Viasnoj 2017 hoda byŭ vyniesieny śmiarotny prysud 32-hadovamu žycharu Naroŭli, jaki zabiŭ 5 čałaviek. Padrabiaznaści kryminalnaj bijahrafii raskryvaje sb.by.
Niełady z zakonam u Alaksieja Michaleni pačalisia jašče ŭ škole-internacie. Tam jon zapomniŭsia nievynosnym charaktaram, stałymi ŭciokami i «mahnitnymi rukami», jakija pryciahvali ŭsio, što drenna lažała. Za kradziež i chulihanstva pabyvaŭ na łavie padsudnych. Ale navat heta było drobnymi paskudstvami. Kali ž dajšło da bujnych spraŭ, rajcentr zdryhanuŭsia…
Jašče ŭ 17-hadovym uzroście Michalenia teraryzavaŭ piensijanieraŭ, jakija žyli pa susiedstvie. Vymahaŭ hrošy na vypiŭku, zatym, prakraŭšysia nočču ŭ dom, abakraŭ i źbiŭ haspadara. Nu a ŭ vyniku zaviaršyŭsia kanflikt padvojnym zabojstvam. Razam z takim ža niahodnikam junak pryjšoŭ da starych i ŭčyniŭ raspravu. Niaščasnych muža i žonki zabivali zamienčanaj śpicaj, dabivali nahami. Trupy vyciahnuli z domu i ŭtapili ŭ Prypiaci. Pakul milicyja šukała źnikłych bieź viestak, zabojcy praciahvali pjanstvavać i viaršyć čornyja spravy. U svaim domie abrabavali paralizavanuju staruju. I ŭsłych abmiarkoŭvali: «začyścić» jaje jak niepatrebnaha śviedku ci pakinuć u žyvych. Paškadavali…
Praz sutki, pryjechaŭšy ŭ Mazyrski rajon, napali na vypadkova sustretaha hrybnika 67 hadoŭ. Jaho źbili i abrabavali, paśla čaho Michalenia ŭsadziŭ nož u šyju. Jašče žyvoha viaskoŭca zakidali halinkami i pakinuli na dnie jara. A adrazu ž paśla hetaha … nacelilisia rabavać sielskuju kramu. Źbiŭšy pradaŭščycu, vyhrabli z kasy najaŭnaść i źbiehli.
Chto viedaje, kolki b jašče doŭžylisia pryhody admarozkaŭ, kali b nie advaha svajaka paciarpiełaj. Daviedaŭšysia pra toje, što zdaryłasia, jon schapiŭ strelbu, zavioŭ matacykł i kinuŭsia ŭ pahoniu. Nahnaŭ razbojnikaŭ, palnuŭ u pavietra i pad kanvojem dastaviŭ abodvuch da milicyjantaŭ.
Hrybnik praź niekalki dzion pamior u balnicy. U chodzie śledstva stała viadoma i pra zabojstva pažyłoj pary, i pra inšyja złačynstvy, učynienyja chieŭraj admarozkaŭ. Na łavie padsudnych apynułasia cełaja kampanija.
Alaksiej Michalenia atrymaŭ tady 12 hadoŭ pazbaŭleńnia voli. Pa zakonie, heta maksimalnaje pakarańnie, praduhledžanaje dla niepaŭnaletniaha złačyncy.
Turemnyja ŭniviersitety pryniali Michaleniu jak svajho. Bo ni ekzamienaŭ, ni konkursu na miesca tam niama. Zrešty, navat u kałonii dla niepaŭnaletnich Alaksiej prymudraŭsia prajaŭlać burny noraŭ. Źlohku prycich tolki ŭ turmie darosłaj. U kryminalnym śviecie chapaje vychavalnikaŭ, zdolnych pastavić na miesca luboha.
Dziakujučy amnistyi vyzvaliŭsia Locha krychu raniej za termin. Praŭda, na voli prabyŭ niadoŭha. Adsiedzieŭšy jašče paŭtara hoda za kradziež, u Naroŭlu viarnuŭsia 28 lutaha 2016 hoda. I ź niesucišnym entuzijazmam uziaŭsia adznačać vyzvaleńnie. Kampaniju skłała siabroŭka, ź jakoj Alaksiej zavioŭ adnosiny jašče da taho, jak adpraviŭsia na kazionny chleb.
Tanny ałkahol liŭsia rakoj — zaciažnaj pjancy nie było kanca i kraju. Da viečara piataha dnia baćka vinavataha ŭ sumniŭnaj ŭračystaści źviarnuŭsia z prośbaj:
— Schadzi, Lecha, da susiedziaŭ — vaźmi nažnicy. Padstryhčysia treba, a to zaros, jak lasun.
Syn spračacca nie staŭ: ciažka ŭstaŭ i chistkaj chadoj paploŭsia za paroh. Adsutničaŭ doŭha, a kali viarnuŭsia, mieŭ žudasny vyhlad. Z paroha burknuŭ siabroŭcy:
— Nu-ka, pali vady…
I staŭ admyvać pierapeckanyja kryvioju ruki. A zatym raspavioŭ dzikuju historyju, jakaja, na žal, nie była jaho pjanaj fantazijaj…
Adpraviŭšysia vykonvać daručeńnie baćki, Alaksiej spačatku zajšoŭ da adnoj susiedki. U toj, adnak, nažnic nie akazałasia. Michalenia raźviarnuŭsia i pajšoŭ. Krychu paźniej susiedka daviedałasia, jak mocna joj pašancavała. Bo jana paprostu mahła stać achviaraj. Adnak zły rok napatkaŭ dvuch inšych ludziej.
