Što za pryvatnaja achoŭnaja kampanija, supracoŭnikam jakoj Łukašenka dazvoliŭ užyvać zbroju

Alaksandr Łukašenka padpisaŭ ukaz №227, jakim kampanii «HardServis» dadziena prava akazvać achoŭnyja pasłuhi. Dakumient pryniaty «ŭ metach pašyreńnia śfiery pasłuh pry ažyćciaŭleńni achoŭnaj dziejnaści», piša Tut.by.

Pavialičyć

«HardServisu» dazvalajecca, vykonvajučy patrabavańni zakanadaŭstva, kuplać, zachoŭvać i pieradavać svaim supracoŭnikam zbroju jak słužbovuju, tak i hramadzianskuju, i bojeprypasy da jaje. Pra zaklučeńnie i spynieńnie damoŭ na akazańnie achoŭnych pasłuh kampanija abaviazanaja prainfarmavać Ministerstva ŭnutranych spraŭ.

«Patrabavańni supracoŭnikaŭ Słužby biaśpieki Prezidenta Biełarusi, orhanaŭ unutranych spraŭ i orhanaŭ dziaržaŭnaj biaśpieki ab časovym prypynieńni vykarystańnia i prymianieńnia słužbovaj i hramadzianskaj zbroi pry akazańni rabotnikami «HardServis» achoŭnych pasłuh abaviazkovyja da nieadkładnaha vykanańnia», — havorycca ŭ dakumiencie.

Pry nievykanańni normaŭ ukaza №227 dazvoły na vałodańnie zbrojaj buduć anulavanyja.

Supracoŭnikami «HardServisa» mohuć być tolki hramadzianie Biełarusi, jakija prajšli pravierku ŭ orhanach unutranych spraŭ i dziaržbiaśpieki. Jany pavinny adpaviadać patrabavańniam da rabotnikaŭ vajenizavanaj achovy. Pry vykanańni słužbovych abaviazkaŭ jany majuć «prava na našeńnie, zachoŭvańnie, prymianieńnie i vykarystańnie słužbovaj i hramadzianskaj zbroi, śpiecyjalnych srodkaŭ i fizičnaj siły ŭ paradku, ustanoŭlenym zakonam dla rabotnikaŭ vajenizavanaj achovy», havorycca va ŭkazie.

U dadatku da ŭkaza pieraličanyja pasłuhi, jakija moža akazvać «HardServis». Kampanija moža achoŭvać nie tolki abjekty i majomaść kampanij i fizičnych asob, ale i prymać i reahavać na sihnały achoŭnaj i tryvožnaj sihnalizacyi, zajmacca pieravozkaj i achovaj majomaści, supravadžać tavary i transpartnyja srodki, prajektavać, ustaloŭvać i absłuhoŭvać srodki i sistemy achovy.

Pry hetym dziejańnie ŭkaza nie raspaŭsiudžvajecca na abjekty i tavary, jakija padlahajuć abaviazkovaj achovie i supravadžeńni Departamientam achovy MUS.

Što viadoma pra kampaniju «HardServis»?

Kampanija była zarehistravanaja vosieńniu 2019 hoda. Pieršapačatkova jana nazyvałasia «BiełSiekjuryciHrup». 100% dolaj «HardServisa» naležyć kampanii «Hłobałkastam-mieniedžmient» (raniej — «Hłobałkastam»). Jaje zasnavali hramadzianka Ukrainy Hanna Chmialeŭskaja (40%) i biełaruska Hanna Puškarova (60%). Ich hrašovy ŭkład u statutny fond składaje 500 i 750 biełaruskich rubloŭ adpaviedna. Infarmacyi ab udziele hetych žančyn u inšych biznesach znajści nie ŭdałosia.

«Hłobałkastam» śpiecyjalizujecca na akazańni šyrokaha śpiektru kamiercyjnych łahistyčnych pasłuh dla karparatyŭnych klijentaŭ na terytoryi Mytnaha sajuza, havorycca na sajcie kampanii. U 2017 hodzie Fiederalnaja mytnaja słužba Rasii nazyvała «Hłobałkastam» u liku hałoŭnych pastaŭščykoŭ sankcyjnych tavaraŭ. Adnak sama kampanija ad hetaha adchryściłasia. Razam z tym, zhodna sa źviestkami kampanii, mieli miesca sproby vykarystańnia rekvizitaŭ «Hłobałkastama» pry ździajśnieńni nielehalnaha pieramiaščeńnia tavaraŭ inšymi subjektami haspadarańnia, jakija pieraryvalisia adpaviednymi kantralujučymi orhanami.

Punkty mytnaha afarmleńnia «Hłobałkastam» znachodziacca ŭ pasiołku Aziarco «Biełkulthandlu» Kiraŭnictva spraŭ prezidenta, industryjalnym parku «Vialiki kamień» i HŁC «Biełmytniaservisa». U cyrymonii adkryćcia PTA «Hłobałkastam» u «Vialikim kamieni» prymaŭ udzieł kiraŭnik spraŭ prezidenta Viktar Šejman.

Pieršapačatkova raźmieščanaja infarmacyja pra suviaź «Hłobałkastam» z «Bremina hrup» nie znajšła paćvierdžańnia. Choć ofisy «Hardsiervisa», «Hłobałkastoma» i «Bremina hrup» raźmiaščajucca pobač u adnym Biźnies-centry ŭ Minsku.

• 0
• 0
• 0
• 0
• 0
• 0