«Раптам не прыйшоў на працу, а праз пару дзён яго затрымалі». Новыя падрабязнасці пра немца, прысуджанага да расстрэлу ў Беларусі
Нямецкае выданне Tagesspiegel паразмаўляла з былымі калегамі Рыка Крыгера, каб разабрацца ў ходзе падзей.
Рыка Крыгер быў фельчарам нямецкага Чырвонага крыжа з лета 2021-га.
«Ён распавядаў шмат шалёных гісторыяў, у якіх ніколі не было зразумела, ці праўда гэта», — расказаў ягоны былы калега. Калега расказаў выданню, што Крыгер спадзяваўся атрымаць грын-карту і паехаць у ЗША, каб адкрыць там уласны бізнэс. Спадзяваўся, што дапаможа былая праца ахоўнікам у службе Дзярждэпа ЗША.
Калегі пляткараць, што падчас працы ў Чырвоным крыжы Крыгер пазнаёміўся з нейкім украінцам, які ўгаварыў яго паехаць ва Украіну.
«Мы меркавалі, што ён паедзе туды як парамедык», — кажуць калегі. Яны не чакалі, што ён знікне раптоўна, але ў пачатку кастрычніка 2023 года Крыгер проста не прыйшоў на працу, не вярнуўшы нават форму. А праз некалькі дзён сваякі паведамілі, што ён пад вартай у Беларусі.
Выданне адзначае, што незразумела, якім менавіта чынам ён апынуўся ў Беларусі. Афіцыйныя органы Германіі пакуль нічога не тлумачаць.
Як піша Tagesspiegel, пасля Крыгера ў Расіі асудзілі амерыканскага журналіста Эвана Гершкавіча да 16 гадоў калоніі, у той жа час атрымала шэсць з паловай гадоў журналістка Радыё Свабода Алсу Курмашава. Яны выказваюць здагадку, што ўсе гэтыя падзеі — гэта гібрыдная атака Расіі і Беларусі, каб схіліць Захад да нейкіх дзеянняў.
Выказваецца здагадка, што Крыгера могуць паспрабаваць абмяняць на Вадзіма Красікава, які застрэліў у Берліне чачэнскага палявога камандзіра Зелімхана Хангашвілі. Красікаў адбывае пажыццёвае пакаранне.
«Наша Нiва» — бастыён беларушчыны
ПАДТРЫМАЦЬСястра Калеснікавай прапанавала ў Брусэлі тры крокі, якія трэба зрабіць для вызвалення палітвязняў22
Каментары