FSAN patrabuje 14 młn ź ipešnika, jaki 14 hadoŭ nie atrymlivaje prybytku z pradprymalnickaj dziejnaści

Apošnija dva hady Siarhiej Kudrašoŭ pracuje pa damovie padradu, spraŭna pieraličvaje ŭ Fond sacabarony ŭnioski, ale jaho prymušajuć zapłacić paŭtorna, bo jon zarehistravany i jak indyvidualny pradprymalnik.

IP Siarhiej Kudrašoŭ zarehistravaŭ u 2001 hodzie. Jak ipešnik jon prapracavaŭ mienš za hod. Prajekt, pa jakim jon zaklučyŭ damovu, skončyŭsia, i bolš pradprymalnickaja dziejnaść prybytku jamu nie prynosiła. Adnak zajavu nie likvidacyju mužčyna nie padavaŭ - dumaŭ, jašče znojdziecca praca.

«Heta ciapier treba ŭsiaho niekalki dzion, kab zarehistravać IP. A pa tych časach heta było davoli turbotnaja sprava, — kaža jon. — Tamu zajavu ŭ padatkovuju ja nie padavaŭ, status pradprymalnika ničym mianie nie abciažarvaŭ».

Adnak u 2014 źmianiłasia zakanadaŭstva. Ciapier usie pradprymalniki, niezaležna ad taho, atrymlivajuć jany prybytak ad svajoj dziejnaści ci nie, abaviazany pieraličyć unioski ŭ Fond sacyjalnaj abarony nasielnictva. Za hod nabiahaje bolš za 7 młn rubloŭ.

«Ja dumaŭ, mianie heta nie tyčycca, pakolki ja spačatku pracavaŭ pa pracoŭnaj damovie, a apošnija dva hady pa damovie padradu. Uvieś hety čas pracadaŭca pieraličvaŭ za mianie ŭ FSAN 35% ad zarabotnaj płaty, - raspaviadaje Siarhiej. - Adnak, kali ja ŭsio ž taki padaŭ dakumienty na likvidacyju, z FSAN pryjšoŭ list, što ja im pavinien bolš za 13,5 młn. rubloŭ plus pianiu 800 tysiač rubloŭ. Maju pracu pa damovie padradu, a adpaviedna i ŭnioski za hety pieryjad, jany ŭ raźlik brać nie chočuć».

Pa zakonie, kali pradprymalnik paralelna pracuje ŭ inšaj arhanizacyi, unioski za jaho moža pieraličvać pracadaŭca. Tady paŭtorna ničoha płacić nie treba. Adnak hetaje praviła raspaŭsiudžvajecca tolki na pracoŭnyja adnosiny, da jakich praca pa damovie padradu nie adnosicca, rastłumačyli BiełaPAN u Centralnym aparacie FSAN.

Siarhiej niekalki razoŭ źviartaŭsia ŭ Pieršamajski adździeł Minskaha ŭpraŭleńnia Fondu z pytańniem, čamu jon jak IP pavinien płacić dvojčy.

«Mnie patłumačyli, što dziejnaść pa damovie padradu jany rasceńvajuć jak druhuju pracu, a voś IP jak asnoŭnuju, choć pa fakcie hrošaj z pradprymalnictva ja ŭžo vielmi daŭno nie atrymlivaju, - kaža mužčyna. - U vyniku ja pavinien zapłacić dvojčy, inakš apišuć maju majomaść!»

U bližejšy čas Kudrašoŭ źbirajecca pahasić zapazyčanaść, choć spadziajecca, što 800 tysiač vystaŭlenaj piani jamu ŭdasca adsudzić. «Mnie nie paviedamlali ab zapazyčanaści. U Fondzie niama dadzienych, što na moj adras adpraŭlali list. Tak što pa hetym pytańni, dumaju, budzie jašče razhlad».

Siarhiej Kudrašoŭ źviarnuŭsia i ŭ Kanstytucyjny sud. Jon ličyć, što varta likvidavać prabieły ŭ zakanadaŭstvie.

«Va ŭkazie ab darmajedstvie my ŭličanyja. Kali pracuješ pa damovie padradu, płacić zbor nie treba. A voś u płanie adličeńniaŭ u Fond sacabarony jość niedapracoŭka, — miarkuje jon. — Z adnaho boku praca pa damovie padradu nie źjaŭlajecca pracoŭnymi adnosinami, inakš ź mianie jak IP nie brali b paŭtorna ŭnioski, ale ź inšaha boku, ja vymušany vypłačvać unioski ŭ FSAN jak z pracoŭnaj dziejnaści. Dzie spraviadlivaść? Ja ž nie prahulaŭ, pracavaŭ, pieraličvaŭ usie sumy!»

Paźbiehnuć «padvojnaha ŭniosku» možna było b, kali b pradprymalnik svoječasova padaŭ zajavu ab spynieńni dziejnaści.

«U Fondzie mnie skazali, što ŭsie maje ŭnioski ŭličać pry naličeńni balničnych i ŭ nastupnym piensii, — kaža Kudrašoŭ. — Adnak na pracoŭny staž heta nijak nie paŭpłyvaje. Našy orhany ŭličvajuć tolki zapisy ŭ pracoŭnaj knižcy».

U Fondzie sacabarony admovilisia dać BiełaPAN infarmacyju, kolki ipešnikaŭ pieraličyli ŭnioski, niahledziačy na toje, što ŭ 2014 hodzie jany nie atrymali prybytku z pradprymalnickaj dziejnaści.

Viadoma tolki, što na 1 kastryčnika 2015 u Biełarusi było zarehistravana amal 333 tysiačy IP.

• 0
• 0
• 0
• 0
• 0
• 0
• 0
• 0