Трагедыя здарылася ў Магілёўскім раёне.
![](http://d3kcf2pe5t7rrb.cloudfront.net/img/w732d4webp1/photos/stock/01_20230304_img_8297_-3f5oe.jpg.webp)
Сям'я ўвечары села за вячэру, 62-гадовы мужчына еў шашлык і падавіўся. Нягледзячы на тое, што сваякам удалося выцягнуць кавалак мяса, з-за кіслароднага галадання адбылася гібель мозгу і спынілася сэрца, паведамляе Дзяржаўны камітэт судовых экспертыз.
Пазней высветлілася, што мужчына глытаў вялікія кавалкі мяса, практычна не перажоўваючы. Пасля ў крыві знайшлі этылавы спірт у канцэнтрацыі, якая адпавядае сярэдняй ступені ап'янення.
Судовыя эксперты нагадваюць, што смерць пры механічнай асфіксіі з-за траплення ў дыхальныя шляхі іншароднага цела можа адбыцца вельмі хутка — ужо праз паўтары хвіліны пацярпелы губляе прытомнасць, яшчэ праз 3-5 хвілін можа памерці: недахоп кіслароду жыццёва важным органам, у першую чаргу мозгу, цягне спыненне сэрца.
Для чалавека, які не можа дыхаць з-за іншароднага цела, выратавальным з'яўляецца прыём Геймліха. Трэба ўстаць ззаду пацярпелага, абхапіць яго жывот пад рэбрамі абедзвюма рукамі; сціснуць руку ў кулак і часткай кулака з боку вялікага пальца прыціснуць жывот паміж пупком і рэбрамі.
Далонь другой рукі пакласці па-над кулаком і штурхаючым рухам уверх уціснуць кулак у жывот — паўтараць прыём да поўнага вызвалення дыхальных шляхоў.
Каментары