Amapaŭcy zhvałtavali dziaŭčynu na Akreścina? Ci varta daviarać hetaj historyi?
Hučnaja historyja ab źvierstvach siłavikoŭ ablacieła ŭsiu Jeŭropu. Ale ci adbylisia tyja padziei nasamreč?
Užo amal čatyry miesiacy z vusnaŭ u vusny pieradajecca historyja pra źvierskaje zhvałtavańnie na Akreścina ŭ pieršyja dni paśla prezidenckich vybaraŭ. I čym bolej času prachodziła, tym bolej heta nabyvała vyhlad haradskoj sahi. Kali vyhladaje ŭsio nibyta praŭdapadobna, ale nijakich dokazaŭ niama.
Na minułym tydni Jeŭropa ŭzbudaražyłasia paśla publikacyi na sajcie šviedskaha vydańnia ETC. Tam u ahulnych słovach raskazvałasia pra biełarusku «Chryścinu» i pra toje, jakija katavańni jana pieražyła ŭ źniavoleńni. Kali ścisła, to vydańnie dało słova ananimnaj udzielnicy pratestu, jakuju paśla adnoj z akcyj nibyta zhvałtavali siłaviki. Rabili heta dubinkami, a hvałtavali aralna, analna i vahinalna. Paśla hetaha joj vybili jašče 25 zuboŭ.
Šviedy kažuć, što majuć miedycynskuju daviedku ab zhvałtavańni i praz anłajn razmaŭlali z «Chryścinaj», jakaja choča vyjechać za miažu. U intervju biełaruskim ŚMI redaktar ETC kazaŭ, što nie sumniavajecca ŭ praŭdzivaści hetaj historyi.
Adkul uvohule pajšli razmovy pra zhvałtavanuju na pratestach dziaŭčynu? Prykładna 18 žniŭnia terapieŭtka 10-j haradskoj kliničnaj balnicy Minska Darja Čechava (Płotkina) u svaim tvitary napisała nastupnaje: «Maja siabroŭka pracuje hiniekołaham. I adna ź jaje pacyjentak — zhvałtavanaja dziaŭčyna z razryvam šyjki matki, jakuju pryvieźli z Akreścina. Prabačcie, ja bolš nie mahu vynosić hety pi…iec».
Čechava (Płotkina) nabyła viadomaść praz svoj tvitar viasnoj, kali sprabavała publikavać sapraŭdnyja źviestki ab stanie pandemii karanavirusa ŭ Minsku. U žniŭni «NN» sprabavała parazmaŭlać z spadaryniaj Čechavaj, ale terapieŭtka ihnaravała pytańni. Jaje muž skazaŭ, što na hetu temu žonka razmaŭlać nie budzie.
Praź niejki čas tvit pra zhvałtavańnie byŭ vydaleny biez tłumačeńnia pryčyn. Sama Darja ŭ pačatku vieraśnia źjechała ź Biełarusi, bajučysia kryminalnaha pieraśledu.
Pa śladach toj publikacyi žurnalisty i aburanyja hramadzianie pytalisia ŭ tahačasnaha ministra achovy zdaroŭja Uładzimira Karanika pra hety vypadak, a čynoŭnik zapeŭnivaŭ, što sprabavaŭ šukać takuju historyju, ale miedykam, maŭlaŭ, pra jaje nieviadoma.
Kali kiravacca zdarovym sensam, to historyja vyhladała ad pačatku nie samym praŭdapadobnym čynam, ale padziei leta-vosieni dakazali, što ŭ siońniašniaj Biełarusi časam navat samyja nievierahodnyja scenary mohuć uvasobicca ŭ žyćcio, tamu śpiašacca z vysnovami nielha było ni ŭ jakim razie.
Nastupny śled hetaj historyi byŭ znojdzieny ŭ Viciebsku. Na adnu ź miascovych akcyj pratestu vyjšła dziaŭčyna z płakatam: «Znajšłasia maja siabroŭka, adpuścili z Akreścina. Razryŭ šyjki matki, vybitaja klučyca, kampresijny pierałom chrybietnika. Šmatlikija hiematomy, dvojčy hvałtavali dubinkaj».
