Ekśpiert: Surjoznaj alternatyvaj moža być tolki pastaŭka nafty trubapravodnym šlacham

Kiraŭnik Biełarusi Alaksandr Łukašenka padčas uručeńnia premij «Za duchoŭnaje adradžeńnie» zakranuŭ pytańnie kupli rasijskaj nafty.

Pavialičyć

U pryvatnaści, Łukašenka zaznačyŭ: «U dvuch słovach, čamu z prezidentam Rasii nie damovilisia pa nafcie. Tamu što Rasii choča, kab my kupili ŭ jaje naftu pa cenach vyšej za suśvietnuju. Chto pra takoje čuŭ?! Tamu ja i admoviŭsia ad takoj nafty. I prosta zajaviŭ, kali nie budzie pastavak pa suśvietnaj canie z Rasii nafty,

my znojdziem hetuju naftu ŭ inšym miescy. Što my i robim. I znajšli», — adznačyŭ jon.

Dyk dzie ž Łukašenka ŭsio ž znajšoŭ naftu? Pra heta my spytali ŭ ekśpierta pa pytańniach enierhanośbitaŭ, ahladalnicu internet-sajta «Biełrynak» Taćcianu Manionak.

«Znajści naftu nie składana. Suśvietny rynak maje vielmi šyrokuju prapanovu. Pytańnie ž, pa jakoj canie, u jakim abjomie? Vy ž razumiejecie, što paśla padziej u Iranie ceny na naftu ŭskočyli da 68 dalaraŭ za baral.

Ja chaču nahadać, što letaś Ukraina impartavała tankier nafty z ZŠA. Na toj momant heta była samaja tannaja prapanova na rynku. Ale potym kaciroŭki istotna źmianilisia. Biełarusi dla poŭnaj zahruzki naftapierapracoŭčych zavodaŭ patrebnyja zusim inšyja abjomy, čym niekalki tankieraŭ nafty.

Surjoznaj alternatyvaj moža być tolki pastaŭka nafty praz trubu. A dzie jaje ŭziać? Praz Ukrainu? Ale ŭkrainskija ekśpierty kažuć, što dla hetaha patrebnyja zahruzka 4—5 miljonaŭ tonaŭ nafty na hod.

Nie viedaju, ci byli kankretnyja prapanovy z polskimi apieratarami, mahčyma, dla ich heta budzie bolš prymalna, jak reviersnyja pastaŭki. Ale heta nie trubnyja pastaŭki, a praz bałtyjskija party. Hetyja pytańni tak chutka nie vyrašajucca.

Pakul havaryć usurjoz pra alternatyvu rasijskaj nafcie nie vypadaje. Niadaŭna zajaŭlali, što navat z ulikam padatkavaha manieŭru, cana nafty dla Biełarusi składała b 83% ad ahulnaj suśvietnaj cany.

Kali jość niejkija asabistyja damovy Łukašenki ź niejkaj krainaj, to moža być. Ale małavierahodna, što dla Biełarusi buduć rabicca niejkija źnižki, tym bolš na doŭhaterminovaj asnovie. Ja liču, što takija zajavy pakul nie majuć pad saboj ćviordaha hruntu.

Tankiery mohuć być adkul zaŭhodna, choć z Amieryki, treba hladzieć suśvietny rynak, i najlepšyja ceny».

• 0
• 0
• 0
• 0
• 0
• 0
• 0
• 0