«Nie tak farmulavała pytańni da śviedki na sudzie». Čamu advakatku Babaryki adchilili ad pracy?
U kastryčniku dvaich advakataŭ Viktara Babaryki — Natallu Mackievič i Jaŭhiena Pylčanku — adchilili ad pracy. Miniust pačaŭ suprać ich dyscyplinarnuju vytvorčaść.
«Adnačasova z hetym jašče da raźbiralnictva aboje advakaty raptoŭna byli adchileny ad svajoj pracy. Padstavy, jakija vykarystany dla pačatku dyscyplinarnych vytvorčaściaŭ, absalutna absurdnyja i śmiešnyja.
Naprykład, Mackievič staviać u vinu, što jana niejak nie tak farmulavała pytańni da śviedki na sudovym pasiadžeńni», — raskazaŭ na bryfinhu eks-advakat Dźmitryj Łajeŭski.
Na hetym tydni Minskaja kalehija advakataŭ razhledzić pytańnie adnosna licenzii Natalli Mackievič i Jaŭhiena Pylčanki.
Ahułam užo čatyroch advakataŭ Babaryki adchilili ad pracy. Alaksandr Pylčanka ŭ kastryčniku 2020-ha byŭ pazbaŭleny licenzii, Dźmitryja Łajeŭskaha vyklučyli z kalehii advakataŭ u lipieni. Na ciapierašni momant u Babaryki nie zastałosia abaroncaŭ.
«Źviazać heta z čymści, akramia jak z asobaj samoha padabaronnaha, vielmi ciažka», — kamientuje Dźmitryj Łajeŭski.
Advakaty, jakija praciahvajuć svaju dziejnaść u Biełarusi, u krochkim stanoviščy.
«Umovy leta 2020 hoda i ciapierašnija dla vykazvańnia svajho mierkavańnia ŭ advakatury istotna adroźnivajucca. Tady taksama byli vysokija ryzyki vykazvańnia svajho mierkavańnia, ale było adčuvańnie mahčymaści pačatku transfarmacyi ŭ hramadstvie. Siońnia jak minimum niama takoha adčuvańnia, kali kazać pra najbližejšuju pierśpiektyvu. Miniust vałodaje biaźmiežnymi paŭnamoctvami, — kaža Dźmitryj Łajeŭski i nazyvaje pryčyny, čamu jaho kalehi vyrašajuć maŭčać:
— Abo jany chočuć pasprabavać maksimalna być karysnymi svaim klijentam i nie ryzykavać, abo chtości prosta kirujecca tym, što choča pracavać, atrymlivać hodny zarobak za peŭny abjem pracy. Choć heta nie značyć, što jany nie padtrymlivajuć u dušy kaštoŭnaść svabody prafiesii i niejkuju karparatyŭnaść».
Čytajcie taksama:
Jak spravy ŭ Viktara Babaryki? Jahony štab raskazaŭ apošnija naviny
Brat udavy Zielcara: Kadebisty išli ŭ kvateru pa mianie9
Kamientary