Суседзі Беларусі сочаць за сітуацыяй з прыбыццём вагнераўцаў, але ўзроўню гатоўнасці не павышаюць
15 ліпеня паступілі паведамленні, што ў Беларусь сталі прыязджаць расійскія найміты з ПВК «Вагнер». Гэтыя перамяшчэнні не засталіся па-за ўвагай сілавых структур памежных з Беларуссю краін, але нешта рабіць дадатковае да таго, што ўжо было зроблена раней, яны пакуль не бачаць патрэбы.
Служба аховы дзяржаўнай мяжы Літвы адзначыла, што пакуль сочыць за сітуацыяй, але не бачыць прычын для таго, каб што-небудзь рабіць для дадатковай абароны мяжы.
«Абарона мяжы з Беларуссю цяпер дадаткова ўзмоцненая праз нелегальную міграцыю і праз саміт НАТА, таму ўзровень назірання і пільнасці высокі», — сказаў прэс-сакратар літоўскай памежнай службы Гедрус Мішуціс.
«Вядома, мы будзем сачыць за сітуацыяй. Але пакуль няма прыкмет таго, што трэба што-небудзь яшчэ рабіць», — дадаў ён.
Дзяржсакратар канцылярыі прэм'ер-міністра і намеснік каардынатара спецслужбаў Польшчы Станіслаў Жарын таксама паведаміў, што Варшава сочыць за сітуацыяй.
«Прыбылі першыя вагнераўцы, на гэты момант іх можа быць некалькі сотняў», — напісаў ён у твітары.
Пры гэтым польскі чыноўнік падкрэсліў, што «расіяне будуць выкарыстоўваць групу «Вагнера» так, як яны гэта робяць па ўсім свеце: дэ-факта вагнераўцы выконваюць місіі Крамля і ад імя Крамля».
У той жа час камандуючы аб'яднанымі сіламі Узброеных сіл Украіны Сяргей Наеў у апублікаваным сёння інтэрв'ю выданню «Апостроф» падкрэсліў, што Расія выкарыстоўвае Беларусь як «донара ўзбраення і вайсковай тэхнікі», а яе тэрыторыю — як «плацдарм, з якога вядзецца разведка».
«Падраздзяленні Узброеных сіл Беларусі, разгорнутыя ўздоўж украінскай мяжы, ударнага патэнцыялу не маюць і могуць выконваць толькі задачы па ўзмацненні аховы ўласнай мяжы», — перакананы военачальнік.
Пры гэтым ён, аднак, заўважыў, што хоць пакуль што ўдарных груповак РФ у Беларусі не створана, Масква «можа нарасціць вайсковы патэнцыял», «для чаго ўтрымлівае ў гатоўнасці інфраструктуру».
«Улічваючы магчымасць аднаўлення наступальных дзеянняў на паўночным кірунку, асаблівую актуальнасць набыла інфармацыя аб планах размясціць на тэрыторыі суседняй дзяржавы падраздзяленні ПВК «Вагнер», — заявіў камандуючы АС УСУ.
Чытайце таксама:
Украінскія памежнікі адсочваюць перамяшчэнні вагнераўцаў у Беларусі
Мінабароны Беларусі і ПВК «Вагнер» выпрацавалі дарожную карту перадачы досведу
Прыгожын начаваў у лагеры пад Асіповічамі? Яго сфатаграфавалі ў адных трусах — «Беларускі Гаюн»
Сілавікі ўзяліся за карыстальнікаў твітара — дзясяткі акаўнтаў звычайных беларусаў сталі «экстрэмісцкімі»7
Каментары