Były hałoŭny ideołah krainy Uładzimir Zamiatalin pamior 7 lipienia na 72-m hodzie žyćcia. U 1995 hodzie Zamiatalin uznačaliŭ Upraŭleńnie hramadska-palityčnaj infarmacyi Administracyi prezidenta, raniej hetuju pasadu zajmaŭ Alaksandr Fiaduta, jaki syšoŭ paśla skandału z «biełymi plamami» ŭ hazietach. Alaksandr Fiaduta zhadvaje svajho nastupnika.
«Jon nie byŭ ideołaham, jon byŭ vykanaŭcam. U fizicy jość takija paniatki, jak «paŭpravadnik» i «pravadnik». Jość roznyja čynoŭniki, jość čynoŭniki-«paŭpravadniki», jakija vykonvajuć zahady kiraŭnictva, ale pry hetym jany pamiatajuć pra nastupstvy. Jany viedajuć, što jość rečy, jakija nielha rabić.
Zamiatalin ža byŭ idealnym «pravadnikom». Jaho nie chvalavali nastupstvy. Jaho chvalavała tolki adno: što pra mianie skaža kiraŭnictva. Taki padychod rabiŭ jaho čałaviekam, jaki byŭ patrebny Łukašenku. Fienomien Zamiatalina całkam zasnoŭvaŭsia na hetaj vykanalnaści.
Va ŭsim astatnim jon byŭ vielmi šerym i nie vielmi adukavanym palitrabotnikam. Jość roznyja palitrabotniki, naprykład, ja viedaŭ hienierała Uładzimirava. Heta byŭ vielmi adukavany čałaviek, jaki viedaŭ niekalki movaŭ, čytaŭ usiu novuju vajskovuju litaraturu, jakaja vychodziła za miažoj.
Zamiatalin całkam zastavaŭsia ŭ paradyhmie: čaho choča kiraŭnictva, taho choča boh. Jon vykonvaŭ luby zahad.
Atrymałasia tak, što Zamiatalin byŭ čałaviekam biez radzimy. Jahonaj radzimaj była impieryja. I kali impieryja pamierła, to jon raptoŭna apynuŭsia ŭ krainie, jakuju nie viedaŭ i nie lubiŭ. Jon i nie moh palubić Biełaruś.
Zamiatalin nie vyłučaŭ idejaŭ, jon ich vykonvaŭ. Tamu taja demanizacyja hetaj asoby, jakaja adbyvajecca ciapier, mnie całkam niezrazumiełaja. Jon byŭ vielmi šery čałaviek. Rašeńnie pra refierendum ab movach, nakolki ja viedaju, było pryniata da jaho prychodu ŭ kiraŭnictva», — skazaŭ Alaksandr Fiaduta.
«Navat jaho prychilniki zrazumieli, što žyć jak raniej užo nie atrymajecca». Biełarusy raskazali pra atmaśfieru ŭ krainie napiaredadni vybaraŭ4
Kamientary