Prahramist straciŭ pracu ŭ Hiermanii i skardzicca, što nie moža znajści za tyja ž hrošy 

Siarhiej — Frontend-raspracoŭščyk. Pracavaŭ u biełaruskim ofisie EPAM. Dva hady tamu, u samym pačatku vajny va Ukrainie, źjechaŭ u Hiermaniju. Zaraz šukaje novuju pracu, bo z raniejšaj jaho zvolnili. Ź jahonych słoŭ, situacyja na rynku «davoli sumnaja», piša Devby.io.

— Majo rašeńnie źjechać u Hiermaniju nie było spantannym. Jašče pracujučy ŭ EPAM u Biełarusi, ja vučyŭ niamieckuju movu. Na praciahu paŭtary-dvuch hadoŭ šukaŭ pracu ŭ Hiermanii. U vyniku znajšoŭ prapanovu ad adnoj kampanii z kantraktam ad krasavika 2022 hoda.

Novaja praca

Tak vyjšła, što z kampanijaj, ź jakoj byŭ zaklučany kantrakt, supracoŭnictva nie atrymałasia. U vieraśni 2022 hoda jon źmianiŭ pracu — pierajšoŭ u kamandu raspracoŭki niamieckaha startapa, jaki zajmajecca ździełkami z kamiercyjnaj nieruchomaściu.

— Siarod abjektaŭ na prodaž — byłyja zapraŭki, składy, adzin raz navat pradavali bardel.

U Hiermanii vielmi mała ŭhodaŭ prachodzić pamiž pryvatnymi asobami. Pradaŭcoŭ i klijentaŭ znachodziać z dapamohaj makleraŭ. Tamu ŭ nas jość kamanda ryełtaraŭ, jakaja pracuje z maklerami i klijentami, dapamahaje adšukać najbolš prydatnyja varyjanty dla pakupki. I jość kamanda, jakaja adkazvaje za pytańni finansavańnia ździełak — źbiraje dakumienty i šukaje najbolš vyhadnyja kredytnyja prapanovy ŭ bankach.

Košt abjektaŭ, jakija ŭdzielničajuć va ŭhodach kupli/prodažu — ad 100 tysiač da miljona+ jeŭra. Kampanija ŭ zaležnaści ad ździełki atrymlivaje 3-7% ad sumy prodažu. 

Zrešty, z-za vysokaj pracentnaj staŭki ŭ jeŭrazonie ŭhodaŭ pa kupli nieruchomaści zaklučajecca nie tak šmat. Z-za hetaha kampanija raście nie tak, jak zapłanavana, i ź ciažkaściu vychodzić na samaakupnaść.

Svaje pasłuhi pa pošuku abjektaŭ kamiercyjnaj nieruchomaści i zaklučeńnia ździełak niamiecki startap prasoŭvaje z dapamohaj dvuch sajtaŭ. Siarhiej zajmajecca ich raspracoŭkaj i padtrymkaj.

— Na momant majho prychodu kamanda raspracoŭki składała kala 15 čałaviek, ale asnoŭnaja masa, u adroźnieńnie ad mianie, nie była ŭ štacie. Praź miesiac paśla pačatku pracy ad pasłuh kantraktaraŭ admovilisia, zastalisia tolki tyja, chto ŭ štacie — 5 čałaviek. Z tych časoŭ skład i kolkaść kamandy mianialisia, na kaniec sakavika hetaha hoda nas było 6 čałaviek.

Zvalnieńnie

U studzieni 2024 kiraŭnictva raskazała kamandzie, što padčas adnoj z uhodaŭ bujny hamburhski bank zatrymaŭ srodki klijenta ŭ pamiery niekalkich miljonaŭ jeŭra. Pryčyna — pravierka apieracyj na pradmiet admyvańnia hrošaj.

U vyniku akazalisia zamarožanyja i srodki niamieckaha startapa — 10% ad sumy ŭhody, jakija kampanija płanavała atrymać.

Pa słovach Siarhieja, heta pryviało da zatrymki zarobku — «niejmaviernaja pa mierkach Hiermanii situacyja». Kampanija była vymušanaja źviarnucca da inviestaraŭ z prośbaj ab dadatkovych ulivańniach resursaŭ, kab chacia b vypłacić zarobki.

— Paśla ŭlivańnia hrošaj inviestary zapatrabavali skaracić apieratyŭnyja vydatki, kab budučyja ŭlivańni nie spatrebilisia. Heta pryviało da zvalnieńnia adnaho nieajcišnaha supracoŭnika i dvuch raspracoŭščykaŭ, siarod jakich akazaŭsia i ja.

Ab zvalnieńni mianie apaviaścili ŭ kancy krasavika. Ranicaj napisaŭ šef. Jon byŭ u adpačynku, tamu ja vielmi ździviŭsia tamu, što jon kliča mianie na razmovu. My stelefanavalisia, jon biez chitrykaŭ usio patłumačyŭ i paviedamiŭ, što ŭ kancy lipienia ja pierastaju być supracoŭnikam kampanii.

Vybačaŭsia, što tak atrymałasia, skazaŭ, što jamu padabajecca sa mnoj pracavać, i paabiacaŭ paspryjać u pošuku novaj pracy (napisać refierens i t.p.). Tak što ja pakul dapracoŭvaju apošnija tydni. Nijakich asablivych vypłat pry zvalnieńni nie praduhledžana. 

Darečy, hrošy klijenta pa vyniku razmarozili ŭ kancy maja. Ale heta nijak nie paŭpłyvała na patrabavańnie inviestaraŭ ab skaračeńni vydatkaŭ i zvalnieńni. Fakt zvalnieńnia ŭžo adbyŭsia, pa kantrakcie mianie papiaredzili ab zvalnieńni za try miesiacy.

Pošuk pracy i situacyja ŭ IT

— Situacyja na rynku davoli sumnaja — pakul nie znajšoŭ pracu ź biahučym uzroŭniem zarobku (hadavaja 80000 jeŭra bruta, viłka 75-80 tysiač). Ja ŭ cełym dastatkova hnutki — asabliva nie pieraborlivy ŭ płanie technałohij i hatovy na hibryd-varyjanty, uklučajučy pierajezd u inšy horad.

Vakansij byccam by šmat, ale navat trapić na razmovu z HR — heta pośpiech. Za ŭvieś čas pošuku ja atrymaŭ adnu prapanovu ź fiksavanaj zarpłataj na 15% nižej zapytanaj. Z čym heta źviazana — niezrazumieła. 80% vakansij majuć na ŭvazie dobry ŭzrovień niamieckaj, što adrazu ž vyklučaje varyjant taho, što novyja mihranty (z pakul jašče niedastatkovym uzroŭniem movy) niejak paŭpłyvali na rynak.

U cełym, pa nazirańniach, mała kampanij, hatovych układvacca ŭ raźvićcio, u tym liku i za košt najmu IT-śpiecyjalistaŭ. Pryčym asablivaj roźnicy pamiž drobnymi firmami i vialikimi kancernami niama.

U vialikich kancernach taksama moža być niejkaje padabienstva hradacyj pa zarobku ŭ zaležnaści ad dośviedu, i ŭ suviazi z hetym atrymać niešta vyšej peŭnaj płanki ŭžo niemahčyma.

• 9
• 0
• 20
• 5
• 6
• 12
• 12
• 0