Dźvie rajonnyja kamisii ŭ Hrodnie nie zaličyli podpisy za Dźmitryjeva. U adnym z rajonaŭ nie pryniali za Babaryku i Capkału

U Hrodnie adbylisia pasiadžeńni rajonnych vybarčych kamisij, dzie byli abvieščany vyniki pravierki sapraŭdnaści podpisaŭ vybarščykaŭ, paviedamlaje spring96.org

Takim čynam, pa źviestkach, padadzienych Leninskaj rajonnaj kamisijaj, u dvuch pretendentaŭ akazałasia bolš za 15% brakavanych podpisaŭ. Heta Valeryj Capkała i Andrej Dźmitryjeŭ. Usie ich podpisy pa Leninskim rajonie skasavanyja, ci, jak heta ahučyła kamisija, ich prapanavana nie ŭličvać. Heta 6527 podpisaŭ, zdadzienych za Capkału, i 208 za Dźmitryjeva.

U astatnich pretendentaŭ podpisy ŭličyli, choć kamisija pakazała na niesapraŭdnaść niejkich ź ich, ale, pa śćviardžeńni pracoŭnych hrup, niesapraŭdnaść nie pieravysiła 15%.

Takim čynam, pa Leninskim rajonie Harodni ŭ skarbonku podpisaŭ Alaksandra Łukašenki lahło 32 584 podpisy, Viktara Babaryki — 4670, Śviatłany Cichanoŭskaj — 2420, Siarhieja Čeračenia — 4890, Hanny Kanapackaj — 208.

U toj ža dzień, 29 červienia, byli abvieščany vyniki pravierki podpisaŭ pa Kastryčnickim rajonie Hrodna.

Za Viktara Babaryku pryniali 7268 podpisaŭ, 23% ź ich byli ŭziatyja na pravierku — byli pryznanyja niedakładnymi 492 podpisy. Dadatkova ŭziali na pravierku jašče 15%. Sumujučy pa vynikach pravierki, 17,2% podpisaŭ pryznanyja niedakładnymi. Na padstavie hetaha ŭsie hałasy za Viktara Babaryku pryznanyja niedakładnymi i niepryznanymi.

Za Andreja Dźmitryjeva pryniali 346 podpisaŭ, 23% pravieryli, i 66 akazalisia niesapraŭdnyja, uziali jašče 15% na pravierku. Usiaho 78,8% niesapraŭdnyja. Vynik — podpisy za Dźmitryjeva niepryznanyja.

Za Hannu Kanapackuju zdali 146 podpisaŭ, niesapraŭdnych — 2,9%. 145 podpisaŭ prymajucca. Za Alaksandra Łukašenku zdali 52 312, nie pryniali 79, da pravierki ŭziali 52 233, uziali 23% da pravierki, ź ich 4,3% niesapraŭdnyja. Prymajecca 51 712.

Za Siarhieja Čeračenia zdali 1781 podpis, nie pryniali adrazu 16. 1751 dapuščana da pravierki. Ź ich uziali na pravierku 23% i niesapraŭdnymi akazalisia 3,4%. Pryznanyja 1751. Za Śviatłanu Cichanoŭskuju zdali 3506 podpisaŭ — 69 nie pryniali, da pravierki ŭziali 3437. Praviarali 23%, ź ich niesapraŭdnych 7%, prymajucca da zaliku 3382 podpisy.

Za Valeryja Capkału pryniali 9437 podpisaŭ, uziali 23%, niesapraŭdnych 1,8%. Zaličvajucca 9399 podpisaŭ.

Pa vynikach pasiadžeńnia pa praviercy dakładnaści podpisaŭ z 7 pretendentaŭ pryznanyja podpisy tolki 5: Capkały, Čeračania, Łukašenki, Kanapackaj i Cichanoŭskaj.

• 0
• 0
• 0
• 0
• 0
• 0
• 0
• 0