U Muzyčnym teatry — premjera «Silvy»

26–27 sakavika Biełaruski dziaržaŭny akademičny muzyčny teatr pakaža premjeru apierety «Silva», paviedamiŭ na pres-kanfierencyi 22 sakavika mastacki kiraŭnik teatra Adam Murzič. Pavodle jaho słoŭ, hetaj premjeraj teatr abnaŭlaje repiertuar kłasičnych apieret.

Premjera pieršaj pastanoŭki apierety vienhierskaha kampazitara Imre Kalmana adbyłasia jašče ŭ 1915 hodzie, i z taho času jana zastajecca žamčužynaj žanru.

Na scenie biełaruskaha muzyčnaha teatra «Silva» była pastaŭlena try razy:

u 1972, 1986 i 2003 hadach (pad nazvaj «Karaleva čardaša»). Ciapier teatr prapanuje hledačam apieretu ŭ traktoŭcy režysiora-pastanoŭščyka Susany Cyruk.

Jak adznačyła režysior-pastanoŭščyk, za asnovu apierety ŭziata kłasičnaja siužetnaja linija — «heta śpiektakl pra teatr, pra kabare». Razam z tym, pavodle jaje słoŭ, pastanoŭščyki «Silvy» pasprabavali pazbavicca ad «psieŭdasaładžavaha pafasu, jakim hrašyła savieckaja apiereta», i zrabić akcent na čałaviečych adnosinach.

U śpiektakli zaniatyja try składy artystaŭ. Roli vykonvajuć narodnaja artystka Biełarusi Natalla Hajda, zasłužany artyst Biełarusi Vasil Sierdziukoŭ, zasłužany artyst Rasii Alaksiej Kuźmin, łaŭreaty i dypłamanty mižnarodnych konkursaŭ Marharyta Aleksandrovič, Natalla Dziamienćjeva, Hanna Bialajeva, Andrej Marozaŭ, Siarhiej Sućko, Dzianis Niamcoŭ, Jaŭhien Jermakoŭ, Lesia Lut i inš. Pavodle mierkavańnia Cyruk, hledačam budzie cikava pahladzieć śpiektakli z udziełam usich składaŭ, bo, niahledziačy na žorstkuju schiemu pastanoŭki, akciory roznych składaŭ prynosiać svaju indyvidualnaść.

Jak paviedamiŭ Adam Murzič, u najbližejšych płanach teatra — pastanoŭka śpiektaklaŭ «Hraf Luksiemburh», «Dvanaccać kresłaŭ», a taksama novaja pastanoŭka «Pryncesy cyrka». Akramia hetaha, pavodle jaho słoŭ, teatr zaklučyŭ dahavor z amierykanskim pasolstvam ab pastanoŭcy miuzikła «Viestsajdskaja historyja». Płanujecca, što pracavać nad jaho pastanoŭkaj u Minsku ŭ 2012 hodzie buduć amierykanski dyryžor, baletmajstar, a režysioram-pastanoŭščykam vystupić režysior muzyčnaha teatra Anastasija Hrynienka.

• 0
• 0
• 0
• 0
• 0
• 0
• 0
• 0