«Naša Niva» źviazałasia z toj dziaŭčynaj, kab daviedacca akaličnaści historyi. Nam raskazali, što na płakacie była historyja «siabroŭki kalehi». Znajści niejkija vychady znoŭ nie atrymałasia. «Jany nie dazvolili davać kantakty, tak što nie hatovyja pakul kamientavać», — napisali «NN».
Mabyć, historyja i dalej by niejki čas žyła ŭ formie haradskoj sahi, kali b temu nie aktualizavała vydańnie ETC. Ludzi, što žyvuć u Šviecyi, kažuć, što heta daloka nie samaje ŭpłyvovaje ŭ krainie vydańnie, niekalki razoŭ ich abvinavačvali ŭ fejkach, niekalki razoŭ hazieta była na miažy bankructva. «Staroje lavackaje vydańnie», — acharaktaryzavali ETC.
I tut na piaredni płan vychodziać ludzi, jakija ŭžo nieadnarazova razvodzili ŚMI — heta Jaŭhien «Kakojta» Katlaroŭ i Juryj Cierach, jakija hurtujucca pad nazvaj «Ludažer». My ŭžo pisali pra Katlarova, jaki pa drobiazi padmanvaŭ biełaruskija niezaležnyja ŚMI, a ciapier nibyta vyjšaŭ na mižnarodny ŭzrovień.
«Ludažery» śćviardžajuć, što prydumali hetuju historyju pra zhvałtavańnie ŭ Minsku i zakinuli adnamu emihrantu, jaki, pradstaŭlajučysia doktaram z Konha, prapanavaŭ jaje roznym šviedskim vydańniem. Na rozyhryš pavialisia mienavita rabotniki z ETC.
Nazyvajecca i imia emihranta — Pavieł Madžara. Taki čałaviek sapraŭdy isnuje, ale žyvie ŭ bielhijskim Antvierpienie, a ŭ Šviecyi, kaža, uvohule nikoli nie byŭ.
Madžara kaliści byŭ aktyvistam «Zubra» i «Maładych sacyjał-demakrataŭ» u Homieli, ale vyjechaŭ za miažu ŭ 2005 hodzie pa nibyta sfabrykavanaj spravie za zachoŭvańnie narkotykaŭ. Atrymaŭ status palituciekača ŭ Bielhii, dzie i žyvie pa siońnia.
Kaža, što pra Juryja Cieracha ničoha nie čuŭ, a Jaŭhien Kakojta doŭhi čas byŭ u jaho ŭ siabrach u fejsbuku. Madžara viedaje jaho virtualna, šmat razoŭ spračaŭsia ź im. U vyniku Katlaroŭ jaho prosta zabaniŭ, kaža Pavieł. «Mahčyma, i praz 15 hadoŭ jany mianie zabyć nie mohuć», — kaža Pavieł.
Svaju datyčnaść da hetaj historyi jon rašuča abviarhaje. Kaža, što i śniehavika na zastaŭcy nikoli nie mieŭ.
U skrynach z telehrama jość charakterny momant, što tam nie vidać, kali hetaja pierapiska adbyvałasia, — da historyi apublikavanaj u ETC, ci paśla. A heta važny momant.
Na dadzieny momant niemahčyma na sto pracentaŭ dać viery ŭ toje, što historyja ŭ šviedskich ŚMI — heta praŭda. Vielmi dziŭna, što za čatyry miesiacy tak i nie vyleźli inšyja padrabiaznaści spravy. Nie źjavilisia śviedki, što bačyli dziaŭčynu biez 25 zuboŭ, ci miedyki, jaki pravodzili ahlad. Choć niešta b musiła ŭspłyć — ale pakul cišynia.
Toje samaje tyčycca i viersii «Ludažeraŭ». Im daŭno niama viery, a hetaja situacyja moža być sprobaj złavić chajp na i tak rezanansnym vypadku. Pakul usia historyja čakaje novych padrabiaznaściaŭ, pažadana, choć čymści padmacavanych.
«Padlik hałasoŭ jak sataniscki rytuał». Były člen kamisii raskazaŭ, jak u Biełarusi falsifikujuć vybary8
Kamientary