«Našaja meta — matryca» — biełaruska-brytanskaja kamanda raspracavała kaścium dla virtualnaj realnaści
U Tesla Suit možna «dakranucca» da čałavieka, jaki znachodzicca za tysiačy kilametraŭ ad ciabie, adčuć choład, haračyniu i viecier, zrabić sabie masaž i stać sapraŭdnym udzielnikam kamputarnaj hulni.
«Pamiatajecie film «Hazonakasilščyk»? Jon mianie vielmi ŭraziŭ u dziacinstvie. Z taho času była ideja zrabić niešta padobnaje. Nu i «Matryca» paśla vyjšła», — tak biełaruski prahramist Dźmitry Marozaŭ tłumačyć, što za kaścium jany zrabili.
11 hod tamu Dźmitry Marozaŭ źjechaŭ u Šatlandyju, tam vyvučaŭ movu i biznes. U 2012-m paznajomiŭsia jašče z adnym biełaruskim prahramistam Siarhiejem Chursam. Ichnyja mary supali.
Ciapier Dźmitry Marozaŭ i Siarhiej Churs — suzasnavalniki brytanskaj kampanii Tesla Studios. A ich Tesla Suit vystaŭleny na najbujniejšuju kraŭdfandynhavuju platformu Kickstarter.
«2016 hod — hod virtualnaj realnaści, — kaža Marozaŭ. — Adzinaja prablema — mozh vieryć, što vy znachodziciesia ŭ realnaści, a kali vy dakranajeciesia — adčuvańniaŭ niama, i atrymlivajecca dysanans. A z kaściumam vy možacie dakranacca, vy adčuvajecie zvarotnuju suviaź. Heta pieršy krok da matrycy!»
Aficyjnaja prezentacyja Tesla Suit:
Zrabić absalutna pracoŭnuju madel udałosia za try hady. Ale, pa słovach Dźmitryja, dziela hetaha treba sieści ŭ «mašynu času». Za tydzień pierad zapuskam prajektu na Kickstarter Marozaŭ spaŭ tolki dźvie nočy i vypiŭ litry kavy. Kab ździejśnić maru, daviałosia pakinuć pracu, stać daŭnšyfterami, ale kali azirajeśsia — zroblena šmat.
«Nas nazyvali «letucieńnikami» i kazali, što ŭ nas ničoha nie atrymajecca, — kaža jon. — A my lotali na «śvietłavych chutkaściach». Try hady pracy pa 24 hadziny na dzień siem dzion u tydzień. Heta prykładna jak 10 hadoŭ zvyčajnaj pracy ŭ ofisie. Zdajecca, što kaścium z budučyni, a nasamreč my pracujem u takim rytmie».
Kaścium budučyni Tesla Suit pracuje pa pryncypie nejraciahličnaj elektrastymulacyi (NMES).
«Našaje cieła tak pracuje, i kaścium my zrabili taki, — tłumačyć Dźmitry. — Mozh dasyłaje impulsy ŭ ciahlicy, i jany skaračajucca. Kali vy da čahości dakranajeciesia, to sensary znachodziacca pad skuraj, ale infarmacyja pra adčuvańni pieradajecca ŭ mozh pa elektryčnych impulsach — nejronach».
Pavodle takoha ž pryncypu pracujuć, naprykład, viadomy ŭsim pa paliklinikach elektrafarez ci raznastajnyja stymulatary dla ciahlicaŭ, jakimi karystajucca ŭ sporcie.
«Padajucca niaznačnyja impulsy z roznaj častatoj i siłaj toku, jakija symulujuć roznyja adčuvańni: nibyta niechta da vas dakranajecca, niešta paŭzie, možna navat pieradać adčuvańnie vietru. U nastupnaje versii budzie pieradavacca ciapło i choład, a taksama siła ciažaru. Kali ŭ virtualnaj realnaści vy ŭzdymajecie virtualnuju šklanku, možna adčuć, nakolki jana ciažkaja, — kaža Dźmitry.
Žyvaja demanstracyja Tesla Suit:
Technalohija NMES viadomaja vielmi daŭno, ale biełaruskija raspracoŭščyki jaje ŭdaskanalili i spraścili. «Sam kaścium — heta 5 raznastajnych technalohijaŭ. A my ich abjadnali, jak Styŭ Džobs kaliści abjadnaŭ u smartfonie niekalki raznastajnych funkcyjaŭ. Zachopy ruchaŭ, klimat-kantrol, elektrastymulacyja — my heta ŭsio sabrali i abjadnali ŭ adnu madel. Prajšli šmat stadyjaŭ pratatypaŭ, zrabili adnu tkaninu, paśla inšuju», — raspaviadaje Dźmitry.
Usie isnyja na rynku analahi kaštujuć pa niekalki dziasiatkaŭ tysiač dalaraŭ, i da taho ž «pravadnyja».
