Topiać za pieramieny i pracujuć na prapahandu. Jak pa-roznamu skłaŭsia los viadučych lehiendarnaha tok-šou «5ch5»
Ciońnia modna žyć biez televizara, a ŭ dziavianostyja i nulavyja telebačańnie hladzieli ŭsie. Najbolšym popytam karystałasia pradukcyja rasijskich kanałaŭ, ale ŭ nas była svaja padstava dla honaru: lehiendarnaje moładzievaje tok-šou «5ch5». U čym jaho admietnaść i jak skłalisia losy jaho viadučych? Spojler: niekatoryja znachodziacca pa roznyja baki barykadaŭ.
Vosiem hadoŭ, bolš za tysiaču vypuskaŭ
Ciažka pavieryć, ale «5ch5» vychodziła ŭ žyvym efiry.
Tady heta była samaja vostraja pieradača na biełaruskim telebačańni. Padletki volna abmiarkoŭvali patrebnaść fizkultury ŭ škole i stasunki z nastaŭnikami, miesca žančyny ŭ siamji i zdrady, narkamaniju, padletkavuju złačynnaść i ciažarnaść.
Pieradača źjaviłasia ŭ efiry ŭ 1997-m i vychodziła vosiem hadoŭ, da 2005-ha. Za hety čas źjavilisia bolš za tysiaču vypuskaŭ. Spačatku vychodziła raz na tydzień ciaham 20 chvilin. Paźniej — čatyry razy na tydzień. U aŭtorak «5x5. Info», u sieradu išli dyskusii, u čaćvier ŭ prahramu zaprašalisia cikavyja ludzi, u piatnicu «5ch5» mieŭ muzyčny farmat. Praciahłaść tok-šou składała 52 chviliny.
Naturalna, pieradača ŭ takim farmacie nie mahła doŭha isnavać na biełaruskim telebačańni. Zamiest «5ch5» źjaviŭsia moładzievy prajekt «Plus-minus». «Pra jaho možna skazać ścisła tak: varyjacyja BRSM rasijskaj prahramy «Da barjera» Uładzimira Sałaŭjova», — iranična pisaŭ žurnalist Viačasłaŭ Korsak.
Za kadram znachodzilisia hienieralny pradziusar Juryj Ihruša, režysiory Ivan Pinihin (brat mastackaha kiraŭnika Kupałaŭskaha) i Uładzimir Drazdoŭ (taksama vystupaŭ u roli viadučaha). Ale my raskažam pra viadučych pieradačy.
Pieršy skład viadučych
Pieršymi viadučymi byli čatyry čałavieki.
Samym viadomym ź ich staŭ Dźmitryj Šepieleŭ. Paśla jon źjechaŭ va Ukrainu, dzie vioŭ roznyja šou na miascovych kanałach. U adnym ź ich pracavaŭ razam z Uładzimiram Zialenskim. U 2008-m Dźmitryja zaprasili ŭ Maskvu na «Pieršy kanał». Peŭny čas Šepieleŭ pracavaŭ adnačasova na dźvie krainy, ale ŭrešcie kančatkova pierajšoŭ na rasijskaje telebačańnie.
Hierojem śvieckaj chroniki jon staŭ paśla ramana z pop-zorkaj Žannaj Fryskie, jakaja trahična pamierła. U 2013-m jana zaciažaryła ad Šepieleva, i pry abśledavańni ŭ jaje vyjavili nieapierabielnuju puchlinu hałaŭnoha mozhu. Fryskie naradziła zdarovaha syna, sprabavała lačycca, ale praz dva hady pamierła. Šepieleŭ usimi siłami padtrymlivaŭ kachanuju, a paśla jaje śmierci vydaŭ knihu «Žanna».
Doŭhi čas Dźmitryj pracavaŭ na «Pieršym kanale» Rasii, vioŭ pieradaču «Na samaj spravie», u jakoj udzielniki abmiarkoŭvali siamiejnyja kanflikty zorak ci adno adnaho. Letaś pierajšoŭ na TNT, viadzie siamiejnaje šou «Ty jak ja».
Paśla prezidenckich vybaraŭ Šepieleŭ asudziŭ hvałt z boku siłavikoŭ. Jon pryznaŭsia, što źjechaŭ ź Biełarusi z-za palityki:
«Ja źjechaŭ z krainy zbolšaha tamu, što razumieŭ: u mianie niama pierśpiektyŭ u Biełarusi. A niama ich u mianie pa zrazumiełych pryčynach: usio, što mnie zastavałasia rabić tam praź niejkuju kolkaść hadoŭ pracy na telebačańni, — heta nadzieć šery halštuk, šery pinžak i sieści čytać naviny pra pasiaŭnyja i pra toje, što ŭ nas usio dobra.
