pakazali kavid»
Značny rost zaŭvažajuć daktary ŭ paliklinikach. Jak nam raskazali ŭ adnoj ź ich u Minsku, dniami byŭ pik novych vypadkaŭ — bolš za 160 za dzień. Heta tolki ŭ ich ustanovie. Takich ličbaŭ nie było nikoli.
«Pracentaŭ 70 testaŭ akazvajucca stanoŭčymi. Apošni raz na vizitach naohuł usie mazki, jakija my brali, pakazali kavid», — dzielicca terapieŭt.
U jaho paliklinicy šmat daktaroŭ chvareje, tamu astatnim miedykam davodzicca zastavacca na pryjomie dapazna, časam vyzvalajucca tolki a 10-j viečara. Kali raniej u dapamohu dasyłali studentaŭ ź mieduniviersiteta ci beerseemaŭcaŭ (im daručali, naprykład, raznosić recepty), to ciapier hetaha niama.
Što praŭda, dadaje terapieŭt, ciapier ludzi chvarejuć lahčej. Heta tłumačać asablivaściu «amikrona» (Minski haradski centr hihijeny i epidemijałohii paviedamlaŭ, što 80% vypadkaŭ kavidu ŭ stalicy — mienavita hety štam).
«Doktar niadaŭna chvareła — tolki nasmark byŭ. Kali b nie zrabiła test, to i nie viedała b, što heta «karona», — zhadvaje surazmoŭca.
Rajcentr: abvastreńnie nazirajuć učastkovyja terapieŭty, ale nie balnicy
Fielčar stancyi chutkaj dapamohi ŭ adnym z rajcentraŭ Viciebskaj vobłaści zaŭvažaje, što ŭ ich kavidnych vyklikaŭ mała.
«Tak, časta vyklikajuć, kali tempieratura, ale, jak praviła, ni «amikronam», ni «deltaj» tam nie pachnie. My papiarednie stavim dyjahnaz «vostraja reśpiratornaja infiekcyja», kali niama padazreńnia na pnieŭmaniju.
Tym časam kaleha z palikliniki kaža, što ŭžo dva tydni jak u dzień «plusuje» bolš za dziesiać pacyjentaŭ — pačynaje pavialičvacca zachvorvalnaść», — kaža miedyk.
U rajonnaj balnicy miescaŭ dastatkova, navat adździaleńnie piedyjatryi, jakoje ŭ papiarednija chvali addavali pad kavid, viarnuli da zvyčajnaj pracy. Pry hetym ciažkich pacyjentaŭ niamała.
«Amikron, moža, i lahčej pieranosicca, ale jość i inšyja štamy. Pulmanałahičnaja reanimacyja pracuje ŭ štatnym režymie, i tam redka jość volnyja miescy», — adznačaje fielčar.
Balnicy ŭ vialikich haradach znoŭ rychtujucca addać pad kavid dadatkovyja adździaleńni
U bujnych haradach ža rost kolkaści pacyjentaŭ adčuvajuć užo i balnicy. Niedzie paharšeńnie situacyi nazirajecca ź siaredziny studzienia, niedzie jano pačałosia tydzień tamu.
«Niekalki miesiacaŭ tamu jašče było pa miescaŭ 10 volnych u kožnym adździaleńni, a ciapier na kalidor znoŭ kładuć», — dzielicca miedyk, jakaja pracuje ŭ pryjomnym pakoi staličnaj balnicy. Pad kavid tam addadziena šeść adździaleńniaŭ.
Jana dadaje, što reanimacyi ŭ ich zaŭsiody zapoŭnienyja. Razmovy pra toje, kab pieravieści ŭ lik kavidnych dadaktovyja adździaleńni, viaducca ŭ niekalkich balnicach Minska.
U adnoj ź Viciebskich balnic, raskazvajuć daktary, taksama rychtujucca addać pad kavid dadatkovaje adździaleńnie (jaho tolki ŭ śniežni zrabili čystym i ciapier znoŭ viartajuć pad karanavirusnych pacyjentaŭ).
«Jość tendencyja da pavyšeńnia kolkaści chvorych. Rost pačaŭsia paśla navahodnich śviataŭ, niedzie plus 20 pracentaŭ. Ale situacyja nie krytyčnaja, miescaŭ pakul chapaje. «Amikron» praciakaje lahčej, jaho simptomy padobnyja da vostrych rotavirusnych infiekcyj, ale i zaraznaść jaho vyšejšaja, čym u inšych štamaŭ», — kaža viciebski miedyk.
Inšy doktar ź viciebskaj balnicy aceńvaje zahruzku miedykaŭ jak zvyčajnuju. Ciakučki kadraŭ niama, daktary biaruć kavidnych pacyjentaŭ, bo jość dapłaty.
«Siońnia aŭrału z kavidam niama, ale jon prahnazujecca», — apisvaje razmoŭca situacyju ŭ balnicach.
Kamientary