Biełaruskamu palituciekaču ŭ Belhii Źmitru Pimienavu admovili ŭ vydačy ŭkrainskaj vizy.
Źmicier Pimienaŭ — biełaruski «Miron», jaki na Viciebščynie vyviešvaŭ u ciažkadastupnych miescach bieł-čyrvona-biełyja ściahi. Kala dziesiaci hadoŭ jon žyvie ŭ Belhii ŭ statusie palityčnaha ŭciekača.
Źmicier Pimienaŭ paviedamiŭ Radyjo Svaboda pra svaje prablemy z atrymańniem ukrainskaj vizy:
«Ja ŭžo try hady navučajusia va Ŭkrainskim katalickim universytecie ŭ Lvovie. Heta duchoŭnaja navučalnaja ŭstanova, jakaja nia ŭniesienaja ŭ rejestar dziaržaŭnych navučalnych ustanoŭ Ukrainy. A tamu na jaje navučencaŭ nie raspaŭsiudžvajecca toj paradak, kali studenty atrymlivajuć vizu na ŭvieś termin navučańnia. Pry hetym ja nia maju biełaruskaha pašparta, a maju pašpart palityčnaha ŭciekača pavodle ženeŭskaj kanvencyi — tak zvany ženeŭski pašpart. Hety pašpart dazvalaje volna naviedvać krainy Eŭraźviazu, ale dla krainaŭ pa-za miežami EZ patrebnyja vizy. Hetkim čynam, naviedvać Ukrainu maju mahčymaść praz zaprašeńni pryvatnych asobaŭ. Maje ŭkrainskija siabry, jakich ja viedaju praz carkvu, dasyłali dla mianie zaprašeńni, i ja atrymlivaŭ vizu ŭ ambasadzie Ŭkrainy ŭ Bruseli. Sioleta ž, kali jany pryjšli brać takoje zaprašeńnie ŭ pašpartnym adździele va Ŭkrainie, jaki zaŭsiody ich vydavaŭ, to im admovili. Maŭlaŭ, u źviazku z tym, što va Ŭkrainie składanaje palityčnaje stanovišča, idzie vajna, my nia možam dać dazvołu na zaprašeńnie».
Źmicier Pimienaŭ kaža, što nia viedaje, jak patłumačyć pazycyju ŭkrainskich uładaŭ, tym bolš što sam jon maje adkryta praŭkrainskuju pazycyju:
«Moj zaniatak va Ŭkrainie — heta toje, što ja nabyvaŭ amunicyju, valanteram pierasyłaŭ hrošy, u vajskovy špital u Lvovie vaziŭ padarunki. Taksama padtrymlivaju ŭsie ŭkrainskija manifestacyi, jakija adbyvajucca ŭ Bruseli. Kali ja baču, što Ŭkraina zajmaje takuju antykramloŭskuju palityku, to mušu padtrymlivać i Ŭkrainu».
Znajomaja Źmitra Pimienava ŭ Ivana-Frankoŭsku Iryna, jakaja dapamahaje biełaruskamu palituciekaču ŭ atrymańni ŭkrainskaj vizy, kaža, što aburanaja biespadstaŭnaj admovaj čynoŭnikaŭ vydać zaprašeńnie. Ciapier jana sprabuje ŭrehulavać hetuju prablemu z pradstaŭnikami SBU.
Pavodle Źmitra Pimienava, u Lvoŭskim katalickim universytecie jon atrymlivaje pedahahičnuju adukacyju vykładčyka bahasłoŭja. Pa zakančeńni VNU maryć viarnucca ŭ Biełaruś i pracavać turemnym śviatarom.
«Ja biełaruski palityčny ŭciakač. Ale ja vieru, što Biełaruś budzie volnaja. Praź piać hadoŭ ja jakraz skonču navučańnie i planuju viarnucca z vyšejšaj bahasłoŭskaj adukacyjaj, kab prynieści karyść Biełarusi».
Što zapisana aficyjnaj pryčynaj śmierci adzinaha syna Jarmošynaj?4
Kamientary