Źjazdžajučy ź Biełarusi, ja adjazdžaŭ ad režymu. Ja suprać rečaŭ, jakija tam adbyvajucca».
Kirył Słuka vielmi aktyŭna startavaŭ na telebačańni (vioŭ šou «Adnakłaśniki»). Adnačasova sprabavaŭ siabie jak pradziusar, śpiavak i viadučy.
Słuka prydumaŭ prajekt «Biełaruś i ja», vioŭ mižnarodny konkurs maładych vykanaŭcaŭ na «Słavianskim bazary» i mižnarodny dziciačy konkus. Śpiavaŭ pieśni ŭ duecie «Ka Słuka da Kovalev» («Minsk — eto ja», «Biełoruśsija» i inšyja). U siaredzinie nulavych duet raspaŭsia.
Słuka, jaki atrymaŭ zvańnie zasłužaha artysta Biełarusi, źjechaŭ u Maskvu. U siaredzinie dziasiatych hadoŭ vystupaŭ u maskoŭskich kłubach.
Ciapier zajmajecca arhanizacyjaj zabaŭlalnych mierapryjemstvaŭ. Intervju nie daje.
Hleb Łaŭroŭ trapiŭ na kastynh vypadkova, za kampaniju ź siabrami.
Pa jaho słovach, dla pieradačy Ivan Pinihin «adbiraŭ peŭnyja rolevyja elemienty: naprykład, vysokuju dziaŭčynku, maleńkuju žvavuju dziaŭčynku, a ja prajšoŭ pad kodavym imiem «toŭsty razumny chłopčyk».
Usie hetyja hady adyhryvaju takuju rolu».
Łaŭroŭ atrymaŭ pieršuju adukacyju ŭpraŭlenca na fakultecie technałohij kiravańnia i humanitaryzacyi BNTU. Potym kala šaści hadoŭ vykładaŭ na rodnym «palitechu». U pačatku 2000-ch Ahienctvu televizijnych navin spatrebiŭsia «mižnarodnik», jaki b mieŭ televizijny vopyt, i Łaŭrova zaprasili na pracu. Jon byŭ adnym ź viadučych pieradačy «Makiej i Łaŭroŭ. Pra palityku», što vychodziła ŭ ramkach «Panaramy». Taksama byŭ redaktaram prahramy «Kłub redaktaraŭ». Niadaŭna pierajšoŭ z BT na ANT, dzie vystupaje ŭ prapahandyskaj prahramie «Budiet dopołnieno».
A voś čaćviortaja viadučaja, Hanna Durkina, źnikła z publičnaj prastory. Viadoma tolki, što ŭ siaredzinie nulavych jana pracavała na rasijskim telekanale RTR.
TNT i restarany chutkaha charčavańnia
Dźmitryj Šepieleŭ i Hanna Tabolina
Padčas efiraŭ u Šepieleva ŭ 1997-m zdaryŭsia słužbovy raman: jon pačaŭ sustrakacca z kalehaj pa pieradačy Hannaj Tabolinaj. Dziaŭčyna vahałasia, na kaho pastupać: na žurnalista ci na doktara. Žartavała, što budzie vieści na telebačańni miedycynskija pieradačy. Urešcie vybrała miedycynski.
Jany sustrakalisia siem hadoŭ, ažanilisia, ale praz try tydni raźvialisia i razyšlisia. Adkul Santa-Barbara?
Sam Šepieleŭ śćviardžaŭ, što Hańnie pahražała raźmierkavańnie ŭ pravincyju. Tamu Dźmitryj pryjšoŭ na dapamohu. Jość i inšaja viersija: maŭlaŭ, Šepieleŭ adrazu paśla šlubu źjechaŭ u Kijeŭ, mahčyma, tam u jaho źjavilisia adnosiny. U vyniku para aformiła razvod.
Hanna vyjšła druhi raz zamuž za eks-viadučaha, a ciapier biznesmiena Juryja Starcava, para haduje dvuch synoŭ. Peŭny čas Hanna pracavała vykładčycaj na kafiedry psichaterapii i miedycynskaj pschiałohii Biełaruskaj miedycynskaj akademii paśladypłomnaj adukacyi.
Z Šepielevym źviazanyja los jašče adnaho viadučaha. Mienavita jon pryvioŭ na pieradaču Dzianisa Kurjana.
Jany vučylisia ŭ adnoj škole, ale Dzianis na niekalki kłasaŭ paźniej.
«Ja vioŭ kancerty ŭ škole, Dzima mianie zaŭvažyŭ i zaprasiŭ na kastynh. Ja pryjšoŭ, navat nie viedajučy, što tam budzie. Ja staju ŭ čarzie, ale, kali nie pamylajusia, Dzima mianie tady abvioŭ vakoł», — zhadvaŭ Kurjan. Za pracu jon atrymlivaŭ 100 dalaraŭ.
