Baćka miedsiastry ź Viciebska, jakoj dali paŭtara hoda: Moj syn słužyć u AMAPie, pieražyvaje za siastru
Kali Jula papałasia, bratu nie dali pavyšeńnia pa słužbie.
22-hadovaja Julija Kašavierava ŭ minułym hodzie skončyła Viciebski medyčny kaledž pa specyjalnaści «lačebnaja sprava» i 29 lipienia pastupiła na pracu medyčnaj siastroj u 103-ju desantnuju bryhadu. Dziaŭčynu zvolnili z pracy 9 kastryčnika, paśla taho jak 4 kastryčnika jaje zatrymali i zaviali spravu za ŭdzieł u akcyi pa artykule 23.34.
Sud nad joju pačaŭsia 7 kastryčnika, spravu nakiravali na dapracoŭku, a samu Juliju adpuścili. Ale 20 kastryčnika na kvateru pryjechali čaćviora supracoŭnikaŭ milicyi, jakija praviali vobšuk i znoŭ zatrymali Juliju. Z vobšukam pryjaždžali jašče i 22 kastryčnika. Spravu zaviali pa častcy 1 artykuła 339 Kryminalnaha kodeksu («złosnaje chulihanstva»). Potym novy śledčy pierakvalifikavaŭ spravu na častku 2 artykuła 339.
«Paśla vypusku Julija adpracavała krychu bolš za dva miesiacy, — kaža Svabodzie baćka Julii Siarhiej Kašavieraŭ. — Dahetul jana vučyłasia ŭ inšaj navučalnaj ustanovie, ale tam nie spadabałasia, vyrašyła pastupić u medyčny kaledž. Heta było jaje rašeńnie».
Siarhiej Kašavieraŭ — były vajskoviec, padpałkoŭnik zapasu, zvolniŭsia ŭ 2013 hodzie. Za try miesiacy da zatrymańnia Julii ŭ jaje pamierła maci, jakaja chvareła na rak.
«Nam davali pražyć paru miesiacaŭ, my pražyli hod i try, skažam tak, krychu pavajavali, jak mahli, — kaža Siarhiej Kašavieraŭ. — Heta jakraz byŭ Dzień nastaŭnika, ja tady joj napisaŭ, što jakraz try miesiacy, jak pamierła maci. Jana skazała, što pojdzie ŭ kramu, potym źbirałasia ŭ carkvu. Pajechała ź siabroŭkaj, uziała ŭdzieł u šeści. A da carkvy viečaram nie dajšła, jaje zabrali».
Siarhiej Kašavieraŭ naradziŭsia va Ŭkrainie, ažaniŭsia i zastaŭsia ŭ Biełarusi.
«Samy vialiki paradoks, što ŭ mianie jašče jość syn, jaki słužyć u Mienskim abłasnym AMAPie, — kaža baćka Julii Kašavieravaj. — Kali Jula papałasia, jamu nie dali prasoŭvańnia pa słužbie. Zdavaŭ narmatyvy, pavinien byŭ pierajści ŭ inšuju hrupu. Ale z toj pryčyny, što na siastru raspačali kryminalnuju spravu, jon nie pajechaŭ. Brat, viadoma, pieražyvaje za siastru».
Pavodle Siarhieja Kašavierava, Julija paddałasia emocyjam, i spravu treba było razhladać pa administracyjnym, a nie pa kryminalnym artykule.
«Heta majo mierkavańnie, i ja jaho trymajusia, — kaža jon. — Jość videa, vyrazna ŭsio bačna, jana zrabiła try ŭdary, umiacina ŭ mašynie 2 milimetry. Jaje, pa-rusku kažučy, možna było kułakom vyraŭniać. A joj paličyli jašče i bakavyja dźviery, da jakich jana nie dakranałasia, zrabili ź jaje spačatku arhanizatara, što masku niejkuju zdymała, a jana jaje nie zdymała».
Baćka Julii prahladaŭ zapis zdareńnia na vialikim ekranie, bo na sudzie jaho hladzieli na noŭtbuku, a hety pamier nie dazvalaje ŭsio zaŭvažyć.
«Taho, što Julija ŭ niekaha sarvała hetuju masku, niama nidzie. Jana padymała jaje kala mašyny, potym jana jaje vypuściła, kali pyrsnuli haz, i potym druhi raz padniała. Usie videa my pradstavili sudu, adnak sud paličyŭ, što jana nibyta sarvała. Choć nivodzin z amapaŭcaŭ nia bačyŭ i nia moh paćvierdzić, što jana niešta zdymała».
Siarhiej kaža, što dačka ŭdaryła pa milicejskaj mašynie praz emocyi.
«Jašče kali vučyłasia ŭ kaledžy, jechała ŭ aŭtobusie, u pasažyra zdaryŭsia prystup epilepsii. Usie ŭciakli, a jana zastałasia, akazała pieršuju medyčnuju dapamohu, dastała jazyk. Patelefanavała ŭ «chutkuju» i adpraviła, — kaža baćka. — Jana emacyjna ŭsio ŭsprymaje i imkniecca dapamahčy. I ŭ hetym vypadku jana ŭbačyła, što čałaviek upaŭ, i joj chaciełasia dapamahčy».
Siarhieju Kašavieravu ŭžo dazvolili pieršaje spatkańnie z dačkoj, jano adbudziecca ŭ bližejšyja dni. Jon kaža, što dačka pamianiałasia i pa listach bačna, što «stała bolš surjoznaj i darosłaj».
«Ja mierkavaŭ, što daduć navat bolš, uličvajučy sytuacyju i toje, jakija ŭsim dajuć terminy. Ale ja čakaŭ umoŭnaha terminu. Dali 1,6 realnaha. Ale ja liču, što jana ŭsio ŭśviadomiła i možna było vyrašać pytańnie ŭmoŭnaha terminu».
Julija prasiła pieradać joj medyčnyja knihi, adnak u SIZA nie dazvolili. Jana maryć na voli zajmacca svajoj lubimaj spravaj — medycynaj.
Za sarvanuju z amapaŭca kiepku i ŭvahnutaść na milicejskim aŭto: u Viciebsku sudziać 22-hadovuju miedsiastru desantnikaŭ
U Viciebsku prakuror paprasiŭ dla miedsiastry 6 hadoŭ kałonii za try ŭdary pa mašynie
22-hadovaj žycharcy Viciebska, jakaja ŭdaryła pa milicejskim aŭto, pavinny byli vynieści prysud. Ale sud vyrašyŭ raźbiracca dalej
Kolki nasamreč ciahnucca pracoŭnyja pajezdki Łukašenki? Cikavyja ličby14
Kamientary