Čamu viełasipied — bolš ekałahičny haradski transpart, čym elektrakar
Pierachod z aŭtatranspartu na viełasipiedy dapamoža skaracić vykidy vuhlarodu.
Moža zdavacca, što elektryčny transpart zachoplivaje śviet, ale nasamreč heta nie tak. U minułym hodzie tolki 2% z usich novych mašyn pracavali na elektryčnaści. I navat kali ŭsie zavody śvieta pačnuć źbirać tolki elektrakary, spatrebicca 15-20 hadoŭ, kab zamianić mašyny, što pracujuć na vykapniovym palivie.
Bolš za toje, pierachod na elektrakary nie dazvolić damahčysia chutkaha źnižeńnia vykidaŭ vuhlarodu. Častkova heta źviazana z tym, što vytvorčaść elektryčnaha transparta sama pa sabie pryvodzić da atmaśfiernych vykidaŭ. Stvareńnie transpartnaj infrastruktury — naprykład daroh — taksama supravadžajecca vykidami vuhlarodu, piša 20minutes.fr.
Ale jość mahčymaść dastatkova chutka vyrašyć prablemu vykidaŭ ad transpartu. Dla hetaha varta prosta pierajści na bolš aktyŭnyja sposaby pieramiaščeńnia — pierasieści na viełasipied abo elektryčny viełasipied ci ŭvohule pierasoŭvacca pieššu. Hetyja varyjanty pieramiaščeńnia bolš tannyja i karysnyja dla zdaroŭja i ekałohii. Bolš za toje, admova ad aŭtamabilaŭ dazvoliła b razhruzić vulicy miehapolisaŭ.
Zhodna z novym daśledavańniem, ludzi, jakija pierasoŭvajucca pieššu ci na viełasipiedzie, spryjajuć mienšaj kolkaści atmaśfiernych vykidaŭ, čym tyja, chto karystajecca aŭtamabilami, asabliva ŭ haradach. Pryčym roźnica vielmi vialikaja — ź pierachodam na štodzionnaje pieramiaščeńnie na viełasipiedach vykidy źmianšajucca na 84%. Kali ž paraŭnoŭvać vykidy vuhlarodu padčas adnoj pajezdki, pierachod na viełasipiedy vyklikaje źmianšeńnie vykidaŭ prykładna ŭ 30 razoŭ u paraŭnańni z mašynaj na vykapniovym palivie i ŭ 10 razoŭ u paraŭnańni z elektrakaram.
Kamientary