Dzianis zrabiŭ paśpiachovuju karjeru na BT, vioŭ pieradačy i hulni «Sportłato». Paźniej pierajšoŭ na ONT, dzie vioŭ prajekty «Moj biznes» i prahramu «Naša ranica». Źjaŭlaŭsia kamientataram i viadučym «Jeŭrabačańnia», «Oskara» i «Hremi». Pakrysie jon syšoŭ u biznes. Adkryŭ sietku restaranaŭ chutkaha charčavańnia «Mama doma», źjaŭlajecca ich uładalnikam.
«Razumieŭ, što telebačańnie zastaniecca chobi, a nie asnoŭnym miescam. Naprykład, Dzima Šepieleŭ zaŭsiody chacieŭ i viedaŭ, što choča pracavać na hałoŭnych telekanałach, pryčym, naturalna tam, dzie jość rynak. A ja nie z taho ciesta. Prosta pryjšoŭ na Makajonka, u mianie atrymałasia, i ja palubiŭ hety žanr. Ale ja nie televiadučy pa žyćci», — pryznavaŭsia Kurjan.
U 2020 hodzie Dzianis asudziŭ hvałt siłavikoŭ, zapuściŭ svajo šou na YouTube pra biznes — «Dzie hrošy, Dzianis?».
Kaciaryna Pytleva pryjšła na pieradaču, kali joj było 14 hadoŭ.
«Režysior nabiraŭ aktyŭnych dziaciej sa škoł, i mianie adpravili taksama… u jakaści karespandenta prahramy. Ale, jašče da pieršaha efiru, ja, mabyć, čymści źviarnuła na siabie ŭvahu, tak što ŭ chutkim časie mianie zrabili adnoj ź viadučych, a paźniej dali adnu prahramu na tydzień vieści naohuł odnoj», — raskazvała jana.
Potym Pytleva viała prahramy na telebačańni («Klip-abojma», «Piknik», «120/80 news»), ahučvała muzyčnyja naviny na ANT, pracavała na radyjo «Mir» aŭtaram i viadučaj prahram na interniet-telebačańni TUT.BY. A jašče źjaŭlałasia frantmenam hurtoŭ «Piersona», «Klondajk» i Soulkitchen. U «Klondajku» jana vystupała razam ź viadomym muzykantam Maksimam Ivašynym, kaleham Alaksandra Kulinkoviča pa «Niejra Dziubiel», u Soulkitchen — z rodnaj siastroj.
Hod tamu, u lipieni 2020-ha, Pytleva napisała emacyjny post u fejsbuku, u jakim vykazała niazhodu z masavymi zatrymańniami i situacyjaj vakoł kramy Symbal.by. Na nastupny dzień kiraŭnictva BT prybrała jaje z efiru:
Kaciaryna źjaŭlałasia viadučaj prajekta «Dzień u Vialikim Horadzie» na BT. Choć zastavałasia jašče try prahramy da taho, jak prajekt musiŭ pajści ŭ letni adpačynak, Pytleva vyrašyła nie čakać zvalnieńnia i syšła z telekanała sama. Hetamu papiaredničała razmova z kiraŭnikom BT, jaki adčytvaŭ supracoŭnikaŭ, jakija vykazvajucca adrozna aficyjnaj linii prapahandy.
Uvosień 2020-ho Kacia była vymušana pakinuć Biełaruś, aścierahajučysia kryminalnaha pieraśledu. Ciapier jana viadučaja palityčnych prahram, pracuje ŭ prajekcie «Małanka» na YouTube.
Ivan Padrez taksama pačynaŭ na moładzievym tok-šou. «U tyja hady «5ch5» była adzinaj prahramaj dla moładzi. Tak, viadučych paznavali na vulicach. Ale dla mianie heta było chutčej niazručnaściu, čym dyvidendam ad prysutnaści ŭ kadry», — raskazvaŭ jon u intervju.
Padrez viadomy intelektuałam jak udzielnik biełaruskaj «Što? Dzie? Kali?», miełamanam — jak udzielnik hurta Atlantica. Ale karjeru jon zrabiŭ na telebačańni: vioŭ prahramu «TB-taksi» na ANT i «Tatu šou» na radyjo ANT, finały konkursaŭ pryhažości, prajekty «Lehiendy Live» i «Talent krainy».
«Zaŭsiody było nievierahodnaje žadańnie, kab prahramny kantent byŭ na rodnaj movie, — raskazvaŭ Ivan. — Naprykład, kali kazać pra radyjo ANT, to voś užo niekalki hadoŭ pry adbory kampazicyj dla ratacyi addajom pieravahu mienavita biełaruskamoŭnym.
Mnohija biełaruskamoŭnyja hurty (takija jak Hurma, Navi i šerah inšych, «jakija strelili») upieršyniu patrapili ŭ radyjoefir mienavita ŭ nas».
