«Mikoła kaža, što prysud budzie ŭ kancy kastryčnika». Statkieviča dastaviać u zału suda dla ŭdziełu ŭ sprečkach bakoŭ

13 kastryčnika spoŭniłasia 500 dzion z momantu zatrymańnia Mikoły Statkieviča. 31 maja 2020 hoda jaho vyciahnuli z aŭtamabila pa darozie na minski Kamaroŭski rynak, dzie Statkievič źbiraŭsia paŭdzielničać u pieradvybarčym pikiecie Śviatłany Cichanoŭskaj.

Sudzić Mikołu Statkieviča pačali razam ź Siarhiejem Cichanoŭskim, Iharam Łosikam, Arciomam Sakavym, Dźmitryjem Papovym: Uładzimiram Cyhanovičam u kancy červienia 2021-ha.

«Apošnim časam listavańnie ŭ nas ź Mikołam znoŭ naładziłasia, — raskazała Maryna Adamovič. — Jon vielmi jomisty ŭ svaich listach. Ja zaŭsiody ździŭlajusia, jak jon moža na adnym liściku stolki temaŭ zakranuć. Što datyčyć umovaŭ utrymańnia, to pisaŭ, što ŭ kamiery ŭ jaho čamuści nie było ŭklučanaje aciapleńnie. Zhadvaŭ, što kali vychodziŭ na špacyr, to byŭ vymušany raspranacca. Bo na vulicy było zaŭvažna ciaplej, čym unutry».

Pa słovach Maryny Adamovič, pra chod pracesu ŭ spravie muža jana amal ničoha nie viedaje.

Advakaty abvinavačanych nachodziacca pad padpiskaj ab nievydavańni i ničoha pra pasiedžańni nie raskazvajuć. Jana viedaje tolki, što Mikoła prysutničaŭ na pieršych troch, i toje, tolki pa 15 pieršych chvilinaŭ, paśla čaho sudździa vydalaŭ Statkieviča z zały. Ciapier palitviazień adchileny ad suda da momantu pačatku sprečak bakoŭ. Tamu kali jon zachoča, to apošniaje słova zmoža skazać. Maryna Adamovič kaža, što heta moža zdarycca jašče ŭ kastryčniku.

«Mikoła piša, što, pa jahonych adčuvańniach, prysud moža być abvieščany ŭžo da kanca miesiaca, — kaža Maryna Adamovič. — Jak vy razumiejecie, infarmacyi z pracesu ŭ nas amal niama. Advakaty nie mohuć ničoha raskazvać. Mikoła sustrakajecca sa svaim advakatam, siedziačy ŭ kletcy, u toj čas jak advakat znachodzicca za niekalki mietraŭ za škłom. Niama nijakaj tajemnaści sustreč i ich izalavanaści.

Čamu Mikoła dumaje ab prysudzie da kanca miesiaca, ja nie mahu dakładna skazać. Jon sam hetaha nie tłumačyć, dy takuju infarmacyju i nie prapuścili b. Mahčyma, chtości z supracoŭnikaŭ moh jamu niešta skazać. Ja mahu tolki zdahadvacca, adkul jon maje takuju infarmacyju, budavać niejkija hipotezy».

Pa słovach Adamovič, Statkievič nie maje ciapier krynic infarmacyi, navat aficyjnych. Da jaho nie dachodziać haziety, u kamiery adsutničajuć radyjo i televizar. Adnak palitviazień usio adno robić prahnozy na raźvićcio situacyi. U pryvatnaści, Statkieviča mocna turbuje chvala palityčnaj i pracoŭnaj emihracyi, jakaja pačałasia paśla žniŭnia 2020 hoda.

Pa słovach Maryny Adamovič, Mikoła Statkievič nie čakaje łahodnaha prysudu. Razam ź Iharam Alinievičam jaho možna nazvać «recydyvistam», tamu vyniesieny prysud, chutčej za ŭsio, budzie albo maksimalnym z mahčymaha, albo blizkim da jaho.

Siarhiej Cichanoŭski ličyć, što jaho prysudziać da 15 hadoŭ pazbaŭleńnia voli

• 0
• 0
• 0
• 0
• 0
• 0