Sprabavaŭ spynić mašynu DAI, kab jana nie zajechała ŭ ludziej. Na try hady asudzili pradprymalnika Ivana Kaniaviehu

Pavodle tekstu abvinavačvańnia, nočču 10 žniŭnia, z 00:40 da 00:45, Kaniavieha z hrupaj hramadzian vyjšaŭ na prajeznuju častku na skryžavańni vuł. Bahdanoviča-Kupały-Staražoŭskaj, što pryviało da parušeńnia pracy transpartu. Svaimi dziejańniami jon pieraškadžaŭ dziejnaści orhanaŭ pravaparadku, ź jaho boku zychodziła pahroza ŭžyvańnia hvałtu ŭ dačynieńni da ich. Taksama jon nanios nie mienš za dva ŭdary rukami pa zadniaj arcy i škle słužbovaha aŭtamabila DAI. U hety čas Ivan Kaniavieha byŭ ćviarozy.

Abvinavačany nie pryznaŭ svajoj viny ni pa adnym z prypisanych jamu artykułaŭ. Adzinaje, što jon pryznaŭ, — heta toje, što jon udzielničaŭ u niesankcyjanavanym masavym mierapryjemstvie. Kaniavieha admaŭlaŭ, što ŭ jaho byŭ złačynny namier i što jon nibyta ŭžyvaŭ hvałt. Ź jaho słoŭ, jon naadvarot kazaŭ inšym hramadzianam pavodzić siabie mirna.

Na sudzie jon skazaŭ, što sapraŭdy sprabavaŭ spynić mašynu DAI, bo bajaŭsia, što jana na vialikaj chutkaści zajedzie ŭ natoŭp ludziej, jakija znachodzilisia na darozie. Jon dva razy ŭdaryŭ rukoj pa mašynie zzadu źleva dla pryciahnieńnia ŭvahi supracoŭnikaŭ DAI. Na mašynie zastalisia adbitki jaho palcaŭ, pa jakich paźniej jaho i identyfikavali.

Ivan Kaniavieha pahasiŭ pałovu sumy naniesienaj škody za ramont aŭtamabila DAI (astatnija 50% — inšy abvinavačany pa proźviščy Łukovič). Abvinavačany paprasiŭ prabačeńnia pierad supracoŭnikami DAI i raskajaŭsia ŭ svaich dziejańniach.

Na sudzie dali pakazańni dva inśpiektara DAI, pa spravie pryznanyja paciarpiełymi, — Ramanoŭski i Ratkievič. Zhodna ź ich pakazańniami, «natoŭp akružyŭ ich mašynu, ludzi kidali ŭ ich płastykavyja butelki z vadkaściu, bili nahami, rukami i inšymi častkami cieła pa mašynie, nanieśli šmat paškodžańniaŭ». Pa ich słovach, u toj momant im stała strašna za svajo žyćcio i tamu jany źjechali. Pry hetym «napad» na mašynu doŭžyŭsia chvilinu-paŭtary. Nijakich traŭmaŭ supracoŭniki DAI nie atrymali, a tolki spužalisia.

Abodva paciarpiełyja zajavili hramadzianskija pazovy ab kampiensacyi maralnaj škody ŭ pamiery 500 i 400 rubloŭ. Ramanoŭski nie zmoh tołkam patłumačyć, čamu mienavita na takuju sumu, skazaŭ, što «za pieražyvańni ab paškodžanaj mašynie i mahčymym raźvićci padziej». Ratkievič ža patłumačyŭ nieabchodnaść kampiensacyi tym, što paśla incydentu ŭ jaho pačałasia biessań. Hrošy jany chočuć pieradać dziciačamu domu.

Pacyfist, lubić žyvioł, raspracavaŭ pryładu, kab dapamahčy baćku

U pieršy dzień sudovaha pasiadžeńnia vystupili šeść śviedak z boku abvinavačanaha — siabry i svajaki Ivana. Jany raspaviadali ab jaho stanoŭčych jakaściach. Tak, Ivan supracoŭničaje z hramadskaj arhanizacyjaj «Dobraja sprava» (dapamoha siemjam z aŭtyzmam), Unisef i inšymi hramadskimi i dabračynnymi arhanizacyjami. Jon dapamahaje ludziam i ratuje biazdomnych žyvioł, časta navat na apošnija hrošy. Akramia taho, jon nie tolki arhanizatar kancertaŭ, ale i biznes-analityk, i SEO-aptymizatar. Jon pacyfist, cikavicca ekałohijaj, vielmi lubić muzyku.