Pikam jaho karjery stała pasada dyrektara dyrekcyj śpiecprajektaŭ telekanała ANT. Ale zajmaŭ jon jaje niadoŭha: śniežań 2017 — maj 2018. Jak śćviardžajecca ŭ sacyjalnych sietkach Padreza, ź leta taho ž hoda jon pracuje ź internacyjalnaj kampanijaj mediacube.network, jakaja zajmajecca vytvorčaściu i tranślacyjaj miedyjamateryjałaŭ.
Ivan asudziŭ dziejańni siłavikoŭ, jakija źbivali mirnych demanstrantaŭ. Taksama aktyŭna vykazvajecca ŭ padtrymku advakata i palitviaźnia Maksima Znaka, ź jakim Padrez vučyŭsia ŭ adnoj škole.
Pavieł Załucki paśla škoły pastupiŭ na fakultet mižnarodnych adnosinaŭ. Ale na druhim kursie źjechaŭ pa abmienie ŭ ZŠA, dzie i zastaŭsia na 11 hadoŭ.
Pastupiŭ va Univiersitet Misury, vyvučaŭ dramu i režysuru.
Viarnuŭšysia ŭ Minsk, Załucki pajšoŭ u stendap. Pierajechaŭ u Rasiju, dzie paśpiachova vystupaje. Zrabiŭ kamin-aŭt i pryznaŭsia, što hiej. Byŭ udzielnikam prajekta «Žanočy stendap» na TNT. Žartuje i na palityčnyja temy, naprykład pra AMAP.
Ničoha dziŭnaha: jašče ŭ 1999-m Pavieł z usioj siamjoj udzielničaŭ u «Maršy Svabody».
Prabačeńnie za ŭdzieł u prapahandzie i praca za miažoj
Volha Kuksa peŭny čas pracavała na telebačańni. Ale ŭ 2006-m źjechała ŭ Paryž na vučobu. Spačatku vyvučała francuzskuju movu razam ź inšymi zamiežnymi studentami, paśla pastupiła na histaryčny fakultet znakamitaj Sarbony.
Ale tam nie było adździaleńnia dla padrychtoŭki hidaŭ. Tamu paśla Volha advučyłasia hod u Lionskim univiersitecie, zdała ispyty, prajšła stažyroŭku — paśla čaho u 2012-m atrymała dziaržaŭny dypłom ekskursavoda. Jon daje prava pravodzić ekskursiju na ŭsioj terytoryi Francyi. Ciapier Volha pracuje hidam u Paryžy.
Taksama za miažu źjechała i Volha Iljuščanka. Naprykancy nulavych hadoŭ jana žyła i pracavała ŭ Hiermanii. Inšaj infarmacyi pra jaje ŭ publičnaj prastory niama.
Vital Malinoŭski prajšoŭ kastynh z druhoj sproby.
Vioŭ rubryku «Muzyčnaja piatnica» razam z Kaciarynaj Pytlevaj.
«Pryznajusia, było nie vielmi kamfortna pracavać z aŭdytoryjaj, bolš padabałasia havaryć u kamieru. Adnojčy mianie navat… vyhnali z prahramy, ale potym znoŭ uziali», — zhadvaŭ jon.
Paśla jon pracavaŭ na biełaruskamoŭnaj radyjostancyi «Stalica». Ciapier hałoŭny redaktar «Radyjo-Minsk».
Taksama na «5×5» pracavała Natalla Kopacieva. Paźniej jana pačała pracu ŭ Ahienctvie telenavinaŭ. U 2010-m była pryznana lepšym reparcioram. Praź dziesiać hadoŭ, u červieni 2020-ha, jana napisała post u sacyjalnych sietkach i paprasiła prabačeńnie, što zajmałasia prapahandaj.
«Mnie 19, i ja imhnienna zakručvajusia ŭ hetym młynku dla kavy. Pačynajecca z praściackaha — siužety pra zaapark i darožnikaŭ, opa, u jaje atrymlivajecca, dyk damo joj tvorčuju temku dla vynikovaj prahramy vychadnoha dnia. Chronamietraž užo 5-8 chvilin. Aha, dy ŭ jaje i heta atrymlivajecca. A siońnia tam mitynh, a źjeździ dy zdymi.
Viedajcie, mnie 33, a TAM ničoha nie źmianiłasia. Zdymać vuličnyja pratesty pa-raniejšamu adpraŭlajuć učorašnich vypusknikoŭ. Raboŭ. Tak heta i nazyvajecca ŭ maciorych… jakoje ž inšaje słova padabrać, akramia prapahandystaŭ.
Sami jany na takija zdymki nie vyjazdžali i nie vyjazdžajuć. Bajacca».
Kamientary