Prahałasujcie za ŭdzieł biełarusaŭ u finale adzinaborstvaŭ K-1

Adrazu čaćviora chłopcaŭ z našaj krainy mohuć vystupić u samym papularnym paśla prafiesijnaha boksa ŭdarnym šou na płaniecie.

Karparacyja K-1 aficyjna abviaściła daty svaich finalnych turniraŭ. Spabornictvy K-1 WGR Final 16 hetaha hoda startujuć druhoha i treciaha kastryčnika ŭ Sieule.

«Spačatku na rynh vyjduć 16 bajcoŭ supierciažkaj vahavaj katehoryi, na nastupny dzień — takaja ž kolkaść atletaŭ vahoj da 70 kh (tak zvanaje K-1 MACh), — paviedamlaje pres-słužba karparacyi.

Što tyčycca supierciažaŭ, to arhanizatary ŭžo adabrali 10 najmacniejšych bajcoŭ. Zastałosia abviaścić jašče šaściarych. Reč u tym, što sioleta sarvałasia niekalki rehijanalnych Hran-pry, pieramožcy jakich i pavinny byli pryniać udzieł u finale. Z hetaj pryčyny arhanizatary skłali śpis z 21 pretendenta, siarod jakich až try biełarusy.

Heta tajbaksiory Zabit Samiedaŭ i Alaksiej Ihnašoŭ, a taksama były čempijon śvietu pa bajach biez praviłaŭ Andrej Arłoŭski. Kali na aficyjnym sajcie K-1 za biełarusaŭ prahałasuje naležnaja kolkaść fanataŭ, to ŭsie jany majuć šaniec trapić u suśvietny finał.

Raspaviadziom pra našych chłopcaŭ.

Minčuk Zabit Samiedaŭ (kłub «Patryjot») na siońnia ŭžo zrabiŭ imia ŭ K-1. Prymaŭ udzieł u letašnim finale, dzie prajhraŭ vice-čempijonu śvietu. U svoj čas Zabit staŭ čempijonam Jeŭropy pa kikboksinhu siarod prafiesijanałaŭ (75 kh) i čempijonam śvietu pa muaj-taj (86 kh). Siarod usich bajcoŭ K-1 Zabit adzin z najlahčejšych (jaho siońniašniaja vaha — 90 kh, rost — 184 sm). Dla paraŭnańnia — čempijon płaniety minułaha hoda Sem Šyłt maje rost 220 sm, a vahu — 120 kh.

— Ale ja hatovy i chaču zmahacca ź lubym bajcom, — paćvierdziŭ svoj namier Zabit u intervju «Źviaździe». — Niadaŭna ja pravioŭ plonnyja zbory ŭ Bałharyi i znachodžusia ŭ dobraj formie. Vielmi spadziajusia, što balelščyki prahałasujuć za mianie na sajcie K-1. I tady ja nie padviadu.

Druhi biełaruski pretendent — Alaksiej Ihnašoŭ (115 kh). Jaho nazyvajuć «Čyrvony skarpijon». U svoj čas Ihnašoŭ byŭ, vidać, hałoŭnaj zorkaj K-1 i samym viadomym biełaruskim spartoŭcam u śviecie. Jon pieramahaŭ praktyčna ŭsich čempijonaŭ płaniety pa K-1 roznych hadoŭ (Sema Šyłta, Remi Bańjaski, Pitera Aerca), ale sam tak i nie zmoh atrymać suśvietnuju karonu. U niadaŭnim intervju Ihnašoŭ raspavioŭ pra pryčyny stračanych maraŭ — złoŭžyvańnie ałkaholem. Ciapier «Čyrvony skarpijon» žyvie ŭ Novaj Ziełandyi, ale vystupaje pad biełaruskim ściaham. Sioleta Alaksiej sprabavaŭ kvalifikavacca ŭ finał K-1, ale na adnym z rehijanalnych turniraŭ atrymaŭ prykruju traŭmu kalena. Što ž, źjaviŭsia jašče adzin šaniec trapić u finał.

Treci biełaruski pretendent — Andrej «Pitbul» Arłoŭski (100 kh, žyvie ŭ Čykaha, ale vystupaje pad biełaruskim ściaham). Jon były čempijon śvietu pa źmiašanych adzinaborstvach u viersii UFS. Praŭda, za apošni hod Andrej prajhraŭ try pajadynki zapar, i naŭrad ci maje achvotu vystupać u spabornictvach K-1. Prynamsi, na jaho aficyjnym sajcie pra fanackaje hałasavańnie niama nijakaj infarmacyi.

Jak hałasavać?

Staronka z proźviščami bajcoŭ raźmieščana na aficyjnym sajcie karparacyi K-1. Pakidać svoj hołas možna tolki na karyść adnaho bajca. Za sutki možna prahałasavać tolki adzin raz.

Adziny biełaruski bajec, jaki harantavaŭ sabie ŭdzieł u suśvietnym finale — Vital Hurkoŭ (kłub «Patryjot», 70 kh). Uviesnu Vital pieramoh na ŭschodniejeŭrapiejskim Hran-pryK-1 MACh, što prachodziła ŭ Minsku. Paśla histaryčnaha turniru Vital niečakana daŭ biełaruskamoŭnaje intervju našamu telebačańniu. I tym samym staŭ pieršym spartoŭcam, jaki publična vystupiŭ na rodnaj movie.

Cikava, što ŭ rynh Hurkoŭ časta vychodzić pad miełodyi biełaruskaha falkłoru. Vital — lidar nacyjanalnaj zbornaj pa muaj-taj, siamirazovy čempijon śvietu. Adnak u spabornictvach K-1 jon nie moža ŭžyvać svaje hałoŭnyja karonki — baraćbu ŭ stojcy i ŭdary łokciami. Tamu turnir u Minsku jon vyjhraŭ ź ciažkaściu, bieź jarkich nakaŭtaŭ, «na žyłach».

Dniami źjaviłasia infarmacyja pra toje, što pieršym supiernikam Vitala Hurkova ŭ suśvietnym finale chutčej za ŭsio stanie… letašni čempijon śvietu Džordžya Pietrasian (Italija). Vychodzić, što biełarusa voś tak adrazu kidajuć «pad tanki»?

— Chto b ni byŭ supiernik, Vital — heta ad pryrody pieramožca, my raźličvajem na maksimalny vynik, — paviedamiŭ «Źviaździe» Dźmitryj Piasiecki, trenier Hurkova. — Kali b nie było dobrych šancaŭ pieramahčy, my b nie ŭdzielničali ŭ turniry. Adznaču, što kančatkovaje rašeńnie nakont supiernika pakul nie pryniataje.

Śpiecyjalisty padkreślivajuć, što Vital Hurkoŭ — pradstaŭnik płyni intelektualnaha dvuboju. Pry hetym moža mocna ŭdaryć. Vitala paraŭnoŭvajuć z mudrym vojenačalnikam. Sam bajec raspaviadaŭ žurnalistam, što ŭzoram vajskovaj mudraści i mahutnaści dla jaho źjaŭlajecca Vialiki kniaź Vitaŭt.

• 0
• 0
• 0
• 0
• 0
• 0