Pažyłyja brat i siastra žyli na vulicy Kastryčnickaj. Na ich žal, niedaloka ad doma Michaleni. Da ich jon i adpraviŭsia paśla niaŭdałaj sproby ŭziać u doŭh nažnicy. Ciažka skazać, što mienavita adbyłosia i ŭ jakoj paśladoŭnaści raźvivalisia dalejšyja padziei. Dakładna pra heta viedaje tolki sam Michalenia. Pa zrazumiełych pryčynach, ščyraść jaho pakazańniaŭ šeleha łamanaha nie vartaja…
Nastupstvy niečakanaha vizitu apisany ŭ suchich radkach prysudu, ad jakich u narmalnaha čałavieka maroz pa skury. Fakt u tym, što ŭ domie adbyŭsia kanflikt. Z-za čaho, znoŭ ža nieviadoma. Adnak, viedajučy bijahrafiju Michaleni, lohka vykazać zdahadku, što paŭstać jon moh na pustym miescy. Pryčyna dla kryŭdy na ŭvieś śviet ŭ jaho miełasia zaŭsiody. Pry hetym da dyskusij nie imknuŭsia, na słoŭnyja arhumienty byŭ nie bahaty i praz frazu-druhuju puskaŭ u chod kułaki. A taksama ŭsio, što padpadziecca pad ruku.
U hety raz hałoŭnymi pryładami zabojstva stali nož i pałka. Jak vyśvietlać paźniej ekśpierty, haspadaru doma złačyniec nanios nie mienš za 22 udary, a druhoj achviary — bolš za try dziasiatki. Bolšaść — u hałavu. Apafieozam źviarynaj žorstkaści staŭ finalny štrych: dabivajučy žančynu, jakaja była nie ŭ siłach ni źbiehčy, ni supraciŭlacca, Alaksiej vykałaŭ joj vočy ćvikami…
Paśla lutaj raspravy skinuŭ cieła ŭ sklep. A miortvaha brata adciahnuŭ u aharod. Na nastupnuju ranicu trupy znajšoŭ plamieńnik zabitych.
Vyznačyć zabojcu było prosta. Kajdanki na jaho nadzieli, kali jon z rečami chacieŭ pakinuć Naroŭlu. Byccam by źbiraŭsia padacca na zarobki ŭ Rasiju. Na miescy złačynstva byli znojdzieny toj samy nož i pałka. Michalenia ŭpiraŭsia niadoŭha. Spasyłaŭsia na toje, što padrabiaznaściaŭ zdareńnia nie pamiataje. Ale pry hetym śćviardžaŭ: staryja sami nakinulisia na jaho. Jon ža abaraniaŭsia jak moh. Nu i źlohku pierastaraŭsia. Praviarałasia navat hetaja sumniŭnaja viersija. I nie znajšła paćvierdžańnia.
U adsutnaść śviedkaŭ złačynstva značnuju rolu ŭ jaho rasśledavańni adyhrali supracoŭniki ŭpraŭleńnia Dziaržaŭnaha kamiteta sudovych ekśpiertyz pa Homielskaj vobłaści. Pa spravie praviali šerah ekśpiertyz. Da prykładu, ekśpierty staranna daśledavali znojdzieny ŭ domie zahinułych niedakurak. Ustalavali: cyharetu palili dva čałavieki — haspadar i Alaksiej. Zdavałasia b, što heta daje? Akazałasia, mnohaje. Złačyniec paŭtaraŭ, byccam byŭ atakavany, ledź pierastupiŭšy paroh. Ale hety samy niedakurak paćviardžaŭ: nijakaha raptoŭnaha napadu nie było. Niejki čas jany razmaŭlali i kuryli adnu na dvaich cyharetu. Padobnych niestykovak akazałasia niamała. Padčas pracesu abvinavačvany vyhladaŭ abyjakavym. Pry vyrašeńni losu rečavych dokazaŭ tolki paprasiŭ viarnuć jamu tufli. Praŭda, farsić u ich jamu ŭžo nie daviadziecca… Z prysudu sudovaj kalehii Homielskaha abłasnoha suda: «Abstaviny złačynstva ŭ sukupnaści sa źviestkami pra asobu abvinavačanaha śviedčać ab tym, što Michalenia A. A. ŭjaŭlaje vyklučnuju niebiaśpieku dla hramadstva. …Sudovaja kalehija prychodzić da vysnovy ab tym, što ŭ dadzienym vypadku nielha mierkavać ab mahčymym vypraŭleńni vinavataha». Prysud — śmiarotnaje pakarańnie. Jak ni dziŭna, ale navat sam Michalenia pryznaŭ takoje pakarańnie zasłužanym. Što, zrešty, nie pieraškodziła jamu padać prašeńnie ab pamiłavańni…
«Niepadkupnym» biełaruskim dypłamatam u Małdovie akazaŭsia kadravy supracoŭnik KDB5
Kamientary