«My zrabili pieršuju biespravadnuju madel, padklučyli jaje da planšteta, kamputara — to bok da virtualnaj realnaści. I ciapier u nas full body (kaścium na ŭsio cieła) kaštuje niedzie paŭtary tysiačy dalaraŭ, — kaža Dźmitry. — Heta ŭ 10 razoŭ tańniej».
Pavodle Dźmitryja, užo praz paru hadoŭ kaścium moža kaštavać kala 500 dalaraŭ i stanie dastupnym u kožnym domie. Abychodzicca ź im vielmi prosta.
«Vy nadziavajecie jaho, ŭstaloŭvajecie dadatak kaściuma sabie na planšet, telefon, kamputar — i jon pracuje, — tłumačyć Dźmitry. — My raspracavali taktylny płejer. Viedajecie, jak subtytry da videa? Dyk my dadali čaćviortuju taktylnuju darožku. Karystalnik moža ŭziać luboje videa, ukazać, na jakoj sekundzie, jakaja častka cieła jakija adčuvańni musić mieć. Zachoŭvajecie heta ŭsio, i praz naš taktylny płejer možna hladzieć usie hetyja videa, rasšarvać ich siabram».
Z takoj technalohijaj, pierakonvaje raspracoŭščyk, možna apynucca choć u klipie Madonny, choć u lubym filmie.
«Jak da luboha filmu možna znajści vialikuju kolkaść subtytraŭ na roznych movach, tak i tut: vy možacie stvaryć svaje taktylnyja subtytry i raźmiaścić ich, — abiacaje Dźmitry. — U nas budzie Appstore (krama dadatkaŭ) — častku prahramaŭ my robim sami, ale asnoŭnuju addajem raspracoŭščykam. My vypuskajem Software Development Kit. I luby raspracoŭščyk hulniaŭ, dadatkaŭ moža jaho vykarystoŭvać, kab intehravać aktyŭnyja adčuvańni ŭ svaje dadatki».
Va ŭłasnym Appstore Dźmitry abiacaje režymy hulniaŭ, sportu-fitnesu, adukacyi, zabavaŭ.
Kaścium zrobleny z admysłovaj tkaniny smarttextile, jakuju taksama raspracavali pad jaho. Jak kaža Dźmitry, zvyčajnaja kurtka važyć bolej. U kaściumie niama anijakich pravadoŭ, a na jaho nadziajecca admysłovy pojas. Zaradžajecca jak zvyčajny telefon, i na adnoj «zaradcy» ciapierašniaja versija pracuje 4 dni.
Dźmitry abiacaje, što karystacca kaściumam budzie absalutna biaśpiečna.
«NEMS ad pačatku vykarystoŭvajecca ŭ medycynie dla reabilitacyi paśla traŭmaŭ i insultaŭ, — kaža jon. — My kansultujemsia z arhanizacyjami, jakija zajmajucca dapamohaj paralizavanym ludziam, vykarystoŭvajuć raznastajnyja metodyki fizijaterapii. U nas «na borcie» prafesijnyja daktary».
Ciapier vynachodnictva prachodzić praceduru sertyfikacyi.
«Pakul my fakusujemsia na industryi zabavaŭ, najpierš hejminh, a taksama sport, fitnes, — apisvaje raspracoŭščyk. — Medycyna — heta nastupny krok, bo kab u jaje ŭvajści, treba kliničnyja vyprabavańni. A tearetyčna lekar moža dystancyjna praz kaścium vas lačyć, vystaŭlać prahramy, tajmery. Dalejšaja meta kaściuma — rasšyfroŭka impulsaŭ nejronaŭ, kab možna było naŭprost padklučycca da nervovaj systemy čałavieka».
Praz Kickstarter da 7 lutaha planujuć sabrać 250 tysiač funtaŭ. Ź ich za paru dzion sabrali amal dziasiatuju častku — kala 23 tysiač.
Hrošy patrebnyja, kab vypuścić pieršuju tysiaču kaściumaŭ. Paralelna kamanda źbiraje supolnaść raspracoŭščykaŭ, kab razam davieści madel da spažyvieckaha rynku.
«My heta robim nie dziela hrošaj, a kab maru svaju zrabić realnaściu, — kaža Dźmitry. — Ja ŭvohule liču, što maja misija vykananaja, kaścium jość i jon pracuje. A ciapier vyjaviłasia, što šmat adnadumcaŭ. I takich «džedajaŭ» my źbirajem pa ŭsim śviecie».
Kaścium sumiaščalny ź inšymi virtualnymi harniturami, jak Oculus i Google glass.
«Nadziavajecie Tesla Suit, Oculus i apynajeciesia ŭ 3D-śviecie, — abiacaje Dźmitry Marozaŭ. — Našaja meta — zrabić matrycy».
Hubaziki spynili aŭto ŭ Breście, kiroŭca sprabavaŭ uciačy i najechaŭ na adnaho ź ich1
Kamientary