U Viciebsku prakuror paprasiŭ dla miedsiastry 6 hadoŭ kałonii za try ŭdary pa mašynie

Julija Kašavierava pryznała vinu častkova. Jana nie admaŭlała, što paśla taho, jak joj nie dali akazać dapamohu paciarpiełamu, nie strymałasia i naniesła try ŭdary pa zadnich dźviarach milicejskaha mikraaŭtobusa. Ale zapeŭniła, što pa pravych bakavych udaraŭ nie nanosiła, masku i kiepku z supracoŭnika MUS nie zryvała.

Prakuratura zapatrabavała 6 hadoŭ

Prakuror Łabacki 19 lutaha pierakonvaŭ, što ŭčynienaje złačynstva źviazanaje z aktyŭnym niepadparadkavańniem supracoŭnikam MUS pry vykanańni imi słužbovych abaviazkaŭ. Prasiŭ pryznać Juliju Kašavieravu vinavataj va ŭčynieńni złačynstva pavodle č. 2 art. 339 KK i prymianić u dačynieńni da jaje izalacyju ad hramadstva.

Nastojvaŭ ličyć jaje dziejańni naŭmysnymi, jakija hruba parušali hramadski paradak, vykazvali jaŭnuju niepavahu da hramadstva i supravadžalisia paškodžańniem čužoj majomaści.

Prasiŭ pryznačyć Kašavieravaj pakarańnie ŭ vyhladzie źniavoleńnia terminam na 6 hadoŭ z adbyvańniem u papraŭčaj kałonii ahulnaha režymu.

Advakatka prosić apraŭdać Kašavieravu

Abaronca Kašavieravaj źviarnuła ŭvahu sudu na supiarečlivyja śviedčańni kamandzira źviana AMAPa Alaksieja Alchimoviča, ź jakoha Kašavierava nibyta sarvała masku i kiepku. Jon zajaviŭ, što nie bačyŭ momantu, kali jaje zryvali. Advakatka nastojvała, što supiarečlivyja pakazańni Alchimoviča nie mohuć być pryznanyja dakładnymi i, adpaviedna, nie mohuć lehčy ŭ asnovu abvinavačvańnia.

Advakatka nahadała, što pieršapačatkova pry vystaŭleńni abvinavačvańnia Kašavieravu nie vinavacili ŭ zryvańni maski, kiepki i ŭ paškodžańni bakavych dźviarej mikraaŭtobusa. A dziejańni kvalifikavalisia pavodle č.1 art. 339 KK (chulihanstva). Julija Kašavierava nieadnojčy zapeŭnivała, što kiepku jana padniała ź ziamli i pieradała inšaj dziaŭčynie. Momant pieradačy zafiksavany na videa.

Apytanyja na sudovym pasiadžeńni śviedki pakazali, što paškodžańnie bakavych dźviarej mahło adbycca ŭ vyniku ŭdaru ab jaje hramadzianina, jakoha tady zatrymlivali. Nichto z apytanych nie zaśviedčyŭ, što paškodžańni mahli być zroblenyja Kašavieravaj.

Jašče 2 kastryčnika ŭ Kastryčnickim RAUS Kašavierava nie admaŭlałasia ad taho, što naniesła try ŭdary pa zadniaj častcy aŭtamabila. Pryznańnie było zroblenaje jašče da zaviadzieńnia kryminalnaj spravy, što śviedčyć ab praŭdzivaści padabaronnaj, a pavodle č.1 art. 169 KPK moža rasceńvacca jak jaŭka z pryznańniem viny.

Sychodziačy z hetaha, advakatka prasiła apraŭdać svaju padabaronnuju praz adsutnaść u jaje dziejańniach składu złačynstva pavodle č. 2 art. 339 KK.

Kašavierava: «Nie pazbaŭlajcie mianie svabody!»

U apošnim słovie Julija nahadała, što z samaha dziacinstva baćki vučyli jaje dabryni, uzajemadapamozie, kłopatu ab ludziach. Mienavita tamu jana i vybrała prafiesiju miedsiastry. Budučych miedykaŭ vučyli dapamahać paciarpiełym ludziam niezaležna ad ich statusu i ad taho, dzie zdaryłasia biada.

«4 kastryčnika ŭ natoŭpie ja pabačyła čałavieka, jaki lažaŭ tvaram uniz. Pieršaje, što pryjšło ŭ hałavu, — heta daviedacca, što zdaryłasia, ci nie straciŭ jon prytomnaść, i dapamahčy. U hety momant ja pryhadała maci, za žyćcio jakoj zmahałasia ŭsia siamja», — tłumačyła Julija.

Dziaŭčyna niekalki razoŭ sprabavała padyści da čałavieka, ale potym milicyjanty ŭžyli haz. Na ziamli ŭžo nikoha nie było — nieviadomy chłopiec źnik.

«Mnie stała kryŭdna za siabie, bo nie zdoleła dapamahčy. Tak, ja pryznaju svaju vinu: ja ŭdaryła pa mašynie try razy. Ja ŭčyniła pravaparušeńnie, ale nie sudzicie mianie stroha. Nie pazbaŭlajcie mianie svabody!» — skončyła Julija Kašavierava.

Prysud budzie vyniesieny 22 lutaha.

• 0
• 0
• 0
• 0
• 0
• 0
• 0
• 0