Zdavali dačok, žonak, cieściaŭ, susiedziaŭ — pra što biełarusy paviedamlali ŭ milicyju ŭ žniŭni 2020
My praciahvajem analizavać vykładzienuju chakierami bazu zvarotaŭ hramadzian u dziažurnuju słužbu milicyi letam-zimoj 2020-ha. Pryvodzim vašaj uvazie ścisłyja vytrymki i nazirańni.
U bazie zafiksavana ŭsiaho tolki 2893 zvanki ŭ milicyju.
Absalutnaja bolšaść paviedamleńniaŭ nie niasie nijakaj infarmacyjnaj kaštoŭnaści: zajaŭnikam nie padabajucca huki mašyn i skandavańni pad voknami, jakija «zaminajuć adpačyvać», jany paviedamlajuć ab tym, što nazirajuć natoŭpy ludziej i simvoliku ŭ susiedskich voknach.
Aproč skarhaŭ na hučnyja huki, daminujuć nazirańni za paŭsiudnaj bieła-čyrvona-biełaj simvolikaj i nadpisami. Tak, try z čatyroch vyklikaŭ u Marjinaj Horcy — paviedamleńni ab źjaŭleńni ŭ horadzie nadpisaŭ «3%».
Ale traplajucca i kurjozy. Tak, u Bresckaj vobłaści nieabyjakavy hramadzianin paviedamiŭ nastupnaje: «Žonka ź siabroŭkaj zakidvaje ŭ paštovyja skryni ŭlotki apazicyjnaha charaktaru».
U Minsku pjanaja zajaŭnica paviedamiła, što jaje ŭłasnaja dačka idzie na mitynh. Tam ža chłopiec 96-ha hoda naradžeńnia paviedamiŭ milicyi, što jahony cieść «udzielničaje ŭ niesankcyjanavanych mierapryjemstvach».
Niechta na mahiloŭskaj trasie źviarnuŭ uvahu što dvoje mužčyn trymajuć u rukach kamieru: «Mahčyma, kaadrynatary abo błohiery».
Sustrakajecca niekalki zajaŭ ab «maciernym abmierkavańni prezidenta».
Staršynia adnaho z vybarčych učastkaŭ u Połacku paskardziłasia, što «joj pryjšoŭ list ź Minska z rekamiendacyjaj nie falsifikavać vybary prezidenta Respubliki Biełaruś».
Tam ža zajaŭnica paviedamiła, što choča bačyć na ŭčastku ŭčastkovaha, bo «chodit postorońniaja dievuška i političieski hadit».
«U domie №3 z akna danosicca pieśnia V. Coja «Pieramien», — takaja skarha taksama jość.
Niejkaja nieabyjakavaja piensijanierka «z telehram-kanała daviedałasia, što na Čyrvonaj Płoščy a 19-j płanujecca mitynh», inšaja sa spasyłkaj na plamieńnicu, jakaja žyvie ŭ Rasii, paviedamiła, što «pad Lvovam uzbrojvajucca hrupy mužčyn i hrupami vysoŭvajucca ŭ bok Biełarusi».
Z adnoj ź biełaruskich cerkvaŭ paviedamili, što la płota pastavili łampadki.
«Kala druhoha padjezda znachodziacca dźvie dziaŭčyny, jakija razmaŭlajuć na zamiežnaj movie, zajaŭnica dapuskaje, što jany pravakatary», — vypiska ź milicejskaj bazy.
«Na łavačcy la padjezda siadziać try čałavieki i kažuć, što suprać prezidenta», — jašče adzin danos.
Čytajcie taksama:
«Na mianie samoha napisali čatyry danosy». Historyk Ihar Kuźniacoŭ pra źlituju bazu zvarotaŭ u milicyju i paraleli z 1930-mi
«A što ŭ vas za prablemy? Daloka da Minska ci niama kamu padvieźci?» Publičnaja pikiroŭka Łukašenki i Pašyniana13
Kamientary