Rodnyja raspaviali pra toje, što baćka Ivana ŭ 2014 hodzie pieranios insult. Kali heta zdaryłasia, Ivan žyŭ za miažoj, ale ŭsio pakinuŭ i viarnuŭsia ŭ Biełaruś, kab dahladać baćku, vazić jaho pa daktarach i dapamahać jamu.

Śpiecyjalna dla baćki i ludziej z parušeńniem maŭleńnia, jakija pieranieśli insult, na svaje srodki raspracavaŭ mabilnuju pryładu — prahramu dla addalenaj pracy z łahapiedam. U ramkach hetaj prahramy jon supracoŭničaje z centram patałohii maŭleńnia ŭ Maskvie, łahapiedam Zavodskaha rajona Minska i z 11-j balnicaj u Minsku.

Da spravy byli taksama dałučanyja stanoŭčyja charaktarystyki i padziaki ad klijentaŭ i kampanij, ź jakimi jon supracoŭničaŭ.

Na nastupny dzień, 3 lutaha, u sudzie byli vyvučanyja videamateryjały kryminalnaj spravy. Ź ich, naprykład, vidać, što ad momantu spynieńnia mašyny DAI da momantu, kali jana praciahnuła ruch, prajšło nie bolš za 8 siekund, choć Ramanoŭski śćviardžaŭ, što prajšła minimum chvilina. Taksama, zhodna ź videamateryjałami, pierad tym, jak spynić mašynu DAI, natoŭp ludziej prapuściŭ inšuju zvyčajnuju mašynu. Kaniavieha patłumačyŭ, što pierad hetym suprać ludziej vykarystoŭvalisia śpiecsrodki (śviatłošumavyja hranaty, stralba), tamu jany i spynili mašynu DAI.

Padčas sprečak bakoŭ prakuror adznačyŭ, što abvinavačvańniem nie vyjaŭlena abciažarvalnych abstavin. Ale pry hetym jon zaprasiŭ dla Ivana Kaniaviehi 3 hady pazbaŭleńnia voli ŭ kałonii ahulnaha režymu.

Advakat adznačyŭ, što plaskač pa mašynie nie supastaŭny z tryma hadami pazbaŭleńnia voli. Tam, dzie jość adbitki ruk Kaniaviehi, niama paškodžańniaŭ na mašynie. Ivan nie błakavaŭ daroh, nie vychodziŭ na prajeznuju častku z metaj pieraškodzić ruchu transpartu.

Jon nie vyjaŭlaŭ ahresii da supracoŭnikaŭ milicyi. Usio, što adbyłosia, — heta niedarečny źbieh abstavin. Advakat prasiŭ uličyć šmatlikija stanoŭčyja charaktarystyki abvinavačanaha, stały ŭzrost jaho baćkoŭ i invalidnaść baćki.

U apošnim słovie Ivan Kaniavieha skazaŭ, što ŭ jaho dziejańniach nie było namieru i ahresii ŭ dačynieńni da supracoŭnikaŭ. Jon zaŭsiody źjaŭlaŭsia na dopyty i nie chavaŭsia ad śledstva. U vypadku pazbaŭleńnia voli jon nie zmoža vykanać svaich abaviazkaŭ pa arhanizacyi pieraniesienych z 2020 hoda kancertaŭ, a prajekt mabilnaj pryłady budzie na paŭzie. Jon jašče raz paprasiŭ prabačeńnia ŭ paciarpiełych i vykazaŭ padziaku za toje, što jany vyrašyli pieradać hrošy ŭ dziciačy dom.

Rodnyja Kaniaviehi ŭ hety ž dzień apłacili 900 rubloŭ, jakija zaprasili supracoŭniki DAI u jakaści kampiensacyi maralnaj škody. Paśla hetaha paciarpiełyja admovilisia ad iskavych patrabavańniaŭ.

4 lutaha sudździa Kaciaryna Muraška ahučyła prysud: 3 hady pazbaŭleńnia voli ŭ papraŭčaj kałonii ahulnaha režymu.

• 0
• 0
• 0
• 0
• 0
• 0
• 0
• 0